Cantares 4 - Bible in Tzeltal de Oxchuc y Tenejapa

Winic:

¹ Mero buen t'ujbilat, ja'at te bayal ya jmulanate. Mero buen t'ujbilat ya quil. Te asite, pajal soc cheb stsumutetic te ja' nac'bil yu'un te areboso; te stsotsil ajole, pajal soc ch'in tentsunetic te ya xtajinic ta animal ta witstiquil Galaad.

² Te sbaquel awe, spisil buen lec ayic, pajalic soc jchajp chijetic te loq'uel to tel ta atimal, te chapalic yu'un ya yich' set'beyel stsotsilique.

³ Te sti'il awe, buen tsaj, pajal soc tsajal hilera; soc buen t'ujbil ta aiyel ta jchiquin te ac'ope. Te jujun mejch' awelaw pajal soc xet'bil granada te macal ta areboso.

⁴ Te anuc', pajal soc balal ts'ajc' yu'un David te yich'oj pasel yu'un yawil at'ejibal yu'un guerra; jmil majq'uilaletic ya yich' jojc'anel a, smajq'uil soldadoetic te ma xiwic ta guerra.

⁵ Te achu', pajal soc cheb ja'mal chijetic, cheb chijetic c'oemic te yacalic ta we'el ta yolil rosa-nichimetique.

⁶ C'alal ya sacub te q'uinale asta ja' to teme ya x'an bael te ijc' q'uinale, ya me xboon ta wits yu'un mirra, tey me ayon ta ch'in wits yu'un pom.

⁷ Mero c'ax t'ujbilat ya quil, ja'at nax mulanbilat cu'un, mero t'ujbilat ta awacan c'alal ta ajol. Ma'yuc bila ma t'ujbiluc awu'un.

⁸ Joinawon coel ta Líbano, ja'at te mero ya jmulanate; joinawon coel ta Líbano. Mulana te muc'ul spamlej c'alal ta sba te wits Amana, c'alal ta sba wits Senir soc wits Hermón, c'alal ta xch'en te león-chojetic, c'alal ta wits yu'un leopardo-chojetic.

⁹ La awu'uninbon te co'tane, ja'at te jch'ielat toe, te quinamate; la awu'uninbon co'tan ta scaj nax te la awilon la quile, ta scaj nax jlijc' awual.

¹⁰ C'ax bujts'an ta aiyel te bujts'iyel awu'un, ja'at te jch'ielat toe, te quinamate. Te bujts'iyel awu'une c'axem jich sbujts' a te bit'il vino; te perfume awu'une, c'axem jich sbujts' a te bit'il yantic bitic bujts'an yiq'ue.

¹¹ Ja'at te quinamate, ta sti'il awe ya xloc' tel chab yaiyel; chab soc leche ay ta ye'tal awac'. Te sbujts' yic' te ac'u'-apaq'ue, pajal soc sbujts' yic' Líbano.

¹² Ja'at, jch'ielat te quinamate, macbil nichimaltic c'oemat, macbil sloq'uibja' c'oemat, sloq'uibja' yich'oj selloil yaiyel;

¹³ nichimaltic te banti ay granado te buen bujts'an site; nichimaltic te banti ay alheña-nichim,

¹⁴ te banti ay nardo soc azafrán, jalal bujts'an yic' soc canela, soc spisil te'etic yu'un pom, mirra soc áloe; spisil bitic mero t'ujbil sbujts' yic'.

¹⁵ Te sloq'uibja' yu'un nichimaltique, jun pozo te banti ya xloc' tel ja'e, ja' te ja' yac ta coel tel ta Líbano.

¹⁶ Ic' ta stojol norte, jajch'an. Ic' ta stojol sur, la' li'to. Jujch'iya tel abaic ta stojol nichimaltic cu'un, pucbeyaic bael yic' te perfume yu'une. La' me talan ta nichimaltic awu'un, ja'at te buen mulanbilat cu'une; lo'beya me te sit te buen bujts'ane.