Cantares 6 - Bible in Tzeltal de Oxchuc y Tenejapa

Coro:

¹ Ja'at te c'axem at'ujbilale, ¿banti bajt' te mach'a bayal amulaneje? ¿Banti wan baem? Ya me joinat bael ta sleel.

Ants:

² Te mach'a bayal ya jmulane, baem ta nichimaltic yu'un, ja' te nichimaltic ay sperfumeil. Baem ta yaq'uel swe'el chijetic yu'un, soc baem ta stulel rosa-nichimetic.

³ Ja' yu'unon soc ja' cu'un, te mach'a bayal ya jmulane, ya yac' ta we'el te chijetic yu'un ta yolil rosa-nichimetic.

Yo'ebal c'ayoj Winic:

⁴ Ja'at cu'unat, bayal jmulanejat, buen t'ujbilat, soc bayal awutsilal. Pajal at'ujbilal soc lum Tirsa, soc lum Jerusalén; ya stsalon jichuc jchajp soldadoetic ayic ta marcha.

⁵ Ma x'awilonix yan buelta, melel la yu'uninbonix co'tan ya caiy te asite. Te stsotsil ajole, pajal soc ch'in tentsunetic te ya xtajinic ta animal ta witstiquil Galaad.

⁶ Te sbaquel awe, spisil buen lec ayic, pajal soc jchajp chijetic te loq'uelic to ta atimale, te chapalic yu'un ya yich'ic set'beyel stsotsilique.

⁷ Te jujun mejch' awelaw, pajal soc xet'bil granada te macal ta areboso.

⁸ Oxwinic (60) te antsil-ajwaliletic, chanwinic (80) te yantic antsetique, soc mero bayalic te ach'ixetique,

⁹ pero te ch'in ach'ix stsumut cu'un, jun nax stuquel; ma'yuc yan ach'ix mero bayal sc'oplal yu'un sme' te alatayot yu'une. C'alal ilot yu'un te ach'ixetique, albot yutsil sc'oplal yu'unic; te antsil-ajwaliletic soc te yantic antsetic albot yutsil sc'oplal yu'unic.

Coro:

¹⁰ ¿Mach'a a te ya xchicnaj ta ilel te ja' pajal soc te c'aal ya xchicnaj ta jujun sabe? Buen t'ujbil jichuc u, bayal xojobil jichuc c'aal, ya stsalawan jichuc jchajp soldadoetic te ayic ta marcha.

Ants:

¹¹ C'oon ta pimil ja'mal q'uinal nogal, yu'un ya quilbey te st'ujbil yaxal ta uc'um; co'tan xquil te spul te ts'usubile, soc te snich te granadoetique.

¹² Ta patil ma ba la caiy bila c'ot ta pasel, ja' to te c'alal la quil ayonix ta carreta ta sts'eel te t'ujbil ajwalil cu'une.

Coro:

¹³ Sujt'an tel, sulamita, sujt'an tel; sujt'an tel, ya jc'an te ya quilticate. ¿Bi ya ac'an ya awilbeyic te sulamita? Ya jc'antic ya x'ajc'otajat, jich te bit'il ta campamentoetique.