Apocalipsis 14 - Bible in Tzeltal de Oxchuc y Tenejapa

Te waxaclajunwinic ta jbajc' (144,000)

¹ Patil ay yan la quil. Ja' te Alalchij teq'uel ta bay sba te wits Sione. Sjoinej tey a te waxaclajunwinic ta jbajc' (144,000) ta jtul te ts'ibubil ta stibaic sbiil te Alalchije soc sbiil te State.

² Soc la caiy stojol ay bila c'opoj ta bay ch'ulchan te pajal sc'op soc te snojel ja'etique soc sc'op te tulan chawuque. Jich sc'op la caiy te bit'il ay tsobol mach'atic yac ta stijel te yarpaique.

³ Yacalic ta sc'ajintayel ach' c'ayoj ta stojol te muc'ul nactijibale soc ta stojol te chancojt' bitic cuxajtique soc ta stojol te mamaletique. Jtul ma'yuc mach'a ya xju' yu'un snopel te c'ayoje, ja' nax te waxaclajunwinic ta jbajc' (144,000) ta jtul te coltaybilic loq'uel ta yolil te ants-winiquetique.

⁴ Ja'ic te mach'atic ma ba la sboltes sbaic soc te antsetique, melel ju' yu'unic te ma ba nujbinique. Ja'ic nax stuquelic te ya stsac'linic te Alalchije, chican te banti ya xbajt'e, soc ja'ic te coltaybilic loq'uel ta yolil te ants-winiquetique, swenta yu'un ja'ic sba sit c'oem ta stojol te Diose soc te Alalchije.

⁵ Xujt' ma'yuc banti la yalic lotil c'op ta yeic. Xujt' ma'yuc smulic ta stojol te smuc'ul nactijib te Diose.

Te bila la yalic te oxtul ch'ul abatetique

⁶ Soc la quil yan ch'ul abat yac ta wilel ta sjamalul te ch'ulchane, yich'oj te lec yach'il c'op swenta scolelic te mach'atic ainemic ta balumilal te ya yalbey yaiyique. Ja' spisil ta jchajp te nacionetic te yanyantic sts'umbalique soc te yanyantic sc'opique soc te yanyan lum ayique.

⁷ Tulan jich yac ta yalel ta c'op: “Xi'aic me te Diose. Albeyaic yutsil sc'oplal, yu'un c'otix yorail te ich'el ta c'ope. Lajina me abaic ta stojol te Mach'a la spas ch'ulchan soc te balumilale soc te mare soc te sloc'ja'etique”, xi' la caiy.

⁸ Tsac'linot yu'un yan ch'ul abat te jich la yale: “Jc'axel jinix te muc'ul lum Babilonia te la syacubtes spisil ta jchajp nacionetic a te vino yu'une, ja' bi ja' te la yac'bey snopic te smulweje”, xi' ta aw la caiy.

⁹ Tsac'linot yu'un yan ch'ul abat te ja' yoxebalix a. Jich la yal ta aw: “Te mach'atic ya slajin sbaic ta stojol te muc'ul chambalam te xi'bantic sbae soc ta stojol te sloc'ombae soc te ya yich'beyic smarca ta stibaique o ta sc'abique,

¹⁰ ya me x'ac'bot yuch'ic te vino, ja' te yilimba Dios te xujt' ma'yuc scape, te nojel yu'un a te vasoe. Ya me x'ac'bot c'axuc bayal swocolic ta c'ajc' te yac ta tilel ta azufre ta sitic te ch'ul abatetic yu'un te Diose soc ta sit te Alalchije.

¹¹ Te xch'ailel te swocolique, xtomomet nax ya xmo sbajt'el q'uinal. C'aal ajc'ubal ma'yuc banti ya yich'ic lewa yu'un castigo spisil mach'atic te ya slajin sbaic ta stojol te muc'ul chambalam te xi'bantic sba soc ta stojol te sloc'ombae soc te yich'ojbeyic smarca ta stibaique o ta sc'abique”, xi' ta aw la caiy.

¹² Jich yu'un te mach'atic ch'ul lum yu'un Dios te yat'elinejic xch'uunel te smandale soc te ay xch'uunjel yo'tanic ta stojol te Jesuse, ts'ijq'uem yu'unic te swocolique.

¹³ Soc la caiy stojol te ay mach'a c'opoj tel ta ch'ulchane. Jich la yalbon: —Ts'ibuya ta jun in to: “Bin nax me yutsilic ta ora to soc ta sbajt'el q'uinal te animaetic te xch'uunejic Cajwaltic te lajique”, xi' me —la yuton. La yal te Espiritue: —Melel nix a. Ya me yich'ic lewa yu'un te yat'elique, soc ya me sjoinic tey a te yat'elique —xi'.

Ya yich' c'ajel sit te balumilale

¹⁴ Ay yan la quil: Ja' te saquil tocale, soc ay mach'a nacal ta sba te ja' pajal soc te Nich'anile. Ay scorona ta sjol te pasbil ta oro, soc ay ta sc'ab te os te ay yee.

¹⁵ Soc ay yan ch'ul abat te loc' tel ta templo. Tulan la yawtay te mach'a nacal ta sba te tocale: “Ochan ta at'el soc te os awich'oje. Tsobeya sit te c'ajoj ay ta balumilale, melel la staix yorail. Taquinix te site”, la yut.

¹⁶ Jich och ta c'ajoj soc te os ta balumilal te mach'a nacal la quil ta sba te tocale. La yaiy c'ajoj ta balumilal.

¹⁷ Soc ay yan ch'ul abat te loc' tel ta templo te ay ta ch'ulchane. Ay ta sc'ab uuc te os te ay yee.

¹⁸ Soc ay yan ch'ul abat te loc' tel ta bay te xchic'jibal milbil smajt'an te Diose te ay yat'el ta swentainel te c'ajq'ue. Tulan la yawtay te ch'ul abat te yich'oj ta sc'ab te os te ay yee. Jich la yalbey: “Ochan ta at'el soc te os awich'oj te ay yee. Tsobeya sit ta chojolchoj te ts'usub te ay ta balumilale, yu'un tac'ajemix te site”, la yut.

¹⁹ Jich te ch'ul abate och ta at'el ta balumilal soc te os te ay ta sc'abe. La stsobey sit te ts'usub te ay ta balumilale. La yac' ochel ta bay spits'jibal yilimba te Diose.

²⁰ La yich' teq'uel ta pits'el ta bay spat te lume, ta bay te spits'jibale loc' tel ch'ich' tey a. Te stoylejal pamaj ta lum te ch'ich'e, jich bit'il ta bay stoylejal sfrenoil ye te caballoe, soc jo'lajunwinic (300) kilómetro te spamlejale.