2 Samuel 23 - Bible in Tzeltal de Oxchuc y Tenejapa

Slajibal buelta sc'op David

¹ Ja' slajibal buelta sc'op David: “David snich'an Isaí, ja' te winic te toytesbot sc'oplal yu'un Dios, ja' te muc' ajwalil tsabil yu'un te Dios yu'un Jacob, ja' te jc'ayoj-winic t'ujbil c'ajin ta Israel, jich la yal:

² “Te Espíritu yu'un te Cajwaltic jo'on ya stuunteson ta c'op; jo'on ay ta que te sc'ope.

³ Te Dios yu'un Israel c'opojix, te Jcanantaywanej yu'un Israel jich yalojbon: ‘Ja' te mach'a mero stojil ya swentain te ants-winiquetique, ja' te mach'a yich'oj ta muc' Dios te ya x'at'ej ta muc' ajwalil,

⁴ jich me te bit'il yac ta t'osel q'uinal c'alal ya sacube, jich me te bit'il xojobil te c'aale te ma'yuc tocal ta sabe, te ya yac' muc'ubuc te ch'in wamaletique c'alal ya xc'ax te ja'ale’, xi'.

⁵ Ja' yu'un te patil alnich'anetic cu'un jc'axel ainemiquix ta stojol Dios; ay bi mero xchapoj ta jtojol te ma xlaj sc'oplal sbajt'el q'uinal. Ja' ts'acal ya yac'on ta tsalaw; ts'acal ya yac' c'otuc ta pasel spisil te bitic ya jc'ane.

⁶ Yan te mach'atic amen yat'elic jichic te bit'il ch'ix ch'aybilixe, te ma'yuc mach'a ya xju' ya stsac ta sc'abe.

⁷ Ja' to ya xju' ta tsaquel a teme ya jtsactic ta taq'uin, o ta lanza; jich ya yich'ic aq'uel ta c'ajc' swenta yu'un jc'axel me ya xlaj ta c'ajq'uel”, xi' te David.

Jtsalaw-soldadoetic yu'un David

⁸ Ja' sbiil te buen lequil soldadoetic yu'un David: Is-Boset, hacmonita-winic, ja' jtsobawanej yu'un ta yoxebal te ju'em yu'unic tsalawe. Ay jun buelta la smil ta lanza cha'bajc' (800) winiquetic.

⁹ Patil ay bael a te Eleazar te snich'an Dodo, ahohita-winic. Ja' nix ta yoxebal te mero ju'em yu'un tsalawe. Ja' la sjoin te David ta Pasdamim, te c'alal te filisteoetic tey la stsob sbaic ta guerra, soc te c'alal te israeletic la sq'uej sbaic bael ta stojolic.

¹⁰ Stuquel ma ba la sq'uej sba te banti teq'uel, la smil bayal filisteoetic ja' to c'alal lub sc'ab, tey ma la sc'anix jamel a te sc'abe, tey smoch'oj jilel a te spuñale. Ja' me c'aal to te Cajwaltic la sta mero muc'ul tsalaw. Te soldadoetic la st'unic te Eleazar, swenta yu'un ja' ba yu'uninbeyic sbiluc te lajem filisteoetique.

¹¹ Tey ay bael a te Sama snich'an Age, te ararita-winique. Te filisteoetic la stsob sbaic ta Lehi te banti ay ts'unbil lenteja. Te israeletic loq'uic ta anel ta stojol.

¹² Pero te Sama la stejc'an sba ta yolil te bay aye, ju' yu'un scoltaybel. La stsal te filisteoetic, jich la yaiy muc'ul tsalaw te Cajwaltique.

¹³ Ay jun buelta ta yorail stsobel sit awalts'unubil a, ay oxeb te loq'uem tel ta yolil te lajuneb xcha'winic (30) ta jtul te ju'em yu'unic tsalawe, ba sta sbaic soc David ta nailch'en ta Adulam. Te soldado-filisteoetic spasoj scampamentoic ta spamlej yu'un Refaim.

¹⁴ Te David ay ta anjibal ch'en, ja' yorail a te ay jchajp soldado-filisteoetic ta Belén.

¹⁵ Te David la yal te bi ya sc'an yo'tan: —Lec te ayuc mach'a ya yac'bon cuch' te ya'lel pozo ay ta sti'il Belén —xi'.

¹⁶ Ja' yu'un te oxeb ju'em yu'unic tsalawe, ju' yu'unic te smuquen-ochic bael tey ta scampamento filisteoetique. C'o slupic loq'uel tel te ya'lel pozo ay ta sti'il Belén, la yac'beyic yuch' te David. Pero ma la sc'an la yuch', la smal ta lum swenta smajt'an te Cajwaltique.

¹⁷ Jich la yal: —Ac'a scoltayon te Cajwaltic te manchuc ya cuch'e. Jich c'oem ya caiy te ja' ya cuch'bey xch'ich'elic te winiquetic, melel la sloq'ues sba ta yo'tanic te xc'otuc yich'ic tele —xi'. Ma ba la sc'an la yuch' te David. Te bi toyol sc'oplal c'ot ta pasele, ja' la spasic te oxebic ju'em yu'unic tsalawe.

¹⁸ Te Abisai yijts'in Joab, te yalatac Sarvia, ja' jtsobwanej yu'un te lajuneb xcha'winic (30) ta jtul mach'atic ju'em yu'unic tsalaw. Ay jich c'ot ta pasel te la yac'bey guerra jo'lajunwinic (300) ta jtul winiquetic, la smil ta slanza spisilic. Jich toy sc'oplal ta stojol te lajuneb xcha'winic (30) ta jtule,

¹⁹ ja' toyol sc'oplal c'ot yu'unic. Ja' och ta jtsobwanej yu'unic, pero ma ba la spaj te yantic oxtulic neel ayique.

²⁰ Benaía snich'an Joiada, talem ta lum Cabseel, ju'em yu'un tsalaw uuc, ay bayal sc'oplal bi la spas. Ja' te la smil te cheb snich'nab Ariel te talem ta Moab. Ay jun c'aal te ay bayal toiw, co bael ta ch'en, tey c'o smil jcojt' león-choj a.

²¹ La smil xan jtul mero najt'il egipcio-winic te chapal soc slanza. Ba yac'bey te', la smajbey loq'uel ta te' te slanza ta sc'abe. Ja' nix la smil a te slanza nixe.

²² Ja' yu'un te jich la spas te Benaía snich'an Joiada, toy sc'oplal ta stojol te lajuneb xcha'winic (30) ta jtul ju'em yu'unic tsalaw.

²³ C'ax jich toy sc'oplal a te bit'il yantic lajuneb xcha'winique (30), pero ma ba la spaj stuquel te yantic oxebic neel albil sc'oplalique. Te David la yac'bey swentain te jcanantaywanejetic yu'une.

²⁴ Te mach'atic ju'em yu'unic tsalaw, tey ayic te Asael, yijts'in Joab; Elhanán, snich'an Dodo, te talem ta Belén;

²⁵ Sama, talem ta Harod; Elica, talem nix ta Harod;

²⁶ Heles, paltita-winic; Ira, snich'an Iques, talem ta Tecoa;

²⁷ Abiezer, talem ta Anatot; Sibecai te talem ta Husah;

²⁸ Salmón te ahohita-winique; Maharai, talem ta Netofa;

²⁹ Heled snich'an Baana, talem nix ta Netofa; Itai snich'an Ribai, talem ta Gabaa te ay ta sq'uinal Benjamín;

³⁰ Benaía, talem ta Piratón; Hidai, talem ta beja' Gaas;

³¹ Abi-albón, arbatita-winic; Azmavet, talem ta Bahurim;

³² Eliaba, saalbonita-winic, te snich'nab Jasén; Jonatán;

³³ Sama, ararita-winic; Ahíam snich'an Sarar, ararita-winic nix;

³⁴ Elifelet snich'an Ahasbai, snich'an Maaca; Eliam snich'an Ahitofel, talem ta Gilo;

³⁵ Hezrai, talem ta Carmel; Paarai, arbita-winic;

³⁶ Igal, snich'an Natán, talem ta Soba; Bani, talem ta Gad;

³⁷ Selec, talem ta Amón; Naharai, talem ta Beerot, jcuch-at'ejibal ta guerra yu'un Joab yal Sarvia;

³⁸ Ira, talem ta Jatir; Gareb, talem nix ta Jatir;

³⁹ soc Urías te hitita-winique. Ta spisil juclajuneb xcha'winic (37) ta jtul.