2 Samuel 8 - Bible in Tzeltal de Oxchuc y Tenejapa

Bayal ta chajp guerra la yac' David

¹ Patil te David la stsal te filisteoetic, jc'axel la spejc'anbey yip, soc la spojbey yat'el ta jwentainwanej ta stojol te slumalique.

² Soc la stsal te moabetique. La yac'bey sliman sbaic ta lum, la sp'is ta lazo. Cha'p'is te mach'atic la yac' ta lajele, jp'is te mach'atic ma ba la yac' ta lajele, asta ja' to loc' ta p'isel spisilic. Jich jilic te moabetic, u'uninotic yu'un David, soc la stoj spatanic ta stojol.

³ Soc la stsal te Hadad-ezer, te snich'an Rehob, te muc' ajwalil ta Soba, te c'alal yac ta yu'uninel xan a te q'uinal ta muc'ja' Eufrates.

⁴ Te David la stsac jmil soc jo'lajunwinic xcha'bajc' (1,700) soldadoetic te cajajtic ta caballo, soc jtab ta jmil (20,000) soldadoetic yacalic ta beel yacanic. Soc xan la set'beyic xchial yacan spisil te caballoetic te ya snitic carretaetic yu'un guerra, ja' xanix la yijq'uitay te jaycojt' ya xtuun yu'unic, yu'un ya yac'beyic snit jo'winic carretaetic.

⁵ C'otic ta ora te siriaetic ta lum Damasco, c'o scoltayic te Hadad-ezer te muc' ajwalil yu'un Soba. Pero te David la stsal te siriaetic, la smil cheb xcha'winic ta jmil (22,000).

⁶ Ora la yac' soldadoetic ta scanantayel te jich yipal sq'uinal Siria te wentainbil yu'un Damasco. Te siriaetic u'uninot yu'un David, jil ta swentaic stojel spatanic ta stojol. Ta bayuc ya xbajt' te David, puersa ya x'ac'ot ta tsalaw yu'un te Cajwaltique.

⁷ Te David la yu'uninbey te smajq'uilic ta guerra te soldadoetic yu'un te Hadad-ezer te pasbil ta oro, la yich' bael ta Jerusalén.

⁸ Soc la yu'unin bayal bronce yu'un lum Beta soc yu'un lum Berotai, te swentainej a te Hadad-ezer.

⁹ Te Toi, muc' ajwalil yu'un Hamat, te c'alal la yaiy te la stsalix te David ta spisil te soldadoetic yu'un Hadad-ezer,

¹⁰ la sticun snich'an, ja' te Joram. La yac'bey yich' bael biluquetic pasbil ta plata, ta oro soc ta bronce, yu'un ya sticunbey spatjibal yo'tan. Soc la sticun ta alel te mero bin nax yo'tan ta stojol te muc' ajwalil David yu'un te la yac'bey guerra te Hadad-ezer soc te la stsale, melel te Toi spisil ora ac'bot guerra yu'un.

¹¹ Te David la yac'bey Cajwaltic spisil te biluquetique, jich nix te bit'il la yac'bey ta swenta spisil te oro soc plata te talemic ta bayuc nacionetic te la yu'unine,

¹² ja'ic te Edom, Moab, Amón, filisteoetic, soc te amalequetic, soc te la spojbey ta guerra Hadad-ezer te snich'an Rehob, te muc' ajwalil ta Soba.

¹³ Te David pujc' sc'oplal ta bayuc. Te c'alal sujt' tel te la stsal te edometic, la stsal xan waxaclajunmil (18,000) ta jtul edometic ta Spamlej Ats'am.

¹⁴ Ora la yac' ochel soldadoetic ta scanantayel ta spisil sq'uinal Edom; jich ta spisil te edometic ochic ta sc'ab David. Jich te David ac'bil ta tsalaw yu'un Cajwaltic ta bayuc ya xbajt'.

Jwentainwanejetic yu'un David

¹⁵ Te David och ta muc' ajwalil ta stojol spisil Israel. Buen toj at'ej, ja' la spas te bi mero stojil ta pasel ta stojol te lume.

¹⁶ Te general yu'un soldadoetic ja' te Joab, yal Sarvia. Te Josafat snich'an Ahilud, ja' secretario yu'un te muc' ajwalile.

¹⁷ Sadoc snich'an Ahitob soc Ahimelec snich'an Abiatar, ja' sacerdoteetic. Seraías ja' cronista.

¹⁸ Benaía snich'an Joiada ay ta swenta spasel ta mandal te cereteo-winiquetic soc te peleteo-winiquetic, te ja' jcanantaywanejetic yu'un te muc' ajwalile. Te snich'nab David ochic ta sacerdoteil.