Cantares 2 - Bible in Tzeltal de Oxchuc y Tenejapa

Ants:

¹ Jo'on snichimalon Sarón, jo'on rosa-nichimalon stenlej xatal q'uinal.

Winic:

² Te ants bayal ya jmulane, c'ax jich st'ujbilal a te bit'il yantique, pajal soc rosa-nichim ta yolil ch'ixtiquil.

Ants:

³ Te winic bayal ya jmulane, c'ax jich st'ujbilal a te bit'il yantique, pajal soc ste'el manzana ya quil ta yolil ja'mal q'uinal. Mero bayal yutsil co'tan ya jnajc'an jba ta yaxinal. Buen chi' ya caiy te site.

⁴ Jo'on la yic'on bael ta na ta banti ay we'eliletic, te sit la yilon a, swenta mulanel la caiy ta co'tan.

⁵ Ac'bon xan yich' yip co'tan, ac'bon xan yip co'tan soc pejchanbil taquin ts'usubetic, mac'linawon ta manzana, melel te jo'one, ya xlajonix ya caiy yu'un te ya jmulanate.

⁶ Meybon jol ta xq'uexen ac'ab, Petawon a te swa'el ac'abe.

Winic:

⁷ Antsetic ta Jerusalén, albonic caiy ta jamal ta swenta te ja'mal chijetic, soc ta swenta te tsajal chijetic ta witstiquile, te ma ba ya atijbeyic swayel te mach'a bayal jmulaneje. Ijq'uitayawotic, ac'a wayucotic ja' to c'alal ya jc'an xjajch'otic.

Xchebal c'ayoj Ants:

⁸ Talix te mach'a bayal jmulaneje. Chicanix ya caiy te sc'ope. Talix ta wilawetel ta baba witstiquil, Talix ta wilawetel ta sba tseletic.

⁹ Te mach'a bayal ya jmulane, jich c'oem ya caiy te bit'il ja'mal chij, soc jich c'oem te bit'il ch'in chije. Li' ayix to, ayix ta spat ti'nail, chicnajix tel ta ventana, yaquix sju'sitaybelon ta bay jamal.

¹⁰ Te mach'a ya jmulane jich la yalbon: “Ja'at te bayal ya jmulanate, jajch'an, ya xbootiquix, ja'at te jc'anojate.

¹¹ Ila awil, c'axix te yorail invierno, ja' la sjoinix bael te ja'ale.

¹² T'omenix nichimetic ta aquiltic, c'otix yorail te c'ayoje, ya xchicnajix ta aiyel ta jlumaltic te yutsil sc'unil sc'ayoj te puliwoquetique.

¹³ Te higuera ayix sit, te jts'usubiltic ya xpujq'uix bael sbujts'. “Jajch'an, ja'at te bayal ya jmulanate; beenan, ya xbootiquix, ja'at te jc'anojate.

¹⁴ “Stsumut cu'un, te ya anac' aba ta muc'ul tontiquile, ta toyol chujc'ul nac'jibaletic, ac'bon quilbat asit-awelaw, ac'bon caiybat ac'op. Mero t'ujbil ya caiy te ya quilate. Ay sbujts' ta aiyel te ac'ope”, xi' ta jtojol.

Xchebalic:

¹⁵ Tsaca te waxetic, ja'ic te ch'in waxetic, te ya yixlanbotic te ts'usubil cu'untique, ja' te jts'usubiltic yac ta niche.

Ants:

¹⁶ Te mach'a mulanbil cu'une, jo'on cu'un, soc ja' yu'unon. Ja' stuquel ya me yac' ta we'el ta spisil te chijetic yu'une, ya me yac' ta yolil rosa-nichimaltic.

¹⁷ Ma to ba staoj te sc'aalelale, soc te ya x'an bael te axinale, ja'at te bayal c'uxat ta co'tane, la', sujt'an tel. Jich me xtalat te bit'il ja'mal chije, jich me xtalat te bit'il ch'in chij ta sba te chujc'ul witstiquile.