2 Samuel 9 - Bible in Tzeltal de Oxchuc y Tenejapa

David la sna'bey yo'bolil sba Mefi-boset

¹ Te David la sta yorail jich la sjojc'o: —¿Ay to bal cuxul jilel te mach'atic ay yu'un te Saúl, te ya xju' ya jc'uxtay ta swenta sna'ojibal te Jonatán? —xi'.

² Ay jtul abat yu'un te mach'atic ay yu'un te Saúl, Siba sbiil. La sticunic ta iq'uel swenta yu'un ya me stejc'an sba ta stojol David. Te c'alal c'ot ta stojol te muc' ajwalil te Siba, jojc'obot yu'un: —¿Ja'at bal Sibaat? —xi'. La sjac' te Siba: —Jo'on te awabaton, cajwal —xi'.

³ Te muc' ajwalil la sjojc'obey: —¿Ay to bal jilem te mach'atic ay yu'un te Saúl, te ya xju' ay bi ya cac'bey ta swenta te Diose? —xi'. Te Siba la sjac': —Ay to jilem jtul snich'an Jonatán te boloben xchebal yacane —xi'.

⁴ —¿Banti ay? —xi' te muc' ajwalile. La sjac' te Siba: —Ay ta Lodebar, ta sna Maquir, snich'an Amiel —xi'.

⁵ Te muc' ajwalil David la yal mandal te ya xbajt' ta iq'uel tel tey ta banti aye.

⁶ C'alal jul ta stojol David te Mefi-boset, snich'an Jonatán, smam Saúl, la stinan sba swenta seña yich'el ta muc'. —Mefi-boset —xi' te David. La sjac' te Mefi-boset: —Jo'on ayon ta awenta, cajwal —xi'.

⁷ Te David jich la yal: —Ma me xiwat, melel ya me jc'uxtayat swenta sna'ojibal te atat Jonatán. Ya me cac' sujt'uc ta awenta spisil te sq'uinal te amam Saúl, soc spisil me ora ya xwe'at ta jmesa —xi'.

⁸ Pero te Mefi-boset la stinan sba, jich la yal: —¿Bi yu'un te ayon ta na'el awu'un te abaton awu'une, cajwal? Melel pajalon soc lajem ts'i' —xi'.

⁹ Pero te muc' ajwalil la yic' tel te Siba, te abat yu'un Saúl ta neelal, jich la yalbey: —La cac'beyix te smam te anima awajwal ta spisil te bitic yu'un c'ax ta q'uinal, soc te bitic yu'un a te mach'atic ay yu'une.

¹⁰ Ja' yu'un ja'at soc te anich'nab soc te abatetic awu'une ya me apasbeyic yat'el tey ta sq'uinale. Ya me atsobic ochel ta snail te bitic ya xloc' tey a, swenta yu'un jich me ay swe'el te mach'atic ay yu'un te awajwale, manchuc me te Mefi-boset, te smam te awajwale, ya xwe' spisil ora ta jmesa stuquel —xi' te David. Te Siba ay jo'lajuntul snich'nab soc jtab ta jtul abatetic yu'un.

¹¹ La sjac'bey te sc'op te muc' ajwalile: —Spisil te bi la awalixe, muc' ajwalil cu'un, ya me jpas, jo'on te abaton awu'une —xi'. Te Mefi-boset spisil ora we' ta smesa David, jich bit'il snich'an te muc' ajwalile.

¹² Soc ay jtul xch'in nich'an, Micaía sbiil. Spisil te mach'atic nainemic ta sna Siba, spisil ayic ta abatinel yu'un Mefi-boset.

¹³ Pero te Mefi-boset, te bit'il pejel ta scaj te boloben xchebal te yacane, nain spisil ora ta Jerusalén stuquel. Melel ya xwe' spisil ora ta smesa te muc' ajwalil.