Amós 6 - Bible in Tzeltal de Oxchuc y Tenejapa

Slajinel Israel

¹ Ya me yil swocolic te mach'atic ayic ta cuxinel ta Sión. Ya me yil swocolic te mach'atic ja' smuc'ulinej yo'tanic te cuxinel ta Samaria, ja' te mach'atic jtsobwanejetic yu'un te nación te muc' sc'oplalique, soc te mach'atic te israeletic ya xbajt'ic ta stojolique.

² Baan ilawilic te Calne, ya me xc'axat ta muc'ul Hamat, soc coanic bael ta yilel Gat yu'un te filisteoetique. ¿Yu'un bal ja' lequex xan yu'unic a te nacionetique? ¿Te alumalic, ja' bal lec xan stuquel a te slumalique?

³ Te ja'exe ma x'ac'anic te ya sta yorail te bila amene; ja'uc me to, ja' ya amulanic te ya xmandalajic te j'uts'inwanejetique.

⁴ Ya ats'ean abaic ta t'ujbil nactijibal te ch'albil ta marfil, tey ya amejts'an abaic ta we'el yu'un q'uin; ya awe'elinic alal chijetic soc jujp'en alal wacaxetic.

⁵ Ya atijic arpa te ya smulan awo'tanic; ya ac'ainbeyic yat'el David,ya anopic te bit'il ya sc'an pasel yantic músicaetic.

⁶ Ta muc'ul copaetic ya awuch'ic a te vino, ya atuuntesic mero lequil perfumeetic. Ja' ma'yuc sc'oplal ta awo'tan te quechel ta jinel te lume.

⁷ Ja'ex me neel ya x'ic'otex loq'uel ta alumalic, soc jich ya xlaj ta jc'axel te q'uinetic awu'une.

⁸ Te Cajwaltic ja' yaloj ta jamal stuquel; te Cajwaltic, te Dios Spisil ya xju' yu'un, tulan ya yal: —Ya quilay te bit'il ya stoy sba te sts'umbal Jacob; ma jmulan te muc'ul naetic yu'unique. Te lume ya cac'bey ta sc'ab scontro, soc spisil te bitic ay yu'un tey ae —xi'.

⁹ Jich yu'un, teme ya xjil lajuntul yajwal te nae, ta slajuntulul ya me xlajic.

¹⁰ Mero muc' me ta jyalel te xiwele, melel teme ay mach'a ya sjachbey sbaq'uetal yermano te ya sloq'uesbey bael ta snae, ya me yalbey te yan yermano te ay ta yutile: “¿Ay bal mach'a yantic ajoinej?” ya me yut. “Ma'yuc”, xi' me ta yalel te yane. Soc jich me ya yal te mach'a neel c'opoje: “Ch'aban, ma me x'atabey ta alel sbiil te Cajwaltique”, xi' me.

¹¹ Melel te Cajwaltic ya me yal mandal ta yac'beyel castigo te muc'ul naetic soc te ch'in naetique, spisilic me jinbilic ya xjilic ta jc'axel.

¹² ¿Ya bal xju' x'animajic ta tontiquil te caballoetique? ¿Ya bal xju' ta joq'uel jichuc lum te mar? Melel te ja'ex c'atp'ujem awu'unic ta veneno te chajbanele; te sit ya yac' te chajbanele, ja' te mel-o'tane.

¹³ Te ja'ex bin nax awo'tanic yilel, ma meleluc. Soc jich ya awalic: “Ta swenta quiptic nix jtuqueltic la jtatic te bit'il ya xju' cu'untic spisil”, xaex.

¹⁴ Ja'uc me to, p'ijanic ta lec, israeletic. Te Cajwaltic, te Dios Spisil ya xju' yu'une, tulan ya yal: —Jo'on ya jajch'es jun nación ta atojolic, ya me yac'bat uts'inel ta jc'axel c'alal ta bay sti'il norte ja' to ta sti'il sur —xi'.