2 Samuel 6 - Bible in Tzeltal de Oxchuc y Tenejapa

David la sc'an sc'ases te cajón yu'un Cajwaltic

¹ Te David la xcha'tsob xan ta spisilic te soldadoetic tsabilic ta Israel, lajuneb xcha'winic ta jmil (30,000) ta spisilic.

² Jajch' bael ta Baala ta Judá soc te soldadoetic sjoineje. La yich' jajch'el tey a te cajón yu'un Dios, ja' te banti ya yich' alel wocol te Cajwaltic te Spisil ya xju' yu'une, te nacal ta sba te querubinetique.

^3-4 La scajanic ta sba yach'il carreta te cajón yu'un Cajwaltic, la yich'ic jajch'el ta sna Abinadab te ay ta ch'in witse. Te Uza soc Ahio, snich'nab Abinadab, yacalic ta stojtesel bael te carreta te banti yich'ojic bael te cajón yu'un Dios. Te Ahio ja' neel ay ta bael ta stojol te cajone.

⁵ Jich te David soc ta spisil te israeletique yacalic ta c'ayoj soc yacalic ta beel ajc'ot ta spisil yipic ta stojol te Diose. Yacal yajc'otaybel sc'op arpaetic, salterioetic, panderoetic, castañuela soc platillo-taq'uinetic.

⁶ C'alal c'otic ta yawil Swuyojibal Trigo yu'un Nacón sbiil, te Uza la sjach sc'ab ta stojol te cajón yu'un Dios, yu'un ya c'an stsac, scaj te la sc'ojch'in yacan te wacaxetique.

⁷ Pero ma ba lec la yaiy te Cajwaltic te bila jelaw ta spasel te Uza. Tey lajinbot xcuxlejal ta ora a, yal ta lum ta xujc' te cajón yu'un Dios, toj lajel.

⁸ Te David bolob yo'tan yu'un te la slajinbey xcuxlejal Uza te Cajwaltique. Ja' yu'un te q'uinale: Perez-uzá la yac'bey sbiilin. Jich sbiilinej c'alal ora te lugare.

⁹ Jich ora te David bayal xiw yo'tan ta stojol te Cajwaltique. Jich la yal: —Yo'tic ma ba ya quich'ix bael te cajón yu'un Cajwaltic —xi'.

¹⁰ Melel ma la sc'anix la yich' bael ta Lum-yu'un-David te cajón yu'un Cajwaltic, ja' yu'un la yal mandal te ya yich' bael ta sna Obed-edom, jtul winic talem ta Gat.

¹¹ Te cajón yu'un Cajwaltic jalaj oxeb u ta sna Obed-edom. Te Cajwaltic la yac'bey bendición te Obed-edom soc spisil te mach'atic ay yu'une.

David la sc'ases ta Jerusalén te cajón yu'un Cajwaltic

¹² Albot yaiy te muc' ajwalil David te ac'botix bendición te mach'atic ay yu'un te Obed-edom soc spisil te bila ay yu'un ta swenta te cajón yu'un Cajwaltic. Ja' yu'un te David ba yich' tel te cajón ta sna Obed-edom. Soc bayal sbujts' yo'tanic ta spisilic la yich'ic c'axel ta Lum-yu'un-David.

¹³ Te c'alal beenic wactejq'uel ta acanil te mach'atic yich'ojic te cajón yu'un te Diose, te David la smil jcojt' toro soc jcojt' jujp'en chij swenta smajt'an Dios.

¹⁴ Te David slapoj efod pasbil ta lino-pac', soc yac ta beel ta ajc'ot ta spisil yip.

¹⁵ Te David soc ta spisil israeletic te yich'ojic bael te cajón yu'un Cajwaltic, yacalic ta aw ta swenta sbujts' yo'tanic soc yacal yoq'uesinbelic xulubil.

¹⁶ Te c'alal c'ot yu'unic ta Lum-yu'un-David te cajón yu'un Cajwaltic, te Mical, te yantsil-nich'an Saúl, la yil ta ventana. C'alal la yil te muc' ajwalil David te yac ta wilel soc yac ta beel ajc'ot ta stojol te Cajwaltic, mero ma lecuc yo'tan yu'un.

¹⁷ Te cajón yu'un Cajwaltic c'o yaq'uic ta yawil ta yutil nailpac' te chajbanbil yu'un te David. Te David ora la yac'bey chic'bil smajt'an soc milbil smajt'an swenta seña lamal-o'tanil ta stojol Cajwaltic.

¹⁸ Te c'alal laj yo'tan ta yaq'uel te smajt'an Dios, te David la yac'bey bendición te lume ta swenta Cajwaltic te Spisil ya xju' yu'une.

¹⁹ Spisil te israeletic tey ayic a, antsetic winiquetic la yac'bey juju-jpejch' pan, juju-jxujt' ti'bal soc juju-jpejch' taquin ts'usub. Patil sujt' ta snaic ta spisilic.

²⁰ Jich nix te David sujt' bael ta sna, yu'un ba sc'anbey bendición te mach'atic ay yu'une. Pero te Mical te yantsil-nich'an Saúl loc' ta tael yu'un, jich albot yu'un: —Buen lec c'ot te muc' ajwalil yu'un Israel te naxe. La yac' sba ta ilel ta stojol te criadaetic yu'un te swinictaque, jich bit'il te ch'ayem xq'uexlal mach'auc a —xi'.

²¹ Jac'bot yu'un te David: —Melel nix a, la caiy ajc'ot, pero ta stojol Cajwaltic, te ja' la stsaon swenta yu'un jo'on ya jelolin te anima atat soc spisil te sts'umbale, te bit'il jo'on ochon ta jwentainwanej ta stojol te lum Israel yu'une. Ja' yu'un ajc'otajon ta stojol te Cajwaltique.

²² Ya me jpejc'an xan jba a te bit'il ayon ta ora in to. Mero peq'uel xan ya cac' jba ta ilel awu'un; pero te criadaetic ya awale, ya me yich'onic ta muc' stuquelic —xi'.

²³ Ja' yu'un te Mical ma'yuc la yac' yal te jayeb c'aal cuxule.