Daniel 11 - Bible in Tzeltal de Oxchuc y Tenejapa

¹ “Jo'on la cac'bey yip yo'tan, soc la jcoltay te Darío, muc' ajwalil yu'un Media, ja' te c'alal yac to nax ta beel jun ja'wil yat'el ta mandalteswanej ae.

² Yo'tic ya cac'bat ana'bey sba te bila smelelile: “Ya to me x'at'ejic ta muc' ajwalil oxeb winiquetic ta Persia. C'alal ya xlaj yat'elic, ya me yich' yat'el swenta xchanebal muc' ajwalil jtul winic te c'axem jich sc'ulejal a te bit'il oxtul yantique. Te c'alal ya sta yip ta swenta sc'ulejal, ya xchajban sba ta sjajch'el c'op ta stojol te nación Grecia.

Muc' ajwaliletic ta norte soc ta sur

³ Pero ta patil ya me yich' yat'el yan muc' ajwalil te bayal yip ta guerra. Ta scaj te mero bayal te yipe, bayal me mach'atic ya x'och ta sc'ab soc slum-sq'uinalic, soc ja' me ya spas te bila ya smulan spasel stuquele.

⁴ Pero te c'alal chapalix yu'un a te bay c'alal yu'uninej, ya me yich' jinel, soc ya me yich' pasel ta chansejp. Te yip te muc' ajwalil ma xju' ya xc'ax ta stojol patil alnich'anetic yu'un, soc ma sta jich yip ya xc'ot te bit'il c'ot ta pasel ta neelal toe, melel ya me yich' xatel. Yantic meix mach'atic ya x'ochic ta ajwalil yu'un a te juju-jsejp q'uinale.

⁵ “Te muc' ajwalil ta stojol sur, mero bayal me yip ya x'at'ej, pero ay me jtul general yu'un te c'ax jich yip ya xc'ot a te bit'il yip te ajwalile. Muc' me q'uinal ya yu'unin bael.

⁶ C'alal ya xc'ax bael te ja'wiletic, ay me ya spasic trato ta xchebalic: Te muc' ajwalil ta stojol sur ya me yac'bey yinamin yantsil-nich'an te muc' ajwalil ta stojol norte, swenta yu'un jich mero lamal q'uinal ya yaiyic ta xchebal a te nacionetique. Pero ya me xjin te bila chapal yu'unique, melel te antse soc te yale, te smamlal soc te abatetic yu'une, ya me yich'ic milel.

⁷ Pero ay jtul sts'umbal te ants te ya xba yac'bey guerra te soldadoetic ta norte. Ya xju' yu'un tsalaw, ya me yu'unin te tulanil ts'ajc' yu'un te muc' ajwalile. Te soldadoetic yu'un ya me yu'uninic spisil te bila aye.

⁸ Soc ya me yich'ic bael ta Egipto te bitic cuybil ta diosetic yu'unique, ja' te loc'ombaetic yu'unic pasbilic ta ultesbil oro, soc yantic biluquetic pasbil ta oro soc ta plata. Te c'alal c'axix che'oxeb ja'wil a te ma'yuc guerra yu'unic ta xchebalic te nacionetique,

⁹ te muc' ajwalil ta norte ya me xba yac'bey guerra te muc' ajwalil ta sur, pero ya me yich' tenel sujt'el.

¹⁰ “Pero te snich'nab te muc' ajwalil ta norte ya xchajban sbaic yu'un guerra, ya xchapic bayal soldadoetic yu'unic. Ay me jtul te soc spisil yip ya xbajt' ta yac'beyel guerra ta sur, jc'axel me ya sjin ta spisil jichuc muc'ja' te mal loq'uel tel ta sti'ile. Patil ya xcha'bajt' yac'bey xan guerra, ya me xc'ot c'alal ta tulanil ts'ajc' yu'un te muc' ajwalil ta sur.

¹¹ Te q'uinal la yochintayic te soldadoetic talem ta norte, ya me yac' ilinuc bayal yu'un te muc' ajwalil yu'un sur. Ya me xloc' jajch'el ta yac'beyel guerra te mero bayal soldadoetic, te ja' scontroe. Ya me stsal ta jc'axel.

¹² Te bit'il ya yaiy tsalaw, soc te bayal te scontro ju' yu'un smilele, ya me xjajch' stoybail yu'un, pero te yipe ma ba ya xjalaj bayal c'aal.

¹³ Te muc' ajwalil yu'un norte, ya xcha'chap xan yan soldadoetic yu'un, c'axem jich yipal te bit'il yan soldadoetic yu'un ta neelal toe. C'alal ya xc'ax bael ja'wil, ya me xcha'bajt' xan yac'bey guerra te sur. Ya me xbajt' soc bayal soldadoetic yu'un, te buen chapalic ta lec yat'ejibic yu'un guerra.

¹⁴ “Te bi ora jich ya xc'ot ta pasele, ay me bayal mach'atic ya stoy sbaic ta stojol te muc' ajwalil ta sur. Ay me winiquetic te amen yo'tanic ta Israel, jich nix te bit'il chicnaj ta ilel ta aiyele, pero ma me xc'ot ta pasel yu'unic te bila xchapojique.

¹⁵ Te muc' ajwalil ta norte ya me xtal, ya me sbut'bey jajch'el lum ta sjoyob ts'ajc'ul te lume, ya me x'och ta sc'ab. Ni ja'uc c'an ju'uc yu'un smacbelic te buen tulan soldadoetic ta sur te sbeel te scontro-soldadoetique.

¹⁶ Te mach'a ya yochintay te q'uinale, ya me spas te bila ya smulan spasbeyel ta stojolic te mach'atic ya yich'ic tsalel yu'unique. Ma'yuc mach'a ya xju' bi ya x'albot yu'un, ya me x'ain tey ta Lumq'uinal Mero T'ujbil te xi' sbiile. Spisil ya slajin tey a te bitic ya xchicnaj ta stojole.

¹⁷ Soc ya me xchajban sba yu'un ya yu'unin ta sejpel te q'uinal ay ta sur. Te bit'il jich ya snope, ay bila trato ya xchap soc te muc' ajwalil ta sur, ya me yac'bey yinamin yantsil-nich'an, swenta yu'un jich me ya xju' yu'un ya sjinbey a te yat'el ta muc' ajwalile. Pero te bila ya xchape, ma me xc'ot ta pasel yu'un.

¹⁸ Patil ya me yac'bey guerra te lumetic ta ti'ti'mar, tsobol me ya x'och ta sc'ab. Pero ay me jtul general ya slajinbey sc'oplal te bila q'uexlaltic sba ta pasele, ya me yac' ta q'uexlal yu'un te muc' ajwalil ta norte.

¹⁹ Te muc' ajwalil ya me xbajt'ix ta anjibaletic yu'un ta slum-sq'uinal. Pero ay me bila chujc'ul ya xc'o sta, ja' me ya x'ac'bot swocol ta xcuxlejal yu'un. Jich ma'yuquix bi ora ya xchicnaj xan ta alel sc'oplal.

²⁰ “Te c'alal ya xlaj ya me x'och sjelol ta muc' ajwalil. Te muc' ajwalil ya me sticun ta c'anel pataniletic, swenta yu'un ya xc'ulejub a te banti yac ta mandalteswaneje. Pero ma ba ya xc'ax bayal c'aal a ya me yich' milel, manchuc me ma ba ay ta guerra a ya xlaj.

²¹ “Te c'alal ya xlaje, ya me x'och ta muc' ajwalil jtul winic te mero ilaybil sbae. Manchuc me ma snujp'in te ya x'och ta muc' ajwalile, pero ya me smuc te bila amen snopoj ta yo'tane.

²² Jc'axel me ya slajin te mach'a ay yip ya xtal ta stojole, soc ya me smil te mach'a swentainej te trato.

²³ Soc ya slo'lay te mach'a xchapoj soc te c'ux ya yaiy sba soque. Manchuc me ma'yuc tsobol swinictac, pero ya me yaiy tsalaw ta puersa.

²⁴ Te c'alal ma'yuc mach'a ya xmaliyot yu'une, ya me x'och bael ta q'uinal mero jc'ulej te ay ta jsejp q'uinale. Ya me spas te bitic ma'yuc la spas te antiguo sme'-state: Ya me spucbey soldadoetic yu'un te biluquetic soc c'ulejaliletic la sta ta guerra. Ya xchajban sba yu'un ya yac'bey guerra te lumetic ay sjoyob ts'ajc'ule, pero ma ba jal c'aal te jich ya spase.

²⁵ “Ta scaj te ay bila ya xju' yu'un ya yile, soc te ma sna' xiwele, ya me yac'bey guerra te muc' ajwalil ta sur, yu'un ja' smuc'ul yo'tan te bayal soldadoetic yu'une. Te muc' ajwalil ta sur ya me scoltay sba ta spisil yo'tan, ya me x'och ta guerra soc tsobol soldadoetic, soc bayal me yip ya yaq'uic guerra. Pero ay me ja' nix ya sujt'es sba ta stojol te sjoye, jich ma ba ya xju' yu'un te guerra ya x'ac'bot yu'un te scontro-soldadoetique.

²⁶ Ja' te mach'atic la yic' ta we'el ta smesa, ja'ic nix ya xchajban sbaic ta sjinel. Te soldadoetic yu'un ya me yich'ic tsalel, mero bayal me ya xlajic ta milel.

²⁷ Te muc' ajwaliletic ta xchebalic, ja' xanix ya xbajt' ta yo'tanic sna'el bi ya yut ya yac'bey sba swocolic. Ya me xnajc'ajic ta we'el ta jun nax mesa, talel c'axel me ya slo'lay sbaic. Pero ma me ayuc mach'a ya xc'ot ta pasel yu'un jtuluc te bila ya snop ta yo'tanique, melel ma to ba staoj yorail te ya xc'ot ta pasele.

²⁸ Te muc' ajwalil te talem ta norte, ya sujt' bael ta slum-sq'uinal. Ya me yich' bael spisil te biluquetic la yu'unin ta guerra. Patil ya me scontroin te ch'ul trato. Ya xc'ot ta pasel yu'un te bila ya xchape, patil ya me sujt' bael ta slumal.

²⁹ Te c'alal ya xc'ot yorail te bila chapale, ya me sticun xan bael soldadoetic yu'un ta stojol sur, pero ma jichuquix ya xju' yu'un tsalaw te bit'il la yaiy tsalaw ta sbabial buelta.

³⁰ Te soldadoetic yu'un ya me x'ac'botic guerra yu'un soldadoetic te ya xtalic ta stojol smalib c'aal, ya me x'ic'otic tel ta barcoetic. Te c'alal ya x'u'uninot yu'un te xiwele, ya me sujt'ic bael. Te muc' ajwalil ta norte ya st'omes bael ta stojol te ch'ul trato te slab yo'tane. Jun yo'tan ya xc'ot soc te mach'atic la xch'ayic ta yo'tanic te trato swenta yu'un ya yac' sbaic ta abatinel yu'un a te muc' ajwalile.

³¹ “Te soldadoetic yu'un ya me sboltesbeyic te templo soc te anjibal yu'une, ya me scom ta aq'uel te milbil smajt'an Dios swenta jujun c'aale. Ja' me ya yac' tey a te bila mero ilaybil yu'un te Diose.

³² Te muc' ajwalil ya me snop te ya sman ta swenta bit'il ya yac'bey yil yutsil yo'tan ta lot te mach'atic ch'ayem ta yo'tanic te trato chapale. Pero te mach'atic te c'ux ta yo'tanic te Dios yu'une, jun me yo'tanic ya x'ain, soc ya me stejc'an sbaic ta sc'asesel te wocole.

³³ Te mach'atic ay sp'ijilic tey ta slumalic ya me sp'ijubtes tsobol ants-winiquetic, pero ora me ya yich'ic milel, ya me yich'ic chiq'uel, soc ya me x'elc'anbotic bael te biluc yu'une, ya x'ic'otic bael ta mosoil ta yantic lumetic. Ja' me in to ya me xjalaj jtebuc.

³⁴ Te c'alal ya xc'ot yorail te uts'inele, ay banti ya xtal jtebuc coltayel ta stojolic, manchuc me ay bayal ya yac' sbaic soc, swenta nax ayuc bi ya staic a.

³⁵ Soc ay me ya yich'ic uts'inel te jp'ijubteswanejetic yu'un te lume. Melel ta swenta prueba ya yich' xan lecubtesel soc ya xtojobic xan ta mero lec, ja' to teme c'ot te yorail albilixe.

³⁶ “Te muc' ajwalil ta norte ja' me ya spas te bila ya smulane. Mero bayal me te stoybaile, asta ja' toyol ya scuy sba yu'un spisil diosetic, soc ya me yalbey mero ilaybil sba ixta c'opetic ta stojol te mero cuxul Diose. Spisil me lec ya xc'ot yilel te bitic ya spase, ja' to teme ticunbot castigo ta stojol yu'un te Diose. Melel te bila quechel ya spas te Diose, ya nix me spas stuquel a.

³⁷ Te muc' ajwalil ma me ba ya yich'bey ta muc' te diosetic yu'un te antiguo sme'-state, ni ja'uc te diosetic ya xch'uun te antsetique, soc ni ayuc bila yan diosil. Melel ya me scuy sba te ja' toyol yu'un ta spisil diosetique.

³⁸ Pero ya xch'uun te dios yu'un te tulan ts'ajq'uetique, ya me yich' ta muc' te dios in to, te ma ba la xch'uun te antiguo sme'-state. Ya me yac'bey smajt'anin oro, plata, t'ujbil tonetic soc spisil biluquetic te toyol stojolique.

³⁹ Ta swenta in dios to ya xju' yu'un stenel ta guerra te lumetic te mero tulan ts'ajc' yich'ojique. Spisil te mach'atic ya yich' ta muc' te muc' ajwalile, buen lec me sc'oplalic yu'un. Ya me yac'bey buen tulan yat'elic, soc ya me yac'bey sq'uinalic yu'un stojolic.

⁴⁰ “C'alal ya xc'ot yorail te slajibale, te muc' ajwalil ta sur ya me xba yac'bey guerra te muc' ajwalil ta norte. Pero ya me xloc' tel ta stojol jichuc chawuquil ja'al, spisil me yip ya xbajt' ta stojol te muc' ajwalil ta sur. Ya me snojes spisil q'uinal ta carretaetic yu'un guerra, soldadoetic moemic ta caballo, soc bayal barcoetic.

⁴¹ Soc ya x'och ta Lumq'uinal Mero T'ujbil te xi' sbiile, soc bayal me mach'atic ya smil. Pero ya xcol stuquelic te yajwal Edom soc te yajwal Moab, soc jteb ma spisiluc te yajwal te jsejp q'uinal Amón sbiile.

⁴² Te soldadoetic yu'un, ya me yu'uninic yantic lumq'uinaletic, soc ma me ba ya xcol ta c'abal te Egipto.

⁴³ Ya me yich' bael te c'ulejalil oro soc plata, soc spisil te biluquetic te buen t'ujbilic ta Egipto. Patil ya me xtaotic te slum-sq'uinal Libia soc Etiopía.

⁴⁴ Pero ya me xc'ot c'op ta stojol te ya xtal ta sloq'uib c'aal soc ta norte. C'alal ya xjul ta stojol te c'ope, ya smel yo'tan yu'un, pero ya me xloc' jajch'el soc spisil slab yo'tan ta sjinel soc ta smilel tsobol ta jtul.

⁴⁵ Ya me xba spas scampamento ta yolilic te mar soc te ch'ul wits yu'un te T'ujbil Lumq'uinal te xi' sbiile. Pero tey ni me ya staix yorail ya xlajix jilel a, ma me ayuc mach'a ya xcoltayotix yu'un.