Cantares 3 - Bible in Tzeltal de Oxchuc y Tenejapa

¹ Ta jujun ajc'ubal la jle ta jwayib te mach'a jmulanej ta co'tane. La jle, pero ma la jta.

² Jich ora jajch'on, la coclin ta spamal te lume, ja' yacon ta sleel te mach'a jmulaneje. La jle ta calleetic soc ta plazaetic; la jle, pero ma ba la jta.

³ La jojc'obey te jcananetique, te ya sjoyintayic te lume, jich la calbey: “¿Ma bal ayuc la awilbonic te mach'a jmulanej ta co'tane?” la cut.

⁴ Quijq'uitaybelic to a, la jta te mach'a jmulanej ta co'tane. La jtsacbey ta sc'ab, la quic' bael c'alal ta sna jme'.

Winic:

⁵ Antsetic ta Jerusalén, albonic caiy ta jamal ta swenta te ja'mal chijetic soc ta swenta te tsajal chijetic ta witstiquil, te ma ba ya atijbeyic swayel te mach'a bayal jmulaneje. Ijq'uitayawotic, ac'a wayucotic ja' to c'alal ya jc'an xjajch'otic.

Yoxebal c'ayoj Coro:

⁶ ¿Bila a te yac ta talel ya quiltic ta jochol taquin q'uinale, yac ta talel ta yolil ch'ail, ta yolil xch'ailel mirra soc xch'ailel pom, soc spisil ta jchajp te perfumeetique?

⁷ Ja' te banti q'uechbil ta beel te Salomón. Joytaybil tel yu'un oxwinic soldadoetic, ja' te buen tulan soldadoetic yu'un Israel.

⁸ Ta spisilic ya sna'ic stuuntesel puñal, buen snopojic yaq'uel guerra; ta juju-jtul chucul spuñal ta xch'ujt'ic, swenta yu'un ya scanantayic ta ajc'ubal te Salomón.

⁹ Te muc' ajwalil Salomón la yaq'uix ta pasel sq'uechjibal, buen fino te'etic talem ta Líbano te ste'el yu'une.

¹⁰ Te yoyal snaule, yich'oj pasel ta plata; te smajq'uil spat yich'oj pasel ta oro; te nactijibal yu'une, potsbil ta púrpura pac'; te yutile, ch'albil yu'un antsetic ta Jerusalén soc yutsil yo'tanic.

¹¹ Antsetic ta Sión, loc'anic tel ta yilel te muc' ajwalil Salomón. Yich'oj ta sjol scorona, ja' te pasbot yu'un sme' te ya xtuun yu'un te c'alal ya xnujbine, te ja' jun c'aal bayal yutsil ya yaiy te jayeb c'aal ya xcuxine.