2 Samuel 3 - Bible in Tzeltal de Oxchuc y Tenejapa

¹ Jalaj te guerra la yac'bey sbaic te xchapoj sba ta swenta Saúl soc te xchapoj sba ta swenta David. Pero te yu'un David bebe yich'bel yip stuquelic, yan te yu'un Saúl bebe pejc'ajel yip stuquel.

Mach'atic ayin yu'un David

² Te snich'nab David ayinic te c'alal ay ta Hebrón, ja'ic te Amnón, ja' banquilal, yal Ahinoam te talem ta Jezreel;

³ te xchebale, Quileab, yal Abigail te me'ba ants yu'un Nabal te talem ta Carmel; te yoxebale, Absalón, yal Maaca te snich'an Talmai, muc' ajwalil yu'un Gesur;

⁴ te xchanebale, Adonías, yal Haguit; te yo'ebale, Sefatías, yal Abital;

⁵ te swaquebale, Itream, yal Egla te yan yinam David. Ja' ayinic te c'alal ay ta Hebrón a te David.

Abner ay bi la xchap soc David

⁶ Te c'alal yich'oj yip guerra yu'un a te sts'umbal Saúl soc te David, te Abner xquechet ta ju'el bael yu'un swentainel te sts'umbal Saule.

⁷ Te Saúl ay jtul ants yu'un, Rizpa sbiil, snich'an Aja. Te Abner la sjoin ta wayel, pero te Is-boset la stij ta c'op yu'un te Abner. —¿Bi yu'un wayat soc te ants yu'un te anima jtate? —xi'.

⁸ Te Abner bayal ilin yu'un te tijot ta c'op yu'un te Is-boset, jich la yalbey: —¿Yu'un bal ts'i'on ta ac'op te cac'oj jba ta abatinel ta swenta Judá? Te jo'one mero jun co'tan ta stojol te sts'umbal Saúl, ja' te atate, soc te xchapomale soc te mach'a jun yo'tan sba soque, ma ba cac'ojat ta sc'ab David. Pero te ja'ate yacat ta yalel te la jta jmul ta swenta te jtul antse.

⁹ Ac'a yac'bon tulan castigo te Cajwaltic teme ma ba ya xba jpas soc David te bi albil yu'un te Cajwaltic,

¹⁰ ya me yich' loq'uesel ta muc' ajwalil te sts'umbal Saúl. Te David ja' me ya xnajc'aj ta muc' ajwalil yu'un Israel soc Judá ta spamal sq'uinalic, c'alal ta Dan soc c'alal ta Beerseba —xi'.

¹¹ Te Is-boset ma ba la sjac'bey ni baluc te sc'op Abner, yu'un la xi'.

¹² Te Abner ta stuquel-o'tan la sticun ta alel te David: “Ja'at awu'un te q'uinale. Ja' yu'un ay me bi ya jchaptic jiche. Te jo'one ya cac' puersa ta spasel te bay c'alal ya xju' cu'un te ya cac' taluc ta atojol spisil Israel”, xi'.

¹³ Te David jich la yal: “Lec ya caiy te ya jchap jc'optic, pero ay me bi ya calbat: Ma me xtal atejc'an aba ta jsit teme ma ba ya awic'bon tel te Mical te snich'an Saúl”, xi' te David.

¹⁴ Soc te David la sticun mach'atic ba yalbeyic te Is-boset: “Ac'bon te Mical te quinam te nujbinon soque, te la jel ta jo'winic (100) snujc'ulel sjol sbaq'uetal filisteoetique”, xi'.

¹⁵ Te Is-boset la sticun ta pojel te Paltiel snich'an Lais te ja' yinaminej te Mical.

¹⁶ Pero te Paltiel ts'acal bael ta spat, yac ta oq'uel bael. St'unoj bael c'alal ta Bahurim, tey ticunot sujt'el yu'un Abner a, jich sujt' bael te Paltiel.

¹⁷ Patil te Abner la sc'opon te mamaletic yich'oj yat'elic ta Israel, jich la yalbey: —Nameyix te yacalex ta sna'el te ja'uc ya x'och ta muc' ajwalil awu'unic te David.

¹⁸ Yo'tic c'otix yorail te ya x'och ta yat'ele, melel te Cajwaltic yaloj te ja' ta swenta David ya scoltay te lum Israel ta sc'ab filisteoetic soc ta sc'ab spisil scontro —xi'.

¹⁹ Te Abner la sc'opon uuc te sts'umbal Benjamín. Patil bajt' ta Hebrón swenta yu'un ya yalbey yaiy te David te bi xiic te Israel soc ta spisil te sts'umbal Benjamín.

²⁰ Sjoinej c'oel jtab ta jtul winiquetic ta Hebrón te banti ay te David. Te David la xchajban we'elil yu'un te Abner soc te mach'atic sjoineje.

²¹ Te Abner jich la yalbey te David: —Yo'tic ya me xboon, ya xba jtsob spisil Israel swenta yu'un ay me bi ya yich' chapel ta atojol. Jich me ta swenta sc'anjel yo'tanic a te ya x'ochat ta muc' ajwalil ta stojolique —xi'. Jich te David la spatbey bael yo'tan te Abner, jun yo'tan bajt'.

Joab la smil Abner

²² Te Joab soc mach'atic st'unojic te David jich ora julic tel ta poj-biluquetic, bayal bi yich'ojic tel te la spojbey te scontroique. Te Abner ma ba sjoinix a te David ta Hebrón, melel jun yo'tan bajt' te c'alal la spatbey bael yo'tane.

²³ C'alal c'ot te Joab soc spisil te soldadoetic sjoineje, albot yaiy sc'oplal te Abner snich'an Ner te sjoinej te muc' ajwalil te naxe, soc te c'alal bajt'e, te muc' ajwalil la spatbey bael yo'tan.

²⁴ Ja' yu'un te Joab ba yil te muc' ajwalil, jich c'o yalbey: —¿Bi yacat ta spasel? Melel te Abner snich'an Ner tal ta atojole, jun yo'tan la aticun sujt'el.

²⁵ ¿Yu'un bal ma ba ya ana' jiche te tal nax slo'layate, soc te ja' nax tal stsajtayat te bi yilel ta bael te bi yacat ta xchajbanele, soc te bitic yacat ta spasele? —xi'.

²⁶ C'alal laj yo'tan ta c'op soc David te Joab, ora la sticun ta leel sujt'el tel te Abner. Te David ma ba la yaiy stuquel. Te jleawetic c'o yiq'uic sujt'el ta pozo yu'un Sira.

²⁷ C'alal c'ot ta Hebrón te Abner, te Joab la yic' bael ta jejch' ta sti' yochibal te lume, swenta yu'un ya xc'opoj ta stuquel soc. Tey la yejch'entes ta xch'ujt', jich laj te Abner. Jich la sujt'esbey spacol te milbot te yijts'in Asael.

²⁸ Ta patil c'alal la yaiy te David, jich la yal: —Ya cal ta stojol Cajwaltic: Te jo'on soc te jayeb mach'atic joinej ta at'el, jc'axel ma jo'ucotic ta jwentatic te la yich' milel te Abner snich'an Ner.

²⁹ Ac'a c'otuc ta swenta Joab soc ta swenta spisil mach'atic ay yu'un ta sna. Spisil ora ta sna ay me mach'a ya xloc' pojow ta sjol sbaq'uetal, ay me mach'a yich'oj c'a'el-chamel, ay me coxoetic, ay me ya xlaj ta milel soc ay me mach'a ay swocol ta wi'nal —xi'.

³⁰ Joab soc Abisai la smilic te Abner, melel milbot te yijts'inic yu'un te Abner te c'alal ay guerra ta Gabaón.

³¹ Patil te David la yalbey mandal te Joab soc te jayeb mach'atic sjoineje: —Jatsa ac'u'ic, lapaic ch'ixal pac'. Oq'uetayaic me te Abner —xi'. Te muc' ajwalil David ay bael ta spat te xchajch'anteal.

³² La smuquic ta Hebrón te Abner. Te muc' ajwalil tulan la yoq'uetay, soc ja' nix jich la spas spisilic te yajwal lume.

³³ Te muc' ajwalil la sc'ajintay jcum c'ayoj swenta mel-o'tan yu'un te Abner: “¿Bi yu'un jich lajat, Abner, te ma'yuc swentail te lajate?

³⁴ Ma ba c'olbil te ac'ab, ni ja'uc chucul ta cadena te awacane. Jich lajat te bit'il mach'a ya xlajinot yu'un mach'atic amen yo'tanique”, xi'. Jich nix te yajwal lum ma ba laj yo'tanic ta oq'uel yu'un te Abner.

³⁵ Patil ba yalbeyic wocol te David te yacuc we'uc jtebuc te bit'il ma to ba c'axem te c'aale, pero te David jich la yal ta jamal: —Ac'a yac'bon tulan castigo te Cajwaltic teme ya jwe' pan o yan we'elil te c'alal ma to ba malem c'aal a —xi'.

³⁶ Spisilic la sna'beyic swentail, lec la yaiyic. Spisil te bitic la spas te muc' ajwalil, la smulanic te slumale.

³⁷ Ja' yorail a spisilic te israeletic la sna'ic ta lec te bit'il ma swentauc te muc' ajwalil te bit'il laj te Abner te snich'an Ner.

³⁸ Patil te muc' ajwalil jich la yalbey te mach'atic sjoinej ta at'el: —Ana'ojiquix te lajel to jtul jwentainwanej ta Israel, jtul te mero bayal sc'oplale.

³⁹ Ja' yu'un te jo'one, manchuc me jo'on te muc' ajwalilon te tsabilon yu'un te Diose, pero ma'yuc quip ya caiy yu'un te bi la sjowil spasic te yalatac Sarvia. Ja' ac'a ac'botuc yu'un te Cajwaltic te bi yilel stojol ya sc'an te mach'a la spas te bi amen ta pasele —xi' te David.