2 Samuel 24 - Bible in Tzeltal de Oxchuc y Tenejapa

David la yac' ta censo yajwal lum

¹ Te Cajwaltic cha'jajch' xan yilimba ta stojol te israeletique. La stijbey yo'tan David te yacuc yac' ta censo te israeletic soc te judioetique.

² Jich nix la spas a te David. La yalbey mandal te Joab te sjoinej te ja' general te soldadoetic yu'une: —Beentayaic spisil ta jchajp sts'umbal Israel ta spamal sq'uinalic, c'alal ta Dan soc c'alal ta Beerseba, swenta yu'un ya me awaq'uic ta censo. Jich me ya jna' te jayeb te yajwal lume —xi'.

³ Pero te Joab la sjac'bey sc'op te muc' ajwalile: —Ja'uc te Cajwaltic te Dios awu'un te ya yac' esmajuc xan jo'winic (100) buelta a te bit'il ay ta ora in to. Lec te yacuc to yil asite. Pero ¿bi stuc awu'un te censo? —xi'.

⁴ Pero te smandal te David ja' ich'bil ta muc' c'ot, ja' ma'yuc ta wenta c'ot te bi la yal te Joab soc te jtsobwanejetic yu'un te soldadoetique. Jich puersa bajt'ic ta spasel te censo yu'un te lum Israel.

⁵ C'axic bael ta muc'ja' Jordán. La sjachic ta lum Aroer, soc ta lum te ay ta yolil te muc'ul xatal ta stojol sq'uinal Gad soc ta lum Jazer.

⁶ Patil bajt'ic ta sq'uinal Galaad soc ta lum Cades, ta sq'uinal hititaetic. C'otic ta lum Dan. Jajch'ic ta Dan, la yaq'uic buelta ta stojol lum Sidón.

⁷ Patil bajt'ic ta lum Tiro te joytabil ta ja' te wocol ta ochintayel, soc ta spisil te lumetic yu'un heveoetic soc te cananeoetique, ja' to c'otic ta loq'uel ta sur yu'un Judá, ta lum Beerseba.

⁸ C'alal c'axix baluneb u soc jtab c'aal a, te laj sbeentaybelic spamal te sq'uinal Israel, c'otic xan ta Jerusalén.

⁹ Te Joab c'o yalbey te muc' ajwalil te jayeb loc' te censo. Ta Israel loc' cha'bajc' ta jmil (800,000) te winiquetic te ya xju' yu'unic guerra. Ta Judá loc' jo'winic xcha'bajc' ta jmil (500,000) ta jtul.

¹⁰ Pero te David la yaiy ta yo'tan te la sta smul yu'un te la yac' ta censo te yajwal q'uinale. Jich la yalbey ta jamal ta stojol te Cajwaltic: —Mero muc' mulil la jta ta atojol yu'un te bi la jpase. Ya calbat wocol ta atojol yu'un, Cajwal, te yacuc apasbon perdón yo'tic te jmul jo'on te abaton awu'une, melel jich la cac' jba te bit'il jun sonso —xi'.

¹¹ C'alal sacub q'uinal ta xchebal c'aal, jajch' te David. Te Cajwaltic jich la yalbey te j'alwanej Gad, ja' te ay bitic ya yalbey te David:

¹² —Baan ila awil te David, albeya ta jwenta te ay oxeb bila ya calbey yaiye. Ac'a stsa ba ay te ya sc'an ya jpase —xi'.

¹³ Te Gad ba yil te David, la sjojc'obey: —¿Bi ya amulan: ja' bal juqueb ja'wil wi'nal ta jq'uinaltic, ja' bal te oxeb u ya x'anat ta stojol acontrotac, o ja' bal te oxeb c'aal chamel ta jq'uinaltic? Na'a awaiy, ya me awalbon ta ora te bi ya xc'o calbey te mach'a sticunejon tele —xi'.

¹⁴ Te David la sutbey sc'op te Gad: —Mero tenbilon ya caiy. Yo'tic, ja' lec teme ja' ya x'ochotic ta sc'ab te Cajwaltic, te bit'il mero bayal ya sna' yo'bolil jbajtic stuquele, ma ja'uc ya x'ochotic ta sc'ab te winiquetique —xi'.

¹⁵ Ja' yu'un te Cajwaltic la sticun tel chamel ta stojol Israel. Ja' nix ta yorail a jajch' te chamele, ja' to c'alal ts'acaj te yorail albile. Ta spamal sq'uinalic, c'alal ta Dan soc c'alal ta Beerseba, lajic lajuneb xchanwinic ta jmil (70,000) swinquilel te q'uinale.

¹⁶ Te c'alal nopol ya slajinix a te Jerusalén te ch'ul abate, te Cajwaltic la sujt'es sc'op, la scom te ch'ul abat yu'un yac ta lajinwaneje: —Tiq'uix a. Ma xalajinix —xi'. Jich quejch'aj te lajele. Te ch'ul abat yu'un te Cajwaltic, ja' yorail tey ay bael ta banti yac ta sloq'uesel spat strigo te Arauna te jebuseo-winique.

¹⁷ C'alal la yil David te ch'ul abat te yac smilel ta chamel te yajwal lume, jich la yalbey te Cajwaltic: —Jo'on te jtaoj jmule. Jo'on te ay bi amen jpasoje. ¿Pero bi spasojic te jlumale? Melel ma'yuc smul stuquelic. Ya calbat wocol te jo'ucon ya xc'ot ta jwenta soc mach'atic ay cu'un te castigo awu'une —xi'.

David la spasbey scajtijib ta chiq'uel smajt'an Dios

¹⁸ Ja' nix ta yorail a, te Gad ba yil te David. C'o yalbey te ya spasbey scajtijib ta chiq'uel milbil smajt'an Cajwaltic, tey ta banti yac ta sloq'uesel spat strigo te Arauna te jebuseo-winique.

¹⁹ Jich te David ba spas te bi albot yu'un Gad te ja' smandal te Cajwaltique.

²⁰ Te Arauna yac ta yilel bael ta c'ubul c'alal la yil te yac ta talel ta stojol te muc' ajwalil soc te abatetic yu'une. Ja' yu'un te Arauna noptsaj bael, la stinan sba coel c'alal ta lum ta stojol te muc' ajwalil,

²¹ jich la yalbey: —¿Bi swentail te tal awilon te awabatone? —la yut. La sjac' te David: —Ya jc'an ya jmanbat te q'uinal te banti ya aloq'uesbey spat te atrigo, yu'un ya jpasbey scajtijib ta chiq'uel milbil smajt'an Cajwaltic tey a, swenta yu'un ya me xch'ay bael te chamel ay ta jlumale —xi'.

²² La sjac' te Arauna: —Ich'a, muc' ajwalil, te bi lec ya amulane. Ac'beya chic'bil smajt'an te Cajwaltique. Li' ay toroetic yu'un te smajt'ane, soc te jloq'uesibal spat trigo soc te yugoetic yu'un te j'at'el-wacaxetique, ya xju' ya x'och ta si'.

²³ Spisil ya cac'bat, muc' ajwalil cu'untic —xi'. Soc jich la yal xan te Arauna: —Lec teme ya sna'bat yo'bolil aba te Cajwaltic te Dios awu'une —xi'.

²⁴ Pero te muc' ajwalil la sjac': —Lec te ac'ope, pero puersa me ya jmanbat jo'on. Ya me jtojbat te bit'il stojole, melel ma xju' ya cac'bey ta chic'bil smajt'an te Cajwaltic Dios cu'un te bila ma tojbiluc cu'un —xi'. Jich la sman te David te q'uinal soc te wacaxetique, lajuneb yoxwinic (50) ta jsejp plata la stoj ta spisil.

²⁵ Tey la spasbey scajtijib ta chiq'uel milbil smajt'an a te Cajwaltique. La yac'bey chic'bil smajt'an soc milbil smajt'an swenta seña te lamal-o'tanil ta stojol. Jich te Cajwaltic la yich' ta wenta te wocol albot ta stojole, la sna'bey yo'bolil sba te israeletic, jich ch'ay bael ta stojol Israel te tulan chamele.