2 Samuel 17 - Bible in Tzeltal de Oxchuc y Tenejapa

Husai la sjinbey bi la yal Ahitofel

¹ Patil te Ahitofel jich la yalbey te Absalón: —Ac'awon ta stsael lajchaymil (12,000) winiquetic, yo'tic nix ta ajc'ubal ya xboon ta snutsel David.

² C'alal bi ora lajemix yip, c'alal lubenix a, ya xc'o jlumtay, ya me cac'bey xiwel ta melel. Spisil te mach'atic sjoinej, ya me xloq'uic ta anel. Ma'yuc mach'a yan ya jmil, ja' nax te muc' ajwalile.

³ Patil ya me cac' sujt'uc tel ta atojol spisil te lume, jich bit'il ants nujbinel to te ya sujt' xan ta stojol smamlal. Te bila ya alee, ja' te yacuc xlaj te jtul winique. Jich lamal q'uinal ya xc'ot ya yaiy a te lume —xi' te Ahitofel.

⁴ Te bi la yal te Ahitofel, lec la yaiy te Absalón, soc nix te mamaletic yich'oj yat'elic ta Israel.

⁵ Pero te Absalón la yal mandal te ya x'ic'ot tel te Husai te sts'umbal arquitaetic, swenta yu'un ya me yal uuc te bi ya snop ta yo'tane.

⁶ C'alal c'ot te Husai ta stojol te Absalón, jich la yal: —Te bi la yal te Ahitofel ja' in to. ¿Ya bal jpastic, o ma ba ya jpastic? Ala caiytic bi ya snop te awo'tane —xi'.

⁷ La sjac' te Husai: —Te bi la yal te Ahitofel, ma jichuc ya sc'an pasel.

⁸ Ja'at nix mero ana'oj te ma xiwic te atat soc te swinictaque. Yo'tic mero jajch'em slab yo'tanic, jich c'oemic te bit'il sme' ja'mal oso te yich'oj pojel yalataque. Soc xan, te atate mero c'aem ta guerra, ma ja'uc sjoinej ya xc'ax ajc'ubal te swinictaque.

⁹ Yo'tic, snac'ojix sba ta nailch'en, o ay wan ta yan lugar. Soc teme ta xjajch'ibal to ya xchicnaj ta alel te ay lajix te mach'atic st'unojate, puersa me ay mach'a ya yal te lajix ta tsalel te mach'atic st'unojate.

¹⁰ Asta te mach'a mero ma xiw, soc te mach'a buen c'ajc' jichuc stsajal león-choj, jc'axel me ya xiwic. Melel te atate soc te mach'atic t'unbil yu'une, na'bil ta spamal Israel te mero ma xiwique.

¹¹ Yo'tic jo'on ya calbat, ac'a stsob tel sbaic ta atojol spisil te israeletic ta spamal sq'uinalic, c'alal ta Dan soc c'alal ta Beerseba, melel mero bayalic ta jtul jichuc ji' te ay ta ti'mar. Te ja'at nix ya xba awac' ta guerra.

¹² Jich me ya xc'o cac'beytic guerra te atat ta bayuc xc'o jtatic. Ya me xc'o jlumtaytic jich bit'il ts'ujul ya xyal ta sba te lumq'uinale. Ma me ayuc mach'a cuxul ya xjil, ni ja'uc te atat, soc ni ja'uc te swinictaque.

¹³ Soc xan teme ay banti ya x'och ta anel ta jpam lum, jpisiltic te israelotic ya quich'tic bael jlazotic, ta pejch'elpejch' stonil ya me jnitic ochel c'alal ta uc'um te lume, ma'yuc ni junuc ton ya xjil tey a —xi' te Husai.

¹⁴ Te Absalón soc ta spisil te israeletic, ja' lec la yaiyic te bi la yal te Husai, ja' ma ba lec c'ot te bi la yal te Ahitofel. (Melel te Cajwaltic chapalix yu'un a te ya yich' jowejtesel te bi melel yalojix a te Ahitofel, swenta yu'un ja' me ya xc'ot ta swenta te Absalón te bi amene.)

¹⁵ Patil te Husai la yalbey te sacerdote Sadoc soc te sacerdote Abiatar te bi la yalix te Ahitofel ta stojol te Absalón soc ta stojol te mamaletic yich'oj yat'elic ta Israel, soc nix te bi la yalbeyix ta stojolique,

¹⁶ swenta yu'un ya me yalbeyic yaiy ta ora te David, te ma me teyuc ya xc'ax yu'un a te ajc'ubal tey ta tec'oja' te ay ta jochol taquin q'uinale. Ac'a me c'axuc bael ta puersa ta jejch' ja' Jordán swenta yu'un jich ma ba ya xlaj ta milel, soc ni ja'uc ya xlaj ta milel te swinictaque.

¹⁷ Te Jonatán soc te Ahimaas ayic ta En-rogel, yu'un ma xju' ya yac' sbaic ta ilel ta yut lum. Ja' yu'un jtul criada c'ot ta alel yu'un. Jich ora bajt'ic ta yalel te muc' ajwalil David.

¹⁸ Pero puersa ilotic yu'un jtul querem, ora ba yalbey te Absalón. Jich te mach'atic bajt'ique, la suj sbaic ta beel. Ora c'otic ta sna jtul winic ta Bahurim, la snac' sbaic ta yutil pozo te ay ta ti'naile.

¹⁹ Jich te yinam te winique, ay pac' la smacbey sti'il a te pozo. La yich' bael chijchinbil trigo, la slilinbey ta sba, jich ma'yuc mach'a la sna'.

²⁰ C'alal c'otic te jnutsawetic ticunbilic yu'un Absalón, la sjojc'obeyic te ants: —¿Banti ayic te Ahimaas soc te Jonatán? —xiic. —C'axic li'to. Tojic bael ta muc'ja' —xi' ta sjaq'uel te antse. Jich te jnutsawetic ticunbilic yu'un Absalón, ba sleic. Pero c'alal ma ba la staic, sujt'ic bael ta Jerusalén.

²¹ C'alal sujt'ic bael te jnutsawetic, Ahimaas soc Jonatán loq'uic ta pozo. Bajt'ic ta animal ta yalel te muc' ajwalil David te bi ya xc'ot ta pasele. La yalbeyic te yacuc xjajch'ic ta ora, yacuc xc'axic bael ta jejch' ja', melel te Ahitofel la yalix te ya xbajt'ic ta aq'uel guerra.

²² Jich te David soc spisil te mach'atic joinbil yu'une, jajch'ic ta ora, c'axic bael ta jejch' muc'ja' Jordán. C'alal sacub q'uinal, spisil c'axemiquix ta jejch' ja'.

²³ Te Ahitofel c'alal la yil te ma ba la yich' ch'uunel te bila la yale, la xchajban sburro, bajt' ta sna ta slumal ta banti ainem. C'alal laj yo'tan ta sc'oponel te mach'atic ay yu'une, la sut' snuc', la sjojc'an sba, jich laj. C'ot ta muquel ta banti mucul te state.

David ay ta lum Mahanaim

²⁴ Te David c'ot ta lum Mahanaim. Ja' yorail yac ta c'axel ta muc'ja' Jordán te Absalón soc ta spisil te israeletique.

²⁵ Te Absalón ja' yac'oj ta general yu'un soldadoetic te Amasa swenta sjelol Joab. Te Amasa snich'an jtul sts'umbal Ismael, Itra sbiil, te la yinamin Abigail, te yantsil-nich'an Nahas. Ja' yermana sba soc te Sarvia, te sme' Joab.

²⁶ Te Absalón c'o spas scampamento soc te israeletic ta sq'uinal Galaad.

²⁷ C'alal te David c'ot ta Mahanaim, loc' tel ta tael yu'un Sobi snich'an Nahas te jajch'em ta lum Rabá ta Amón, soc Maquir snich'an Amiel te jajch'em ta lum Lodebar, soc Barzilai te jajch'em ta Rogelim ta Galaad.

²⁸ La yich'beyic bael wayibaletic, vasijaetic, pac'bil oxometic, soc trigo, cebada, harina, soc ch'ilbil trigo, habas, lentejas,

²⁹ chab, mantequilla, queso yu'un wacax soc yu'un chij, swenta yu'un ya swe' te David soc te swinictac joinbil yu'une. Melel la yal ta yo'tanic: “Te bit'il yacalic ta talel ta jochol taquin q'uinal, lubenic wan, ayic wan ta wi'nal soc taquinti'il”, xiic.