2 Samuel 21 - Bible in Tzeltal de Oxchuc y Tenejapa

Spacol yu'un gabaonetic

¹ Te c'alal ja' ay ta muc' ajwalil a te David, tal wi'nal, oxeb ja'wil jalaj te wi'nale. Te David la sjojc'obey te Cajwaltique. Jac'bot yu'un: —Te wi'nale ja' talem ta swenta te smilaw te Saúl soc te mach'atic ay yu'une, melel la stojol-milic te gabaonetique —xi' te Cajwaltique.

² Te David la yic' tel te gabaonetic, c'opoj soc. (Te gabaonetic ma israeleticuc, jchajp sts'umbal amorreoetic te ay to jilemique. Ja'ic te ay bi mero jc'axel xchapojic soc te israeletic, pero te Saúl ay c'an slajin spisilic ta jc'axel. Yu'un la scuy te jich ay bi lec ya spasbey ta stojol te Israel soc te Judá.)

³ Jojc'obotic yu'un te David: —¿Bi ya jpas ta awentaic? ¿Bitic lec ya ac'anic te ya jpasbeyex swenta spacol te bi amen la awich'ic pasele, te jich ya xlecub sc'oplal awu'unic a te lum yu'un te Cajwaltique? —xi' te David.

⁴ La sjaq'uic te gabaonetic: —Ma ta swentauc taq'uin te bi quechel cu'untic soc te anima Saúl soc te sts'umbale, ni ayuc mach'a ya jc'an jmiltic ta Israel —xiic. Albotic yu'un te David: —Albonic me jiche te bila ya ac'anic ya jpasbeyex ta atojolique —xi'.

⁵ La sjaq'uic: —Ja' te winic te ya c'an sjinotic, soc te la xchap te jc'axel ya xch'ay jts'umbaltic ta sq'uinal Israel,

⁶ ja' ya jc'antic juctul te patil alnich'an yu'une, swenta yu'un ya jijpanbeytic sbaq'uetalic ta stojol Cajwaltic ta lum Gabaa-yu'un-Saúl te tsabil yu'un Cajwaltique —xiic. —Jichuc, lec ay —xi' te muc' ajwalile. Jich la yac' ta c'abal.

⁷ Yan te Mefi-boset snich'an Jonatán, smam Saúl, la sna'bey yo'bolil sba stuquel te David, scaj te ay bi jc'axel xchapoj ta stojol Cajwaltic soc te Jonatán.

⁸ Jich la yac' ta tsaquel Armoni soc Mefi-boset te xchebal yalatac Rizpa, yantsil-nich'an Aja, te ja' yal-snich'nab soc te Saule; soc te jo'eb yalatac Merab yantsil-nich'an Saúl, te la yac' soc te Adriel snich'an Barzilai te talem ta Mehola.

⁹ La yac'bey ta sc'abic te gabaonetique. C'o sjijp'anic ta wits ta stojol Cajwaltic, jich pajal lajic sjuquebalic ta xjajch'ibal sc'aalelal ta stsobel cebada.

¹⁰ Te Rizpa snich'an Aja la slap ch'ixal pac', soc la slim pimil pac' ta ba muc'ul ton. Tey jalaj a ta sjajch'el stsobel cebada, ja' to c'alal tal te ja'ale. Ma ba la yac' noptsajuc mutetic ta sts'eelic ta sbaq'uetalic te mach'atic lajemique, soc ni ja'uc te ja'mal chambalametic ya xbeenic ta ajc'ubale.

¹¹ C'alal la yalbeyic yaiy te David te bi spasoj te Rizpa, te ants yu'un anima Saúl,

¹² te David bajt' ta stsobel tel sbaquel te Saúl soc te snich'an, ja' te Jonatán, te ay ta sq'uinal te yajwal Jabes-ta-Galaad. Ja' te la smuquen-ich'beyic tel ta yolil lum Bet-sán, te banti la sjijp'anic te filisteoetic, te c'alal la stsalic te Saúl ta Gilboa.

¹³ Te David la yal mandal te ya yich'beyic c'axel te sbaquel Saúl soc te Jonatán, soc te ya stsobey sbaquelic te mach'atic la yich'ic jijp'anele.

¹⁴ La smucbeyic te sbaquelic Saúl soc Jonatán ta smuquenal Cis, te stat Saúl, ta lum Zela ta sq'uinal Benjamín. Spisil jich la yich' pasel te bit'il la yal mandal te muc' ajwalile. Patil te c'alal jich c'otix ta pasel a, Dios la sna'bey yo'bolil sba te slum-sq'uinalique.

Abisai la scoltay ta milel David

¹⁵ Te filisteoetic la yac'bey xan guerra te israeletique. Ja' yu'un te David soc te soldadoetic yu'une, ba sta sbaic soc ta guerra. Mero bayal lub te David.

¹⁶ Ja' yu'un ya c'an milotuc yu'un jtul najt'il winic Isbi-benob sbiil. Te slanza c'axem ta lajuneb xcha'winic (30) kilo yalal, soc jipil ta scub yach'il puñal.

¹⁷ Pero te Abisai, yal Sarvia, ba scoltay te David. La stsac sba soc te filisteo, la smil jilel. Ja' yu'un te swinictac David yaquic ta yalel ta jamal te ma'yuc bi ora ya x'och xan ta guerra te Davide swenta yu'un ma ba ya xtup' te c'ajc' tsumul c'oem ta yolil Israel.

Guerra ta stojol najt'il winiquetic

¹⁸ Patil ta Gob jajch' xan guerra soc te filisteoetique. Jich ora te Sibecai, te patil alnich'an yu'un Husa, la smil te Saf, te ja' sts'umbal te najt'il winiquetique.

¹⁹ Ta yan guerra te la yich' pasel ta stojol te filisteoetic tey nix ta Gob, Elhanán snich'an Jair te talem ta Belén, la smil te Goliat te talem ta Gat, te mero muc' te ste'el slanza, pajal soc ste'el sbaljibal te jalbil paq'ue.

²⁰ Ta Gat jajch' xan yan guerra. Ay jtul winic tey a mero najt'il winic, chaneb xcha'winic (24) sbic'tal yoc sc'ab, waqueb ay ta jujun yacan soc waqueb ay ta jujun sc'ab, soc ja' sts'umbal te najt'il winiquetique.

²¹ La slaban te Israel, pero milot yu'un te Jonatán snich'an Simea sbanquil David.

²² Ja' te chaneb najt'il winiquetic, patil alnich'anetic yu'un Refa te talem ta Gat, pero och ta sc'ab David soc te swinictaque.