2 Samuel 20 - Bible in Tzeltal de Oxchuc y Tenejapa

Seba la scontroin muc' ajwalil

¹ Tey ta Gilgal ay jtul winic amen yo'tan, sts'umbal Benjamín, Seba sbiil, te patil alnich'an yu'un Bicri. Te Seba la stsob jajch'el ta guerra te israeletic, jich la yalbey: —¡Ma'yucotic ta swenta te David! ¡Ma'yuc bi quechel ya yac'botic te snich'an Isaí! ¡Conic ta jnatic ta jpisiltic, israeletic! —xi'.

² Spisil te winiquetic ta Israel, la yijq'uitayic jilel David, ja' ba st'unic te Seba, te patil alnich'an yu'un Bicri. Pero te talemic ta Judá, jajch' tel ta muc'ja' Jordán c'alal ta lum Jerusalén, jun yo'tanic ta stojol te muc' ajwalil yu'unique.

³ Te c'alal sujt' bael ta sna ta Jerusalén te David, la spas ta mandal te lajuntul antsetic yu'un te la yijq'uitay yu'un ya xcanantaybot sna yu'unique. La yac' ochel ta na, la yac' ta canantayel. Ja' nix la swentain te antsetic, pero ma ba la staix sba soc. Tey macalic jilel ta na a, jich ainic te bit'il me'ba antsetic ja' to c'alal la sta yorail lajic.

⁴ Te muc' ajwalil la yalbey mandal Amasa: —Ic'a tel te winiquetic ta Judá. Cha'wej ya me xtalat soc ta jtojol —la yut.

⁵ Te Amasa ba stsob, pero jalaj, ma ba c'ot te bi ora albote.

⁶ Ja' yu'un te David jich la yalbey te Abisai: —Te Seba c'axem jich ya yac' jwocoltic a te bit'il Absalón. Ja' yu'un ochuc ta awenta te soldadoetic cu'une, nutsa bael. Melel teme ya sta jpam lum te joybil ta ts'ajq'ue, tey ya scoltay sba ta jc'abtic a —xi'.

⁷ Te winiquetic swentainej Joab, soc te cereteoetic, peleteoetic, ja' te jcananetic yu'un muc' ajwalile, soc te mero lequil soldadoetique, loq'uic bael ta Jerusalén soc Abisai, ba snutsic te Seba.

⁸ Te c'alal ayic bael ta bay muc'ul ton a te ay ta Gabaón, c'otic ta tael yu'un Amasa. Te Joab slapoj sc'u' swenta soldadoil, chucul ta xch'ujt' soc sna te spuñale, te muquen la stas loq'uel.

⁹ Te Joab la sjojc'obey te Amasa: —¿Lec bal ayat hermano? —la yut. La stsacbey ta yisim ta swa'el c'ab, la sbujts'i.

¹⁰ Pero ma ba la yil te Amasa te puñal yich'oj ta sc'ab te Joab. Ejch'entesot ta xch'ujt', loc' spisil te sbiquil, c'ot c'alal ta lum. Tic' laj a, ma ba ac'botix yan yu'un te Joab. Te Joab soc te yijts'in, Abisai, cha'bajt'ic ta snutsel te Seba te patil alnich'an yu'un Bicri.

¹¹ Jtul soldado yu'un Joab la stejc'an sba ta xujc' te sbaq'uetal Amasa, jich la yal: —Te jayeb mach'a yac'oj sba soc Joab soc te David, ac'a st'unic te Joab —xi'.

¹² Pero te sbaq'uetal Amasa tey ay ta yolil be, ts'ajalix ta xch'ich'el. Pero te soldado, c'alal la yil te spisil mach'atic ya xc'axic, ya stejc'an sbaic ta yilele, la xujq'uinbey ta be sbaq'uetal te Amasa soc la smuc ta pac', melel la yil te spisilic te mach'atic ya xc'otique ya stejc'an sbaic ta sts'eel.

¹³ Te c'alal la xujq'uinixe, c'axic bael spisil te mach'atic ay soc Joab ta snutsel te Seba.

¹⁴ Te Seba c'ax bael ta spisil ta jchajp sts'umbal Israel, c'ot c'alal ta lum Abel-bet-maaca. Spisil te patil alnich'anetic yu'un Bicri la stsob sbaic soc la sts'aclinic ochel te Seba c'alal ta yut lum.

¹⁵ Te c'alal c'ot ta Abel-bet-maaca te swinictac te Joab, och spasbeyic but'bilum swenta smoibalul ta sba te sts'ajc'ul te lume, swenta yu'un jich ya xju' yu'unic yochintayel a. Soc ta spisilic jajch'ic ta sjinel te ts'ajq'ue.

¹⁶ Pero ora nax tal jtul ants te bayal sp'ijil, jajch' ta aw c'alal ta ba ts'ajc': —¡Aiya awaiyic! ¡Aiya awaiyic! Wocoluc, albeyaic te Joab, ac'a noptsajuc tel yu'un ya jc'an ya xc'opojon soc —xi'.

¹⁷ Te c'alal noptsaj bael te Joab, jojc'obot yu'un te antse: —¿Ja'at bal Joabat? —xi'. —Jo'on Joabon —xi' ta sjaq'uel. Jich la yal te antse: —Aiybon awaiy jc'op te jo'on abaton awu'une —xi'. —Yacuc, ya caiybat —xi' te Joab.

¹⁸ Jich jajch' ta yalel te antse: —Te nameye jich ay ta alel: “Te mach'a ay bi ya sc'an ya sna'e, ac'a sjojc'obey ta Abel”, te xie, jich ya xchajbaj te c'ope.

¹⁹ Te jlumaltic c'ax jich lamal co'tantic soc jun co'tantic a te bit'il spisil ta jpam lum israeletique. Te jlumaltic ma pajaluc soc te yantic lumetic, cajal sc'oplal stuquel. Pero yo'tic achapojix te ya x'och ajine. ¿Bi yu'un ya ac'an ya ajin te bila ja' ay ta swenta te Cajwaltique? —xi'.

²⁰ La sjac' te Joab: —Yu'un abi, ma jichuc jnopoj. Ma jichuc co'tan te ya jlajin ta jyalel.

²¹ Ma jichuc chapal. Ja' nax te ay jtul winic talem ta switsul sq'uinal Efraín, Seba sbiil, te la sjach guerra ta stojol te muc' ajwalil David. Ac'bonic ta jc'ab stuquel, jich me ya xboon, ya quijq'uitay jilel te alumale —xi' te Joab. La yal te antse: —Ya me jch'ojbat coel sjol c'alal ta ba ts'ajc' —xi'.

²² Ora bajt' te antse, ba yac'bey sna' ta swenta sp'ijil te yajwal lume. La xot'beyic snuc' te Seba, te sjol la xch'ojbeyic coel Joab. Jich te Joab la yal mandal ta oq'uesinel xulubil, swenta yu'un ya xbajt'iquix. Bajt'ic, la yijq'uitayic jilel te lume, juju-jtul bajt' ta snaic. Yan te Joab sujt' bael ta Jerusalén ta sc'oponel te muc' ajwalile.

Abatetic yu'un David

²³ Te Joab ja' jil ta swenta spasel ta mandal spisil te soldadoetic yu'un Israel. Te Benaía snich'an Joiada, ja' la swentain te jcanan-muc'-ajwalil, ja' te cereteoetic soc te peleteoetique.

²⁴ Te Adoram ja' la swentain yilel te mach'atic sujbilic ta at'el. Te Josafat snich'an Ahilud, ja' secretario yu'un muc' ajwalil.

²⁵ Te Seva ja' cronista. Te Sadoc soc Abiatar ja' sacerdoteetic.

²⁶ Ira, te talem ta lum Jair, ja' nix sacerdote yu'un David.