2 Samuel 2 - Bible in Tzeltal de Oxchuc y Tenejapa

David och ta ajwalil ta Judá

¹ Patil te David la sjojc'obey te Cajwaltic, jich la yalbey: —¿Ya bal xju' ya xboon ta bayuc lumil ta sq'uinal Judá? —xi'. Jac'bot yu'un te Cajwaltic: —Yac, ya xju' ya xbaat —xi'. Te David la sjojc'o xan: —¿Banti ya xboon? —xi'. La sjac' te Cajwaltic: —Ta Hebrón —xi' sc'oplal.

² Te David bajt' soc te cheb antsetic yu'une, ja' te Ahinoam te talem ta lum Jezreel soc te Abigail te me'ba ants yu'un Nabal te talem ta Carmel.

³ Soc la yic' bael te jayeb sjo'tac soc spisil mach'a ay yu'unic ta chajbalchajp, c'otic ta nainel ta lumetic yu'un Hebrón.

⁴ Patil c'otic te winiquetic te swinquilel Judá, la yac'beyic yich' yat'el ta muc' ajwalil yu'unic. C'alal la yaiy te David te ja'ic te mach'atic ayic ta Jabes ta sq'uinal Galaad te la smuquic te Saúl,

⁵ jich la sticun ta alel: “Ac'a yac'beyex bendición te Cajwaltic te la ac'uxtayic te Saúl te ajwalil cu'untic te bit'il la amuquique.

⁶ Ac'a sna'beyex yo'bolil abaic soc ac'a yac' junajuc xan awo'tanic te Cajwaltique. Te jo'one buen lec me co'tan ta atojolic yu'un te bi la apasique.

⁷ Ac'aic xan puersa, ma me xiwex. Manchuc me lajix te Saúl te ajwalil awu'unique, pero te sts'umbal Judá la stsaoniquix yu'un ya x'ochon ta muc' ajwalil yu'unic”, xi' te David.

Israel soc Judá ya yac'bey sbaic guerra

⁸ Pero te Abner te snich'an Ner, te capitán yu'un te soldadoetic yu'un Saúl la yic' bael te Is-boset te ja' snich'an te Saule. La yic' bael c'alal ta Mahanaim.

⁹ Tey c'o yac' ochel ta muc' ajwalil yu'un Galaad, Gesuri, Jezreel, Efraín, Benjamín, soc yu'un spisilic te israeletique.

¹⁰ Te c'alal och ta muc' ajwalil ta Israel te Is-boset ay cha'winic (40) ya'wilal a, cheb ja'wil ay ta ajwalil. Pero te sts'umbal Judá, ja' muc' ajwalil yu'unic stuquel te David.

¹¹ Ja' yu'un te David och ta ajwalil juqueb ja'wil soc waqueb u ta Judá. Te Hebrón ja' muc'ul lum c'ot yu'un, te tey nacaj ta ajwalil a te David.

¹² Te Abner loc' jajch'el ta Mahanaim, toj bael ta Gabaón soc te soldadoetic yu'un Is-boset.

¹³ Jich te Joab, te yal Sarvia, soc te soldadoetic yu'un David loq'uic jajch'el ta Hebrón. C'o sta sbaic soc ta yawil ja' ta Gabaón. Ta xcha'chajbal te soldadoetic la staic yawilic, jchajp ta jejch' soc jchajp ta yan jejch' te yawil ja'e.

¹⁴ Te Abner jich la yalbey yaiy te Joab: —Ac'a loc'uc yac'bey sbaic ta comonsitil te soldado-queremetique —xi'. —Jichuc, lec ay —xi' te Joab.

¹⁵ Ja' yu'un loc' jajch'el ta swenta Benjamín soc ta swenta Is-boset snich'an Saúl, lajchayeb abatetic, c'axic bael ta olil. Yan xan lajchayeb loc' tel ta swenta te soldado yu'un David.

¹⁶ Ta juju-jtul jajch' stsac sba soc te scontro, ta sjol la stsac sbaic. La sts'apbey sbaic ta smoch te spuñalique. Jich lajic ta spisilic, limilic c'oel ta lum spisilic. Ja' yu'un te q'uinal Helcat-hazurim, xi' sbiil c'ot yu'unic.

¹⁷ Ja' in c'aal to mero tulan te guerra yu'unique. Te Abner soc te soldadoetic yu'un Israel, tsalot yu'un te soldadoetic yu'un David.

¹⁸ Tey ayic a te oxeb yalatac Sarvia: Joab, Abisai soc Asael. Te Asael, mero ya xju' yanimal, jich ya x'animaj te bit'il chij ta aquiltique.

¹⁹ La xch'oj sba ta snutsel te Abner, ma ba la yac'bey scoltay sba bit'il ya x'an.

²⁰ Te Abner la sut sit ta spat, la yil te nopol ya xtaotixe. Jich la yal: —Pero ja'at cati, Asael —xi'. —Jo'on jiche —xi'.

²¹ Te Abner jich la yalbey: —Ijq'uitayawonix, ma xanutsonix. Ja' lec tsaca jtuluc te abate, ich'beya jilel spisil te bi yich'oje —xi'. Pero te Asael ma la sc'an la squejch'an snutsel.

²² Te Abner la xcha'albey xan: —Ijq'uitayawonix, ma xanutsonix, manchuc me ma jc'an pero puersa ya jt'uxanat ta lum yo'tic. Patil, ¿bit'il ya cac' xan yilbon jsit te abanquil Joab? —xi'.

²³ Melel te Asael ma la sc'an la yijq'uitay snutsel te Abner, ja' yu'un te Abner la swalac' sts'apbey ste'el slanza ta xch'ujt', loc' ta spat. T'uxaj ta lum, toj lajel te Asael. Spisil te mach'atic c'otic te banti lajem te Asael, la stejc'an sbaic ta yilel.

²⁴ Pero te Joab soc te Abisai ba snutsic te Abner. Yac ta malel c'aal a c'otic ta ch'in wits Ama sbiil te snujp'usitayej sba soc Gía ta sbelal taquin q'uinal yu'un Gabaón.

²⁵ Tey la stsob sbaic a te benjaminetic, la syom sbaic soc Abner, jich jchajp xan nix soldado c'otic. La yac' sbaic ta ba wits.

²⁶ Te Abner la yawtay te Joab: —¿Ma bal ayuc bi ora ya xquejch'aj te miltombae? ¿Yu'un bal ma ba ana'oj jiche te c'ux obol jbajtic ya xc'ootic yu'une? ¿Bi ora ya awalbey mandal te awinictac te ya yijq'uitay snutsel te yermanotaque? —xi'.

²⁷ La sjac' te Joab: —Jamal ya cal ta stojol Dios, te manchuc jichuc la awale, te jwinictac ya me snutsic te yermanotaquic c'alal sacubel q'uinal te jichuque —xi'.

²⁸ Te Joab ora la yal mandal ta oq'uesinel xulub, spisil te winiquetic la slaman sbaic. La squejch'anic snutsel te israeletic, jich ma ba la stsaquix xan sbaic ta guerra.

²⁹ Te Abner soc te swinictac tojic bael ta muc'ul spamlej yu'un Arabá, sjunal ajc'ubal yacalic ta beel bael, c'axic ta Jordán, c'ax xch'uyic te Bitrón, c'otic c'alal ta Mahanaim.

³⁰ Te Joab la squejch'an snutsel te Abner. La stsob spisil te swinictac, la sc'ases lista yu'un. C'alal la sc'ases lista, la yil te ay laj balunlajuneb ta jtul te swinictac David, parte te Asael laje.

³¹ Pero te jayeb mach'atic st'unojic David la smilic waxaclajunwinic (360) ta jtul benjaminetic soc nix te swinictac Abner.

³² Patil la yich'beyic bael te sbaq'uetal Asael, ba smuquic ta Belén ta smuquenal stat. Joab soc te swinictac sjunal ajc'ubal beenic, yac ta sacubel q'uinal a c'otic ta Hebrón.