2 Samuel 4 - Bible in Tzeltal de Oxchuc y Tenejapa

Laj ta milel Is-boset

¹ Te c'alal Is-boset snich'an Saúl la yaiy te lajix ta Hebrón te Abner, jc'axel pejc'aj te yo'tane. Spisil Israel jajch'ic ta buen xiwel.

² Te Is-boset ay cheb winiquetic yac ta yabatinel, ja' jtsobwanejetic yu'un jchajp jpoj-biluquetic. Te jtule Baana, te yane Recab, snich'nab Rimón, talem ta lum Beerot, ja' nix sts'umbalic Benjamín.

³ Melel te lum Beerot ay ta swenta Benjamín. Te c'alal loq'uic ta anel te mach'atic ayic ta Beerot, c'otic ta Gitaim. Tey ainiquix c'alal ora, manchuc me ma ja'uc slumalic.

⁴ Te Jonatán te snich'an Saúl, ay jtul snich'an Mefi-boset sbiil, boloben xchebal yacan. Yu'un te c'alal jo'eb ya'wilal a te Mefi-boset, jul tel ta alel ta Jezreel te lajix te Saúl soc te Jonatán. Te jch'ijteswanej yu'un Mefi-boset ic'ot ta anel yu'un, pero scaj te mero tulan te anele, yal te Mefi-boset, toj lajel yacan, jich coxo jilel.

⁵ Te Recab soc te Baana, te snich'nab Rimón talem ta lum Beerot, bajt'ic, tojic bael ta sna Is-boset, mero yorail xc'uxul c'aal a te c'otique. Ja' yu'un wayal ta xcuxel yo'tan te Is-boset.

⁶ Te jcanan-ti'nail ants yac sajp'uyel trigo, pero tal swayel, jich way. Ja' yu'un te Recab soc te yermano Baana jich ju' ochic bael, ma'yuc mach'a ilotic yu'un.

⁷ C'alal ochic bael ta yutil na, te Is-boset wayal ta swayib ta wayibal c'o staic. La smilic soc la sc'ocbeyic loq'uel te sjole, la yich'beyic bael. Sjunal ajc'ubal beenic bael, tojic bael ta Arabá,

⁸ swenta yu'un ya me yac'beyic David te ay ta Hebrón. Jich c'o yalbeyic te muc' ajwalile: —Tey ay te sjol Is-boset te snich'an Saúl, te ja' mero acontro, te yac ta sleel bila ya yut ya slajinbat acuxlejale. Pero yo'tic te Cajwaltic la yac'batix asujt'esbey spacol ta stojol Saúl soc te sts'umbale —xiic.

⁹ Jac'botic yu'un David: —Ya calbeyex ta jamal ta stojol te Cajwaltic, te ja' la scoltayon te bitic c'ux obol jba yu'un a.

¹⁰ Te c'alal tal ta jtojol jtul winic, la scuy te buen lec te bi tal yalbone. Tal yalbon caiy te lajix te Saule. Te bi la yalbone, ja' nax tuun yu'un a te la jtsac, la jmil tey ta lum Siclag.

¹¹ Mero ja' ni me jich ya jpasbeyex. Buen amenex, la amuquen-milic jtul winic te ma'yuc bi yac sna'bele, te wayal ta sna. Ja' yu'un ya me cac'beyex atojic te la amilique. Ya me jtup'ex ta balumilal —xi'.

¹² Ora la yalbey mandal te soldadoetic yu'une, jich la yich'ic milel. La set'beyic yoc sc'ab, la sjijp'anic ta xujc' yawil ja' ta Hebrón. Patil la yich'beyic te sjol Is-boset, la smuquic ta Hebrón ta smuquenal Abner.