Cantares 7 - Bible in Tzeltal de Oxchuc y Tenejapa

Winic:

¹ Mero buen t'ujbil awacan soc te atep, yantsil-nich'an ajwalil. Soc te seplejal te acube, pajal soc ch'alil oro te buen t'ujbil te pasbil ta sc'ab mach'a ay sp'ijil.

² Te amuxuc', pajal soc jun sepel vaso te banti spisil ora ay vino tey a. Te ach'ujt', pajal soc jbus trigo te joytaybil ta rosa-nichime.

³ Te achu', pajal soc cheb ja'mal chijetic, cheb chijetic c'oemic.

⁴ Te anuc', pajal soc balal ts'ajc' ch'albil ta marfil. Te asite, pajal soc cheb estanque yu'un ja' te ay ta lum Hesbón, te ay ta sts'eel yochibal Bat-rabim. Te ani', pajal soc balal ts'ajc' yu'un Líbano te jich ay bael ta stojol lum Damasco.

⁵ Te ajol te ay ta sba te abaq'uetale, pajal yilel soc wits Carmelo; púrpura hilera yilel te stsotsil ajole; jtul muc' ajwalil chucul c'oem ta sjalbenal.

⁶ Ja'at te mero mulanbilat cu'une, buen lequil antsat ya quil, buen t'ujbilat, buen c'ax t'ujbilat.

⁷ Te atec'lejal, pajal soc stec'lejal palma yilel. Te achu', pajal soc cha'chex sit palma.

⁸ Co'tanuc ya xmoon a te palmae, jich me ya cu'uninbey ta spisil te site. Te achu', pajal soc cha'chex sit ts'usub. Te sbujts' awe, pajal soc sbujts' manzana;

⁹ te yutil awe, pajal soc buen lequil vino te buen c'un nax soc bayal sbujts' ya caiy ta que.

Ants:

¹⁰ Jo'on yu'unon te mach'a bayal ya jmulane; te yip te yutsil yo'tane ya yic'on ta stojol.

¹¹ La' me, te ja'at te bayal ya jmulanate, ya xbootic ta aquiltic. Ya xc'ax ajc'ubal cu'untic ta yolil nichimaltic yu'un alheña.

¹² Ta buen sab me ya xbootic ta ts'usubiltic, ya xba quiltic teme ayix spul, teme yaquix ta t'omel te sniche, soc teme nichinemix te granadoetique. Tey me ya cac' jba ta ac'ab a.

¹³ Te mandrágoraetic ya spuc bael sbujts'. Ta sti'il jnatic, ay spisil ta jchajp sit te'etic te lequic ta lo'ele; ay taquinix soc ay jtulel to nax, te parte cac'ojix yu'un ja'at awu'un te buen mulanbilat cu'une.