2 Samuel 19 - Bible in Tzeltal de Oxchuc y Tenejapa

^1-2 C'alal la yaiyic te yac ta oq'uel soc te yac ta mel-o'tan te muc' ajwalil, yu'un te laj te snich'an Absalón, ba yalbeyic te Joab. Ja' yu'un te tsalaw ju' yu'unique, c'atp'uj ta swenta mel-o'tan.

³ Te soldadoetic ma c'opojiquix ochel ta yutil lum. Q'uexlaltic yacal ta ochel te soldadoetic, jich bit'il loq'uem tel ta anel ta guerra yilele.

⁴ Jich te muc' ajwalil smacoj sit yac ta aw ta spisil yo'tan: “¡Absalón, jnich'an! ¡Absalón, jnich'an, jnich'an!” xi'.

⁵ Te Joab bajt' ta sna te muc' ajwalil, jich c'o yalbey: —Muc' ajwalil cu'untic, ya awac' ta q'uexlal te abatetic awu'une. Ta ora to la scoltaybatix acuxlejal soc anich'nab, winiquetic soc antsetic, soc awinamtac soc te yan antsetic awu'une.

⁶ Yo'tic te ja'ate la awaq'uix ta ilel te ma'yuc ta wenta awu'un te capitanetic soc te yantic abatetic awu'une. Melel ja' c'ux ta awo'tan te mach'a ya yilayate, ja' ya awilay te mach'atic c'uxat ta yo'tane. Yo'tic la jna'ix te ja' lec ta awo'tan te ja'uc cuxul te Absalón, te ja'uc lajucotic ta jpisiltique.

⁷ Jajch'an me jiche, muc' ajwalil cu'untic, c'opona ta spisil awo'tan te mach'atic st'unojate. Teme ma jichuc ya apase, ya cal ta jamal ta stojol Cajwaltic, ta ajc'ubal yo'tic ma'yuc jtuluc awinic ya xjilat. Ja' me c'ax jich wocol ya xc'ot ta atojol a te bit'il yantic bi amen c'oem ta awenta ta aqueremil to tal soc c'alal ora —xi' te Joab.

⁸ Jich jajch' te muc' ajwalil, bajt' ta naclej ta yochibal te lume. C'alal la yaiyic te abatetic yu'un te nacal ta yochibal lum te muc' ajwalile, spisilic ba yac' sbaic ta ilel yu'un. Yan te israeletic spisilic bajt'ic ta anel ta snaic.

Sujt' xan ta Jerusalén David

⁹ Ta spisil ta chajp sts'umbal Israel yacal wulajanel, jich yacalic ta yalel: —Te muc' ajwalil David la scoltayotic ta sc'ab te jcontrotic, ja' te filisteoetique, pero ta scaj te Absalón, loc' bael ta anel ta sq'uinal.

¹⁰ Te Absalón te la cac'tic ochel ta muc' ajwalil cu'untic, lajix ta guerra. ¿Bi ya jmaliytiquix a jiche, te ma ba ya cac'tic sujt'uc tel te muc' ajwalil David? —xiic.

¹¹ Te c'opetic yu'un spisil Israel c'ot c'alal ta sna te muc' ajwalil David. Jich te David la sticunbey c'op te cheb sacerdoteetic, ja' te Sadoc soc Abiatar, jich la yalbey: “C'opojanic soc te mamaletic ay yat'elic ta Judá. Jojc'obeyaic bi yu'un te ma orauc ya yic'onic sujt'el ta jna.

¹² Albeyaic te ma snup'uc te ja' patilix ya yic'onic sujt'el, melel ja'ic quermanotac ta swenta te bit'il jun jts'umbal soque”, xi'.

¹³ Soc la yal xan mandal te ya yich' alel Amasa: “Te ja'ate jun jch'ich'eltic. Ja' yu'un yo'tic ya x'ochat ta general yu'un te soldadoetic cu'une. Ja'at ya x'ochat ta sjelol te Joab. Teme ma ba ya cac' c'otuc ta pasele, ac'a yac'bon tulan castigo te Cajwaltique”, xi'.

¹⁴ Jich la yac'bey c'otuc ta yo'tanic te winiquetic ta Judá. Ta spisilic la syom sc'opic ta jun nax, la sticunic ta alel te muc' ajwalil te yacuc sujt'uc tel soc spisil te abatetic yu'une.

¹⁵ Jich te muc' ajwalile jajch' ta sujt'el bael, c'ot ta muc'ja' Jordán. Te judioetic bajt'ic ta Gilgal ta stael, soc ta scoltayel c'axel ta Jordán.

¹⁶ Jich nix te Simei snich'an Gera te sts'umbal Benjamín te nainem ta Bahurim, la yac' puersa ta coel bael soc te winiquetic talemic ta Judá, ba staic tel te muc' ajwalil David.

¹⁷ Sjoinej jmil (1,000) ta jtul winiquetic sts'umbal Benjamín. Jich nix te Siba, te yabat te mach'atic ay yu'un Saúl, soc jo'lajuntul snich'nab, soc jtab ta jtul yabat. Ja' neel c'otic ta Jordán te c'alal ma to ba c'oem a te muc' ajwalile.

¹⁸ C'ax bael ta bay peq'uel te ja'e, c'ax ta jejch' ja', yu'un ja' ba scoltay c'axel ta ja' te mach'atic ay yu'un te muc' ajwalile, soc swenta yu'un jich lec yo'tan ta stojol a. Te c'alal ya x'ochix ta c'axel ta muc'ja' Jordán te muc' ajwalile, te Simei tal stinan sba coel c'alal ta lum ta stojol,

¹⁹ jich la yalbey: —Ya calbat wocol ta atojol, muc' ajwalil cu'untic, te manchuc ya awich'bon ta wenta te falta cu'une, soc te manchuc ya ana'bon xan te jmul la jta ta atojol te abaton awu'un, te c'alal loc'at bael ta Jerusalén. Ma me x'ana'bonix ta awo'tan.

²⁰ Melel c'otix ta co'tan te la jta jmul ta atojole. Ja' yu'un te naxe, te sts'umbalon José, jo'on neel julon ta taaw awu'un muc' ajwalil cu'untic —xi'.

²¹ Te Abisai yal Sarvia, jich la yal: —¿Yu'un bal ma jichuc ya sc'an jiche te ya xlaj te Simei, te bit'il la yixtac'optay te muc' ajwalil te tsabil yu'un te Cajwaltique? —xi'.

²² La sjac' te David: —Ma awentauc, yalatac Sarvia. ¿Bi yu'un ya atoy abaic ta jtojol? Yo'tic ya jna' ta lec te jo'on te muc' ajwalilon yu'un te Israele. Ja' yu'un ma'yuc mach'a ya xju' ya xlaj ta Israel ja' in c'aal to —xi'.

²³ Patil la yalbey ta spisil yo'tan te Simei te ma ba ya xlaje.

²⁴ Jich nix te Mefi-boset, te snich'an Saúl, loc' ta stael te muc' ajwalile. Ja' to nix te bi c'aalil loc' bael te muc' ajwalile, asta ja' to c'alal lec sujt' tel, ma ba spocoj yacan, ma ba set'oj yisim, soc ma ba sac'oj sc'u'-spac'.

²⁵ Te c'alal tal ta Jerusalén te Mefi-boset ta yilel te muc' ajwalile, jich albot yu'un: —Mefi-boset, ¿bi yu'un ma ba tal ajoinon? —xi' sc'oplal yu'un.

²⁶ La sjac': —Ja' la slo'layon te abat cu'une, muc' ajwalil cu'un. Scaj te coxoon, la calbey te ya xchajbanbon jcojt'uc burro yu'un ya xmoon a, ya jt'unat bael sc'oplal.

²⁷ Pero la sleonix ta c'op ta atojol, muc' ajwalil cu'un. Pero te ja'at cajwal, jichat te bit'il ch'ul abat yu'un Dios, ja' ya apas te bi lec ta pasel ya awaiye.

²⁸ Manchuc me spisil te mach'atic ay cu'un ta swenta jtat, ya xju' ya yich'ic milel awu'un te jichuque, pero te jo'on te abaton awu'une ic'oton ta we'el ta amesa. ¿Bi yan ya xju' ya jc'anbat xan ta atojol, muc' ajwalil cu'un? —xi' te Mefi-boset.

²⁹ Jac'bot yu'un te muc' ajwalile: —Ma'yuquix bi yan ya caltic. Ya calix mandal te ja'at soc te Siba ya axat abaic a te q'uinale —xi'.

³⁰ Pero te Mefi-boset la sjac'bey: —Ac'a yich' jilel spisil. Te bi bayal sc'oplal ta co'tane, ja' te bit'il buen lec ayat a sujt'at tel ta ana —xi'.

³¹ Yan te Barzilai te talem ta Galaad co tel ta Rogelim, tal sjoin ta c'axel ta muc'ja' Jordán te muc' ajwalile, soc yu'un tey nix ya spatbeyix bael yo'tan a.

³² Mero mamalix, yu'un ayix chanwinic (80) ya'wilal. Te jayeb c'aal jalaj ta Mahanaim te muc' ajwalil, la yac'bey spisil te bi tuun yu'une, melel mero jc'ulej te mamale.

³³ Te muc' ajwalile jich la yalbey te Barzilai: —Conic ta Jerusalén, tey me ya jwentainat a —la yut.

³⁴ Te Barzilai jich la yal: —Ma ba jalix c'aal cuxulon te ya xboon ta Jerusalén soc te ja'ate, muc' ajwalil,

³⁵ melel ayix chanwinic (80) ca'wilal. Ch'ayix sbujts' ya caiy te bi ya jwe'e, soc te bi ya cuch'e, ma xju'ix ya cal teme buen bujts'ane, o teme ma bujts'anuque. Soc ma ba ya caiybeyix te sc'ayojic te winiquetic soc te antsetique. ¿Bi yu'un ya xc'atp'ujon ta ijc'atsil c'oem ta atojol, muc' ajwalil?

³⁶ Ja' nax me ya xba joinat c'axel ta muc'ja' Jordán. ¿Bi yu'un te ya awal te ya awac'bon c'uxtayel, muc' ajwalil?

³⁷ Ya calbat wocol, ya me awac'on sujt'el ta jlumal, yu'un tey me ya xlajon a soc tey me ya xmujcon ta banti smuquenal te jme'-jtate. Pero li' ay yan abat awu'un, muc' ajwalil, ja' te jnich'an Quimam. Ac'a sjoinat bael, pasa soc te bila lec ta pasel ta stojol ya awaiye —xi' te mamale.

³⁸ La sjac' te muc' ajwalil: —Ac'a tel sjoinon bael te Quimam. Ya me jpasbey ta stojol te bi mero lec ta pasel ya awaiye. Spisil te bi ya ac'anbon te ya jpasbeye, ya me cac'bey —xi' te muc' ajwalile.

³⁹ Spisilic c'axic bael ta muc'ja' Jordán. Te c'alal c'ax bael te muc' ajwalil, la sbujts'i te Barzilai swenta spatjibal yo'tan jilel. Jich te Barzilai sujt' bael ta banti naineme.

⁴⁰ Jich te muc' ajwalil toj bael ta Gilgal. Ja' sjoinej bael te Quimam soc ta spisil judioetic soc olil te israeletique.

⁴¹ Spisil israeletic ba yilic te muc' ajwalile, jich la yalbeyic: —¿Bi yu'un te ja'ic te quermanotactic ta Judá te ya sc'an yu'uninat ta stuquelic nax, muc' ajwalilat cu'untic? Melel stuquelic nax te sjoytayejat soc te mach'atic ay awu'un soc te soldadoetic awu'un te c'alal c'axat tel ta Jordán —xi'.

⁴² Spisilic te talemic ta Judá la sjac'beyic sc'op te israeletique: —Ja' yu'un te mero jchapomaltic te muc' ajwalile. Pero ma snujp'in teme ja' ya x'ilinex yu'une. ¿Yu'un bal ja' ya yac' jwe'eltic, o yu'un bal ay bi buen lec la yaq'uix jmajt'anintic jiche te muc' ajwalile? —xiic.

⁴³ La sjaq'uic te mach'atic ay ta swenta Israel: —Te jo'otic lajuneb buelta c'axem quipaltic a te bit'il ja'exe, ja' yu'un c'axem to xan cu'untic te muc' ajwalile. Soc xan ta swenta te jts'umbaltic, jo'otic banquilal c'oemotic awu'unic. ¿Bi yu'un te ma'yucotic ta wenta awu'unique? ¿Yu'un bal ma ja'uc neel la caltic jiche te ya sujt' tel te muc' ajwalil cu'untique? —xiic. Te judioetic ja' mero tulan xan c'opojic. Yan te israeletic ma ba ju' yu'unic stuquel.