2 Samuel 16 - Bible in Tzeltal de Oxchuc y Tenejapa

David c'opoj soc Siba

¹ Jteb to nax xc'axel bael ta ba wits a te David, loc' ta tael yu'un Siba, ja' te yabat Mefi-boset. Yic'oj cheb burroetic, chajbajtic soc scuchoj lajunwinic (200) ta jpejch' pan, jo'winic (100) ta jpejch' taquintesbil ts'usub, jo'winic (100) ta jp'is sit awalts'unubiletic te yorail sit a, soc jpojc' ta nujc'ulil vino.

² Jojc'obot yu'un te muc' ajwalile: —¿Bi stuc te bi awich'oje? —xi' sc'oplal yu'un. La sjac' te Siba: —Te burroetic yu'un ja' ya xmoic a te mach'atic ay awu'un te ja'at te muc' ajwalilate, te pan soc te sit awalts'unubiletique, yu'un ja' ya swe'ic te soldadoetique. Jich nix te vino, ja' ya yuch'ic te mach'atic ya xlubic ta jochol taquin q'uinale —xi'.

³ Jojc'obot yu'un te muc' ajwalil: —¿Banti ay te Mefi-boset, te smam te anima awajwale? —xi' sc'oplal. —Jil ta Jerusalén, melel yac ta sna'el teme ay ya sujt'esbot ta swenta yu'un te israeletic te yat'el ta muc' ajwalil te smame —xi' te Siba.

⁴ La yal te muc' ajwalil: —Lec ay jiche. Yo'tic ja'at awu'unix spisil te bitic yu'un ta namey te Mefi-boset —xi'. —Bayal yutsil teme ya ana'bon yo'bolil jbae, muc' ajwalil cu'un —xi' ta sjaq'uel te Siba, soc la stinan sba ta stojol te muc' ajwalile.

⁵ Te c'alal c'ot ta Bahurim te muc' ajwalil David, loc' tel jtul winic tey a sts'umbal Saúl, Simei sbiil, snich'an Ger. Yac ta bolc'optaywanej.

⁶ Yac yutbel soc yac ta xch'ojel ton te David soc ta stojol te capitán-soldadoetic yu'une. Manchuc me joytabil yu'un te mach'atic sjoineje, manchuc me canantaybil yu'un te jcanantaywanejetic yu'une,

⁷ pero te Simei yac ta utaw, jich yac ta yalel: —¡Loc'an bael li', c'a' jmilawal!

⁸ ¡Te Cajwaltic la yac'batix castigo ta scaj te amilawe! Melel la amilbey te mach'atic ay yu'un te Saule. Ja'at la apoj te at'ele, ochat jilel ta swenta. Yo'tic te Cajwaltic, ja' la yaq'uix ochuc ta muc' ajwalil te anich'an Absalón. Yan te ja'ate li' ayat ta wocol ta scaj nix te abolile. ¡Melel mero jmilawalat! —xi' te Simei.

⁹ Te Abisai yal Sarvia, jich la yalbey te muc' ajwalile: —¿Bi yu'un te ya stijat ta c'op te muc' ajwalilat ja' me lajem ts'i'e? Yo'tic nix ya xba jc'ocbey sjol —xi'.

¹⁰ Pero la sjac' te muc' ajwalil: —Ma awentauc ja'ex, yalatac Sarvia. Teme ya yixtac'optayone, yu'un ja' nix te Cajwaltic te ticunbil yu'une. Teme jiche, ¿mach'a ya xju' ya sjojc'obey bi yu'un jich ya spas? —xi' te David.

¹¹ Patil la sc'opon te Abisai soc spisil te capitán-soldadoetic yu'une, jich la yalbey: —Melel ja' nix te mero jnich'an te yo'tanuc ya smilone. ¿Ja'uc to balix a te jtul sts'umbal Benjamín to? Ijq'uitayaic, ac'a yixtac'optayon. Ja' te Cajwaltic te ticunbil yu'une.

¹² Teme yu'un ya yilbon jwocol te Cajwaltic, ya wan yac'bon bendición te bit'il bolc'optayel yacon ta yaiyel abi —xi'.

¹³ Te David soc te swinictac jajch'ic xan ta beel. Jich te Simei toj bael ta ch'ujt' wits, yac ta bael ta jejch' xujc' te David. Yac yutel soc yac ta xch'ojel ta ton, soc yac ta swilesel ts'ubil lum.

¹⁴ Te c'alal c'ot ta muc'ja' Jordán soc te swinictac sjoinej te muc' ajwalile, mero lubeniquix. Tey c'o xcux yo'tanic a.

Absalón och ta Jerusalén

¹⁵ Jich ora te Absalón och ta Jerusalén, joinbil yu'un spisil israeletic soc Ahitofel.

¹⁶ Te Husai te talem ta sts'umbal arquitaetic, te jun yo'tan sba soc te David, ba sta tel te Absalón: —¡Viva muc' ajwalil, viva muc' ajwalil! —xi'.

¹⁷ Jojc'obot yu'un te Absalón: —¿Jich bal, te jun awo'tan ta stojol te mach'a c'ux ya awaiy aba soque? ¿Bi yu'un ma ba baat soc? —xi'.

¹⁸ La yal te Husai: —Ma xju' cu'un. Melel ja' ya sc'an te ya xjilon, soc ya join te mach'a ja' tsabil yu'un te Cajwaltic soc ta spisil te lum Israel.

¹⁹ Soc xan, te mach'a ya cac' jba ta abatinel yu'une, ja'uc nix te snich'an te mach'a jc'uxtayej jba soque. Ja' yu'un ya me cac' jba ta abatinel awu'un, jich nix te bit'il la cac' jba ta abatinel yu'un te atate —xi' te Husai.

²⁰ Ta patil te Absalón la sjojc'obey te Ahitofel: —¿Bi ya sc'an ya jpastic ya awaiy? —xi'.

²¹ Te Ahitofel la sjac': —Wayan soc te antsetic yu'un atat, te yijq'uitayej yu'un ya scanantaybeyic sna, swenta yu'un jich me ya sna' spisil Israel te jc'axel la awac' aba ta ilayel yu'un te atate. Jich me ya yich' xan yip yo'tanic te jayeb mach'atic ayic ta atojole —xi'.

²² Jich jajch' ta pasel nailpac' ta yamaq'uil ba na yu'un yawil te Absalón, jich way soc tey a te antsetic yu'un te state. Jich la spas ta scomonsitic spisil israeletic.

²³ Ja' yorail a te bila ya yal te Ahitofel pajal c'oem soc te ja' yac ta c'op te Diose. Jich ay sc'oplal te Ahitofel, jich ta stojol David soc ja' nix jich ta stojol Absalón.