2 Samuel 7 - Bible in Tzeltal de Oxchuc y Tenejapa

Dios la yal te ya yich' bendición David

¹ Te muc' ajwalil David chapal ayix ta sna, soc ac'botix lamajuc q'uinal yu'un te Cajwaltic ta stojol soc spisil te scontrotac ta sjoyobale.

² Ja' yu'un te David jich la yalbey te Natán, te j'alwanej yu'un Dios: —Ila awil, te jo'on nainemon ta na te pasbil ta cedro. Yan te cajón yu'un Dios ay to nax ta na pasbil ta pac' —xi'.

³ La sjac' te Natán: —Lec ay, pasa te bitic anopoj ya apase, ya me scoltayat te Cajwaltique —xi'.

⁴ Ja' nix ta yorail ta ajc'ubal a te Cajwaltic la sc'opon te Natán, jich la yalbey:

⁵ —Baan c'opona te cabat David, albeya te jo'on Ajwalilon te jich caloj: “Ma ja'ucat te ya apasbon templo te banti ya xnainone.

⁶ Ja' to nix te c'alal la jloq'ues tel ta Egipto te israeletic, c'alal ora, ma'yuc bi ora nainemon ta templo, melel ta bayuc nax nailpaq'uil beenemon a.

⁷ Ta spisil ora te la joinic ta beel, ma'yuc bi ora la calbey te mach'atic la cac'bey swentainbon te lum Israel cu'une te ya spasbon templo ta cedro”, uta me.

⁸ Soc albeya xan te cabat David, te jo'on Ajwalilon te Spisil ya xju' cu'une ya calbey: “Jo'on la jloq'uesat tel ta corral yu'un chijetic, jo'on la jloq'uesat ta smaquel chijetic, swenta yu'un ya x'ochat ta jwentainwanej yu'un te lum Israel cu'une.

⁹ Joinejat ta bayuc baat, la jlajinix te acontro loc' tel ta atojole. Bayal yutsil ac'oplal c'oat cu'un ta stojol spisil ants-winiquetic, jich te bit'il ay yu'un te winiquetic te bayal sc'oplalic ta balumilale.

¹⁰ Soc xan la jchajbanbeyix yawil yu'un te lum Israel cu'une. Tey la cac' ainuc a, swenta yu'un ya me xnainic ta mero yawilic, te banti ma'yuc mach'a ya xju' ya x'uts'inotic yu'une. Ni ya xju' ya x'ac'bot swocolic xan yu'un te mach'atic amen yat'elic, jich bit'il ta namey ta xjajch'ibal

¹¹ te c'alal la jtsa juecetic, yu'un ya swentainbon te lum Israel cu'une. Jo'on me ya cac'at ta libre ta sc'ab ta spisil te acontrotaque. Soc ya calbat te ya cac'bat patil alnich'anetic awu'une.

¹² Te c'alal ya sta c'oel slajibal te acuxlejal, te c'alal ya xlajate, jo'on me ya jnajc'an jtul ats'umbal te chapal ya xc'ot cu'un ta muc' ajwalile.

¹³ Ja' me ya spasbon jun templo; soc ya me cac'bey yat'el ta muc' ajwalil sbajt'el q'uinal.

¹⁴ Jo'on staton ya xc'oon, soc ja' cal-jnich'an ya xc'ot. Teme ay ya sta falta, ya me cac'bey castigo, ya me jmaj jich bit'il spisil tatiletic ya spasbey te snich'ane.

¹⁵ Pero ma ba ya jpijt'es jich bit'il la jpijt'es te Saule, te ja' la ajeloline.

¹⁶ Te ats'umbal soc te awat'el ta muc' ajwalil stalel ay cu'un sbajt'el q'uinal, jo'on ya jwentain. Soc nix te awat'el ta muc' ajwalil sbajt'el q'uinal chapal ya xjil”, uta me —xi' te Cajwaltique.

¹⁷ Te Natán la yalbey yaiy spisil te David, mero jich te bit'il la yil soc te la yaiye.

¹⁸ Ja' yu'un te muc' ajwalil David och bael swenta yu'un ya xc'opoj ta stojol te Cajwaltique. Jich la yal: —Cajwal, ¿mach'aon a jiche soc mach'a a te jts'umbale te jich c'oonix awu'une?

¹⁹ Cajwal, mero bayal sc'oplal c'oem awu'un ya caiy, melel la atabonix ta alel te bila ya xc'ot ta pasel ta patil ta stojol cajalcaj te jts'umbal te awabatone. Ma'yuc mach'a jich ya spas te bit'il ja'ate, Cajwal.

²⁰ ¿Bi yan ya xju' ya calbat, Cajwal? Melel ya ana'bon jba ta lec te awabatone.

²¹ Spisil te bila jelawen yutsil la apasixe, jich nix te bit'il la awal ta neelal to te jich la sc'an awo'tane, swenta yu'un jich me ya quil.

²² Ja' yu'un, Cajwal cu'un, mero muc'at, ma'yuc mach'a yan jich. Ma'yuc yan Dios ay, ja'at nax Diosat atuquel, jich nix te bit'il caiyojtique.

²³ Jich te jlumal Israel, te lum awu'une, ma'yuc yan lum pajal soc; melel ja' nax jun nación te cajal sc'oplal ta balumilale. Ja'at, Dios cu'un, la awac' ta libre te jlumal, swenta yu'un ja' lum awu'un ya xc'ot. La awac' chicnajuc yutsil sc'oplal ta stojol ants-winiquetic, swenta bit'il ay bila muc' sc'oplal la apas soc jelawen yutsil bi la apas ta jtojoltic. Te c'alal la aloq'ues tel ta Egipto te lum awu'une, ch'aybil c'ot awu'un te yantic nación soc te diosetic yu'unique.

²⁴ Melel jc'axel awalojix te ja' lum awu'un sbajt'el q'uinal te jlumal Israel, soc te ja'at Cajwal te Diosat cu'untique.

²⁵ “Ja' yu'un jiche, Cajwal Dios cu'un, stalel ac'a jiluc sbajt'el q'uinal te bi la awalix ta stojol te abat awu'un soc te jts'umbale. Ac'a c'otuc ta pasel te bila awaloje.

²⁶ Ac'a ich'otuc ta muc' ta sbajt'el q'uinal te abiile, soc yacuc yich' alel te ja' Dios yu'un Israel stuquel te Ajwalil te Spisil ya xju' yu'une. Te at'el ta muc' ajwalil te ya xc'ot ta swenta te jts'umbal, stalel me ya xjil ta swenta bit'il ya acoltay.

²⁷ Cajwal, te Spisil ya xju' awu'une, la awalbonix te stalel ya awac'bon ta muc' ajwalil te jts'umbale. Ja' yu'un te jo'one, manchuc me abaton awu'un, pero puersa ay me bi ya calbat wocol yu'un.

²⁸ Ja'at Cajwal, ja'at Diosat, te mero smelelil te ac'ope, la awalbonix te awabaton te bayal ya ac'uxtayone.

²⁹ Wocoluc jiche, ac'beya bendición te jts'umbal, swenta yu'un stalel me ya yich' canantayel awu'un sbajt'el q'uinal. Ja'at Cajwal, Dios cu'un, jich la awalix, soc ta swenta abendición te jts'umbal yich'oj me bendición ya xc'ot sbajt'el q'uinal —xi' te David.