Amós 3 - Bible in Tzeltal de Oxchuc y Tenejapa

Castigo yu'un Israel

¹ Ja'ex israeletic, aiya awaiyic stojol te bila ya yal te Cajwaltic te la sloq'uesex tel ta Egipto:

² —Ja'ex nax atuquelic te la jtsaex ta yolilic spisil te lumetic ta balumilal. Jich yu'un ya cac'beyex castigo yu'un spisil te bila amen apasojique —xi'.

³ Teme ay cheb te ya sjoin sbaic ta beele, yu'un pajal yo'tan sbaic.

⁴ Teme ya x'awun león-choj ta ja'mal, yu'un ay bila la stsaquix abi. Teme x'awet nax te yal león-choj ta nailch'en, yu'un ay bila stsacoj.

⁵ Teme ya xch'ay coel tel mut te yac ta wilele, yu'un ay pejts' tey a. Teme ya xt'im moel te pejts' ta lume, yu'un nix ay bila la stsaquix a.

⁶ Teme ya xc'opoj oq'ues ta yutil lum, te ants-winiquetic ya sjachic ch'inlajanel ta c'op yu'un. Teme ay bila amen ya xc'ot ta pasel ta lum, yu'un ja' la sticun tel te Cajwaltique.

⁷ Ma'yuc bila ya spas Cajwaltic teme ma neeluc ya yac'bey sna'ic te j'alwanejetic yu'une.

⁸ ¿Ay bal mach'a ma xnijc' yo'tan yu'un xiwel, teme awun te león-choje? ¿Ay bal mach'a ma xc'opoj ta j'alwanej teme la yal mandal te Cajwaltique?

Ya yich' lajinel Samaria

⁹ Te ja'exe albeya yaiyic tey ta bay muc'ul naetic yu'un te lum Asdod soc ta bay muc'ul naetic yu'un Egipto, jich me ya awalbey yaiyic: —La'ic ta witstiquil yu'un Samaria; ilawilic te bila soquemic tey a soc te uts'inel ay swocolic yu'une —xaex me.

¹⁰ Te Cajwaltic ya yal: —Ma sna'ic te toj ya x'at'ejique; ya scanantayic ta muc'ul naetic yu'unic te bila la yelc'anic tel ta swenta uts'inwanej —xi'.

¹¹ Jich yu'un jich ya yal te Cajwaltic Diose: —Te acontrotac ya me xtal sjoytayic te alumale, ya me swuybat coel te tulanil ts'ajq'uetic awu'un soc ya me spojic bael sbiluquil te muc'ul palacio awu'une —xi'.

¹² Jich ya yal te Cajwaltique: —Jich bit'il jcanan-chij ya spojbey loq'uel ta ye león-choj cheb yacan te xchije, o xejt' xan te xchiquine, jich me ya xcol xan loq'uel te israeletic te nainemic ta Samaria, ja'ic te mach'atic ya xwayic ta t'ujbil wayibaletic te la staic ta Damasco —xi' sc'oplalic.

¹³ Jich yaloj te Ajwalil, te Dios Spisil ya xju' yu'une, tulan ya yal: —Aiya awaiyic stojol te ja'exe, soc alaic testigo-c'op ta scontroinel te sts'umbal Jacob.

¹⁴ Melel te bi c'aalil ya cac'bey castigo yu'un smul te Israele, ya jin te scajtijib majt'anil ta Betel; te xulubiletic yu'un scajtijib majt'anil ya me yich' c'oquel loq'uel soc ya me xch'ay coel ta lum.

¹⁵ Ya me jin te naetic ta bay ya xnainic ta yorail invierno soc ta bay ya xnainic ta yorail verano; ya me cac'bey sta slajibal te naetic ch'albilic ta marfil, soc jc'axel ya jwuy te muc'ul naetique —xi' ta tulan te Cajwaltique.