Cantares 5 - Bible in Tzeltal de Oxchuc y Tenejapa

Winic:

¹ Ochonix tel ta nichimaltic cu'un, ja'at jch'ielat, te quinamate. La quich'ix te mirra cu'un soc te perfumeetic cu'une, la jpasix prueba te chab cu'une, la cuch'ix te vino soc te leche cu'une. Ja'ex te jun co'tantique, we'anic soc uch'aic, uch'aic spisil te bi ya ac'anique.

Coro: Xchanebal c'ayoj Ants:

² Wayon, pero ma ba way stuquel te co'tane. La caiy yac ta ic'aw ta ti'nail te mach'a bayal mulanbil cu'une: “Jama te ti'nail, ja'at te bayal ya jmulanate; jch'ielat, mero ach'ix stsumutat cu'un. Te jole ach'em ta ts'ujul. Te ts'ujul ta ajc'ubale, yac ta oc ta stsotsil jol”, xi' la caiy.

³ “La jloq'uesix te jc'u'-jpaq'ue; ¿ya to bal jcha'lap xan? La jpoquix te cacane; ¿ya to bal xc'ot xan ta ts'ubil lum?”, xoon yu'un.

⁴ Te mach'a bayal ya jmulane, la yac' ochel sc'ab ta banti jutul te ti'nail yu'un sjamjibale. Ja' la stabon c'oel co'tan.

^5-6 Jich jajch'on ta sjamel te na yu'un te mach'a bayal jmulaneje. Ta jc'ab soc yalatac jc'ab xt'ulajan coel mirra ta sba sjamjibal ti'nail. C'alal la caiy c'opoj, ya xlajonix la caiy yu'un. La jambey na te mach'a bayal ya jmulane, pero ma ba tey ayix a. La jle, pero ma'yuc banti chican, la cawtay, pero ma ba la sjac'bon.

⁷ La staonic te jcananetic, ja' te ya sjoyintayic ta ilel te lume; la smajonic, la yejch'entesonic; ja' te mach'atic ya scanantayic te yochibal te lume, ta spisil yipic la stuch'bonic loq'uel te jreboso.

⁸ Antsetic ta Jerusalén, teme la atabonic te mach'a bayal ya jmulane, wocoluc albeyaic te ya xlajonix yu'un te smulanele.

Coro:

⁹ ¿Bi swentail awu'un te ma pajaluc soc yantic te mach'a mero bayal mulanbil awu'une, ja'at te c'axem at'ujbilale? ¿Bi swentail awu'un te mach'a bayal mulanbil awu'un te ya ac'an te ay bila ya caltic ta jamal ta atojol yu'une?

Ants:

¹⁰ Te mach'a bayal ya jmulane, mero t'ujbil winic stuquel; manchuc me ayuc jmil ta jtul winiquetic pero ma xch'ay ta jsit stuquel.

¹¹ Puro oro yilel te sjole; morots'tic te stsotsil sjole, soc buen ijc' jichuc yijc'al joj.

¹² Te sit, pajal soc cheb stsumutetic yatinej leche te xcuxoj yo'tanic ta sti'il pamal ja'.

¹³ Te jujun mejch' yelaw, jujun muc'ul nichimaltic c'oem te buen bujts'an yic' snichimale. Te ye, pajal soc rosa-nichim, te banti ya xt'ulaj mirra.

¹⁴ Te jujun sc'abe, pajal soc xotbil oro ch'albil ta t'ujbil c'anal topacioetic. Ta scojt'ol, juxbil marfil yilel, yich'oj ch'alil ta yaxal zafiro.

¹⁵ Ta xchebal te yacane, pajal soc cheb oyetic pasbil ta mármol yilel, teq'uel jajch'el ta puro oro. Te stec'lejale, ma'yuc bila pajal soc, jich c'oem te bit'il cedro ta Líbano.

¹⁶ Te ye, mero buen bujts'an xchi'il. Ta scojt'ol stec'lejal mero t'ujbil soc mulantic sba ta ilel. Antsetic ta Jerusalén, jich me ay stuquel te mach'a mero mulanbil cu'une, jich ay te mach'a mero smulanej te co'tane.