Daniel 12 - Bible in Tzeltal de Oxchuc y Tenejapa

Yorail slajibal

¹ “Ja' me yorail ya xchicnaj te Miguel, ja' te muc'ul jcanantaywanej ch'ul abat te ya scoltay te lum awu'une. Ja' yorail a te ay me bayal wocol, ma'yuc yan wocol jich c'oem ta pasel a te jayebix c'aal ay te nacionetique. Te c'alal ya sta yorail te jich ya xc'ot ta pasele, ya xcolic spisil te alumale, ja' te ts'ibubil sbiilic ta libro.

² Ay me bayalic te mach'atic wayemiquix, te ayic ta muquenal, te ya xcha'cuxic jajch'el. Ay me ya xbajt'ic ta cuxinel sbajt'el q'uinal, ay me ya xbajt'ic ta q'uexlal, tey me ya xbajt'ic sbajt'el q'uinal a, tey ta banti mero ilaybil sbae.

³ Te mach'atic ay sp'ijilique, te la yiq'uic ta beel tsobol ta jtul ta tojil bee, jich me xojobil ya xc'otic te bit'il xojobil te ch'ulchane. Xlemet me xojobil sbajt'el q'uinal, jich te bit'il xlemet xojobil te eq'uetique.

⁴ “Pero te ja'ate, Daniel, muca me ta awo'tan spisil te bitic la awile; maca, ac'beya selloil te libro, ja' to teme c'ot yorail te slajibale. Ay bayal ants-winiquetic ya xtalic ya xbajt'ic ta bayuc, yacalic me ta sleel te bitic yacuc sna'bey swentaile”, xi' te Gabriele.

⁵ Jo'on Danielon la quil ay yan cheb xan winiquetic tec'ajtic, juju-jtul ayic ta jujun sti'il muc'ul ja'.

⁶ Ay jtul c'opoj, la sjojc'obey te winic sc'u'inej lino-pac', ja' te ay ta yajc'olal te muc'ja'e, jich la yalbey: —¿Bi ora ya sta yorail slajibal te bitic jchajp xanix sc'oplal ae? —la yut.

⁷ Te winic sc'u'inej lino-pac', la stoy moel sc'ab ta stojol ch'ulchan, ay bila jc'axel la yal ta jamal ta stojol te cuxul Diose, jich la yal: —C'alal to ta oxeb soc olil, ja' te c'alal ya sta yorail ya xquejch'aj ta lajinbeyel yip te lum yu'un Dios, ja' to me ya sta yorail slajibal spisil te bitic jchajp xanix sc'oplal ae —xi'.

⁸ La caiy te bila la yale, pero ma xujt'uc la jna'bey swentail. Ja' yu'un la jojc'obey: —Cajwal, ¿bi ya xc'ot ta pasel ta patil yu'un spisil te bitic jchajp xanix sc'oplal ta alel ae?” la cut.

⁹ La sjac', jich la yal: “Jun awo'tan xbeenat, Daniel, melel spisil in to, muquen me ya x'ain ja' to teme la sta yorail te slajibale.

¹⁰ Ay me mach'atic bayal ya xc'ax yu'un te woclajel albil sc'oplale, pero buen lec me soc buen chapalic me ya xloq'uic yu'un. Te mach'atic amen yo'tanique, stalel me ya xjilic ta spasel xan te bitic amene, melel ma me xc'ot ta yo'tan stuquelic te bila ya xc'ot ta pasele. Yan te mach'atic ay sp'ijilique, ya me sna'ic spisil stuquelic.

¹¹ Jmil soc lajuneb yo'lajunwinic (1,290) c'aal ya xc'ax a te c'alal ya yich' quejch'anel ta aq'uel te milbil smajt'an Diose, ja' te swenta jujun c'aal ya yich' aq'uel ae, soc te c'alal ya yaq'uic tey a ta templo yu'un Cajwaltic te bila mero ilaybil yu'un te Diose.

¹² Bin nax me yutsilic te mach'a jun yo'tan ya smaliyic te ya xc'ax te jmil soc jo'lajuneb sjuclajunwinic (1,335) c'aale.

¹³ Pero te ja'ate, Daniel, tojan bael ta slajibal awu'un, baan cuxa awo'tan, ja' to ta slajibal c'aal ya me xjajch'at ta yich'el te stojol ac'abe —la yuton, jo'on te Danielone.