2 Samuel 22 - Bible in Tzeltal de Oxchuc y Tenejapa

C'ayoj yu'un la yaiy tsalaw David

¹ Te David la sc'ajintay Cajwaltic te c'alal coltayot yu'un ta sc'ab Saúl soc ta sc'ab spisil scontrotac.

² Jich la yal: “Ja'at Cajwal, Jcanantaywanejat, anjibalat cu'un, ja'at la awac'on ta libre atuquel.

³ Diosat cu'un, ja'at nac'jibal tonat, ja' majq'uilat Cajwal, ya acoltayon ta awu'el. Mero toyol nac'jibalat cu'un, mero toyol anjibalat, Jcoltaywanejat cu'un atuquel. La acoltayon, ma ba c'ot ta jwenta te tulan uts'inele.

⁴ Te ja'at Cajwal, ya sc'an alel yutsil ac'oplal; melel te c'alal ya jc'oponate ya acoltayon ta sc'ab te jcontrotaque.

⁵ “La sbech'on ta slazoil te lajele; xiwon yu'un te la slicon ta yip ja' c'oeme.

⁶ La spotson ta slazoil te lajele; ayon ta yaquil yu'un te lajele.

⁷ Te c'alal ayon ta wocol a, la jc'opon te Cajwale, la jc'an coltayel yu'un te Dios cu'une. La yaiybon stojol jc'op c'alal ta templo; c'ot ta xchiquin te cawe.

⁸ “Jich a tal tulan nijq'uel ta balumilal, la stij sba te yich'o-ip te ch'ulchane; yuq'uilayot yu'un yilimba te Cajwaltique.

⁹ Loc' tel ch'ail ta sni', soc loc' tel c'ajc' ta ye swenta lajinwanej; xbuquet nax ta loq'uel tsajal ac'al ta ye.

¹⁰ La sjambey smajq'uil pac' c'oem te ch'ulchane, jich co tel. Ta ye'tal yacan ay pimil ijc'al tocal.

¹¹ La scajtijibin querubín, jajch' ta wilel; wil bael la quil ta sba xic' te iq'ue.

¹² Ja' la snain te pimil ijc'al tocal joytabil yu'une, ja' te pimil tocal te ay ya'lele.

¹³ Ta stojol chicnaj xojobil, jich bit'il tsantsewal; t'om loq'uel tel ac'aletic tsajuben ta c'ajc'.

¹⁴ “Te Cajwaltic, te Toyol ta jyalele, c'alal ta ch'ulchan tulan c'opoj, pajal soc sc'op chawuc.

¹⁵ La st'imuy bael jichuc t'im te tsantsewaletique, te jcontrotac loq'uic ta anel yu'un.

¹⁶ Chicnaj jilel ta ilel te slumil mar, chicnaj jilel ta ilel te snactijib te balumilale ta scaj te ay bi tulan c'opoj te Cajwaltic, ja' te tulan ic' la yac' baele.

¹⁷ “Dios la yac' tel sc'ab ta jtojol c'alal ta toyol, ta sc'ab la sloq'ueson ta bay muc'ul mar.

¹⁸ La scoltayon ta sc'ab te jcontrotac te ay yipique, te ay slab yo'tanic cu'une, te c'axem to xan tulanic a te bit'ilone.

¹⁹ Ja' la slumtayonic a te c'alal ay jwocole; pero ja' c'opoj cu'un te Cajwaltique.

²⁰ La yac'on ta libre; la scoltayon, melel c'uxon ta yo'tan.

²¹ Te Cajwal la yac'bonix jmajt'an te bit'il lec ayon soc te co'tane.

²² Melel ja' jt'unojbey sbe te Cajwaltic; ma'yuc bi ora la jle jmul ta stojol te Dios cu'une.

²³ Spisil ay ta co'tan te mandaliletic yu'une, ma'yuc jch'ayojbey te mandaliletic yu'un.

²⁴ Toj ayon ta beel ta stojol, ma'yuc jtaoj jmul; jilem cu'un te bitic amene.

²⁵ Te Cajwal la yac'bonix jmajt'an ta scaj te lec at'ejemon ta stojole.

²⁶ “Ja'at Cajwal, jun awo'tan ta stojol te mach'a jun yo'tan ta atojole; toj awo'tan ta stojol te mach'a toj yo'tane.

²⁷ Lec awo'tan ta stojol te mach'a lec yo'tane; tulan ya awac' aba ta stojol te mach'a ay maña ta yo'tan.

²⁸ Te ja'ate ya acoltay te mach'atic peq'uel yac'oj sbaique; yan te mach'atic stoyoj sbaique, ya apejc'an stuquel.

²⁹ Ja'at saquil q'uinalat cu'un, Cajwal; ja'at Dios cu'un ya awac' sacubuc q'uinal ta ba ayon ta yijc'al q'uinal.

³⁰ Ta swenta bit'il ya acoltayon ya jtsal te jcontro; jich ya xc'axon ta sbaba sts'ajc'ul te lumetic yu'unique.

³¹ “Jelawen yutsil te be yu'un te Diose; ya smuc'ulin co'tantic te bila ya yal te Cajwaltique. Dios ya scanantay te mach'atic ja' smuc'ulinej yo'tanique.

³² ¿Ay bal yan dios a te bit'il Cajwaltique? ¿Ay bal yan dios te ya xju' ya scanantayotique?

³³ Te Dios ja' mero anjibal, ja' tulan stuquel; ja' me ya scoltayon te ma jta falta yu'un te cat'ele.

³⁴ Ja' ya yac'on ta beel jich bit'il te ja'mal chije; ja' ma xyac' xbilts'uj cacan ta toyol q'uinal.

³⁵ Ja' ya sp'ijteson ta yaq'uel guerra; ja' ya yac'bon quip yu'un snitel te t'im pasbil ta bronce.

³⁶ “Ja'at ya acanantayon soc ya acoltayon; ta swenta te yutsil awo'tan te lec ayon.

³⁷ Ma ba wocol ayon ta beel awu'un; soc ma'yuc bay bilts'ujem te cacane.

³⁸ “La jnuts bael te jcontrotaque, la jmil jilel; ja' to sujt'on tel a te c'alal jc'axel laj cu'une.

³⁹ La jsesan jilel. Ma ba jajch'iquix. Limil jilel ta ye'tal cacan.

⁴⁰ Ja'at la awac'bon quip ta guerra; la awac' stinan sbaic ta jtojol te mach'atic toybaetique,

⁴¹ soc la awac' loc'uc ta anel ta jtojol te jcontrotaque. Jich ju' cu'un slajinel te mach'atic ay slab yo'tanic ta jtojole.

⁴² La sc'anic coltayel, pero ma'yuc mach'a coltayotic yu'un; c'opojic ta stojol te Cajwaltique, pero ma ba tsacbot sc'opic yu'un.

⁴³ Ts'ubiltic la jpas jilel, jich bit'il tan. La jpech' ta teq'uel jich bit'il ajch'al ta calletic.

⁴⁴ La acoltayon loq'uel ta c'opetic yu'un te toyba lume; la awac'on ta jwentainwanej yu'un bayal ta chajp nación; ya yac' sbaic ta abatinel ta jtojol te mach'atic te ma jna'bey sbae.

⁴⁵ Te c'alal ya yaiybonic stojol te jc'ope, ya xch'uunic; te jyanlumetic ya yich'onic ta muc'.

⁴⁶ Xiw yo'tanic te jyanlumetic, yacalic ta nijq'uel loq'uel tel ta anjibal.

⁴⁷ “¡Viva Cajwaltic, jelawenuc yutsil sc'oplal te jcanantaywanej cu'une! Ac'a toyuc xan yutsil sc'oplal te Dios te ya scoltayon soc te ya scanantayone.

⁴⁸ Ja' te Dios te ya yac'bey spacol stuquele, la yac' bic'tajuc te lumetic ta jtojole.

⁴⁹ Ja' te ya scoltayon ta sc'ab te jcontrotac, ja' te mach'atic amen yo'tanic te la stoy sbaic ta jtojole. Ja'at Cajwal, ya acoltayon ta sc'ab te j'uts'inwanejetique.

⁵⁰ Jich yu'un ya calbat yutsil ac'oplal ta stojol te nacionetique, soc ya jc'ajintaybat abiil.

⁵¹ Ya awac'bey yaiy tsalaw te ajwalil tsabil awu'une; spisil ora c'ux ta awo'tan te David soc te sts'umbale”, xi' ta c'ayoj te David.