Daniel 10 - Bible in Tzeltal de Oxchuc y Tenejapa

Ta ti'muc'ja' Tigris, ay bila ac'bot yil te Daniele

¹ Ta yoxebal ja'wil yat'el ta muc' ajwalil yu'un Persia te Ciroe, te Daniel, te Beltsasar yan sbiile, ay bila ac'bot yil ta mero melel, pero chujc'ul ta na'beyel swentail. Te Daniel la yac' yo'tan ta sna'el, jich ju' yu'un sna'beyel swentail te bila ac'bot yile.

² Te c'alal jich c'ot ta pasele, jo'on Danielon oxeb semana yacon ta mel-o'tan yu'un.

³ Ma ba la jwe' bujts'an we'elil, ma ba la jti' ti'bal, ma ba la cuch' vino, soc ma ba la cac'bey jba perfume te c'ax te oxeb semana.

⁴ Ta chaneb xcha'winic (24) c'aal sjajch'el te u swenta sjajch'el ja'wile, ayon ta sti'il a te muc'ja' Tigris.

⁵ Ora nax la quil chicnaj jtul winic. Te winique sc'u'inej lino-pac', te cinturón pasbil ta puro oro.

⁶ Te sbaq'uetal mero xlemet jichuc buen t'ujbil c'anal topacio. Te yelaw mero xlemlon jichuc tsantsewal. Te sit, jich yilel te bit'il c'ajc' yich'oj tsumele. Te sc'abe soc te yacane, mero sts'ayet jichuc bronce. Te sc'ope, pajal sc'op soc mach'atic mero tsobolic.

⁷ Jo'on nax jtuquel la quil te bila ay ta ilel yaiyele. Te yantic winiquetic joineje, ma'yuc bila la yilic stuquelic. Melel mero u'uninotic yu'un te xiwele, jich animal ba snac' sbaic stuquelic.

⁸ Jtuquel ayon a te ac'boton quil la caiy te bila mero muc' sc'oplale. Mero ch'ay jch'ich'el soc jc'axel laj quip la caiy.

⁹ Te la caiy c'opoje, ma'yuconix ta q'uinal la caiy, pajc'ajon bael ta lum yu'un.

¹⁰ Ora tal c'abal ta jtojol, la stsacon soc la sjachon, la scojt'anon jilel ta lum.

¹¹ C'opoj, jich la yalbon: —Daniel, te bayal c'uxat ta yo'tan te Diose, aiya awaiy te bila ya calbate. Jajch'an, melel te jo'one ticunbilon tel ta atojol —xi'. Te c'alal laj yo'tan yalbelon a te c'ope, te jo'one yacon ta nijq'uel a la jtejc'an jba.

¹² Jich la yalbon: —Ma xiwat, Daniel, melel ta sbabial c'aal te c'alal jajch'at ta sna'el te awo'tanuc ya ana'bey swentail te bitic chujc'ulic ta na'ele, soc la anop ta awo'tan te ya apejc'an aba ta stojol te Dios awu'une, jich la yaiybat te ac'ope. Ja' yu'un talon jo'on.

¹³ Te ch'ul abat jcanantaywanej yu'un Persia, jun xcha'winic (21) c'aal tulan la yac' sba ta jtojol. Pero te Miguel te ja' jtul ta jwolwanejetic yu'un te ch'ul abatetic, ja' tal scoltayon. Melel te manchuc tale, tey jilon jtuquel ta yolilic te ajwaliletic ta Persia te jichuque.

¹⁴ Ja' yu'un tal cac'bat ana'bey swentail te bila ya xc'ot ta pasel ta stojol ta patil te alumale, melel te bila la awil la awaiye, ja' ya yac' ta na'el te bila ya xc'ot ta pasele”, xi' te Gabriele.

¹⁵ Te c'alal yac ta yalel a, te jo'one la cac' coel jsit ta lum, ni jp'aluc c'op loc' ta que.

¹⁶ Ora nax ay mach'a chicnaj, pajal soc Nich'anil yilel, c'o spicbon te sti'il quee. Jich la calbey te mach'a ay ta jtojole: —Cajwal, te bila la quil la yac'bon bayal jwocol soc la slajinbon quip ya caiy.

¹⁷ ¿Bit'il ya xju' ya xc'opojon ta atojol te abaton awu'une? Mero jc'axel lajem quip ya caiy, ya xtup'ix quic' ya caiy —xoon.

¹⁸ Ja' te mach'a pajal yilel soc Nich'anil la xcha'tsacon, jich tal xan quip la caiy.

¹⁹ Jich la yalbon: —Ma me xiwat, soc ma jc'axeluc tey ya xbajt' awo'tan a. C'uxat ta yo'tan te Diose. Ac'a xan puersa, ayuc me yip awo'tan —xi'. Te c'alal yac sc'oponbelon ae, yac yich'bel jajch'el yip jbaq'uetal, jich la calbey: —Cajwal, c'oponawon, melel la acha'ac'bonix xan quip ya caiy —xoon.

²⁰ Ja' yu'un jich la yalbon: “¿Ya bal ana' bila swentail te tal quilate? Yu'un puersa me ya jcha'ac'bey xan guerra te jcanantaywanej ch'ul abat yu'un Persia. Te c'alal ya xlaj co'tan soc ta guerra, ya me xtal te jcanantaywanej ch'ul abat yu'un Grecia.

²¹ Yo'tic ya calbat awaiy te bila ts'ibubil ta slibroil te bila smelelile. Te guerra ya cac'bey jba soque, ja' nax ya scoltayon te Miguel, te jcanantaywanej ch'ul abat yu'un Israel.