2 Samuel 15 - Bible in Tzeltal de Oxchuc y Tenejapa

Absalón la stoy sba ta stojol David

¹ C'alal c'ax bael jtebuc c'aal, te Absalón wejt' yu'un jun scarreta swenta guerra soc caballoetic, la xchajban lajuneb yoxwinic (50) winiquetic te ya xcanantayot yu'une.

² Buen sab ya xjajch', ya yac' sba ta ti'be ta yochibal te lume. Spisil te mach'atic ya xc'otic yu'un ya yac' sbaic ta chajbanel yu'un muc' ajwalil, ya yic' soc ya sjojc'obey banti lumil talem. Teme ay ya yalic te talemic ta jchajp sts'umbal Israel,

³ te Absalón ya yalbey: —Melel toj ay soc mero yich'oj swentail te bi ya awac' ta chajbanel yu'une, pero ma'yuc mach'a ya xchajbanat ta swenta te muc' ajwalile —ya yut.

⁴ Soc ya yal xan: —Ayuc bit'il jo'on ya x'ochon ta jchajbanwanej yu'un te nacione, swenta yu'un ya me xtal yilonic spisilic te mach'atic ay c'op yu'unic, jo'on me ya jchajban ta mero stojil —xi'.

⁵ Soc teme ay mach'a ya xnoptsaj ta sts'eel yu'un ya xpatbot yo'tan yu'une, te Absalón ya yac'bey te sc'ab soc ya smey sbujts'i.

⁶ Jich la spasbey spisil israeletic te ya xba yilic te muc' ajwalil te ya xchajbanotic yu'une. Jich la smonbey yo'tan te israeletique.

⁷ C'alal loc' chaneb ja'wil, te Absalón jich la yalbey te muc' ajwalil: —Ya calbat wocol ta atojol, ac'awon bael ta Hebrón. Ya xba cac' c'otuc ta pasel te bi la cal ya jpasbey ta stojol te Cajwaltique.

⁸ Te c'alal nainemon ta Gesur ta Siria a te jo'on te abaton awu'une, la cal ta stojol te Cajwaltic, teme ya yac'on sujt'el tel ta Jerusalén, ya me calbey wocol —xi'. La sjac' te muc' ajwalil:

⁹ —Jun awo'tan xbaat —xi'. Te Absalón bajt' ta Hebrón.

¹⁰ Pero jich ora la sticun ta alel ta muquen ta stojol spisil ta chajp sts'umbal Israel te ya me yalic te ochix ta muc' ajwalil ta Hebrón te Absalón, te c'alal ya yaiyic ya x'oc' te xulubil.

¹¹ Soc la yic' bael lajunwinic (200) yajwal Jerusalén, jun yo'tan bajt'ic soc, ma ba la sna'ic te bi swentaile.

¹² Soc ja' nix jich la sticun ta iq'uel jtul jtojteswanej yu'un David, Ahitofel sbiil, te nainem ta Gilo, swenta yu'un ya me xjoinot yu'un te c'alal yac ta yaq'uel a te milbil smajt'an Diose. Ja' yu'un bebe yich'bel yip sc'op, soc yac xan ta esmajel te mach'atic ya st'unic te Absalón.

Loc' ta anel David ta Jerusalén

¹³ Jtul abat bajt' ta alel yu'un te David te bit'il spisil israeletic bajt'ix yo'tanic ta stojol Absalón.

¹⁴ Ja' yu'un te David la spas ta mandal ta spisil te abatetic yu'un sjoinej ta Jerusalén: —¡La', anucotic ta ora, ma me xcolotic ta sc'ab Absalón yo'tic! ¡Suja abaic! Teme ayuc tey ya xjul staotic, ya me spasbotic bila amen, ya me smilotic ta spuñal soc jlumaltic —xi'.

¹⁵ La sjac'beyic te sc'op te muc' ajwalil: —Te jo'otic jun co'tan ya jch'uuntic spasel te bi ya awale, muc' ajwalil cu'untic —xiic.

¹⁶ Jich loc' bael te muc' ajwalile, joinbil yu'un spisil te mach'atic ayic ta sna. Ja' xanix la yijq'uitay lajuntul antsetic yu'un, swenta yu'un ya xcanantaybot sna.

¹⁷ Te c'alal loc' bael te muc' ajwalil soc te mach'atic joinbil yu'une, la to scom sbaic ta slajibal na yu'un te lume.

¹⁸ Ta xujc' la yac' sbaic te abatetic yu'une. Yan te cereteoetic soc te peleteoetic, ja' te jcananetic yu'un ajwalil, soc te lajunwinic xcha'bajc' (600) geteoetic te t'unot tel yu'un c'alal ta lum Gat, spisilic neelajic c'axel ta stojol.

¹⁹ Ja' yorail a c'opoj te muc' ajwalile. Jich la yalbey te Itai talem ta Gat: —¿Bi yu'un tal ajoinotic? Ja' lec te ya sujt'ate, ya xjilat soc te yach'il muc' ajwalile. Melel te ja'ate jyanlumat nix a, ch'aybilatix yu'un alumal,

²⁰ melel wojey to nax julat yaiyel. Ja' yu'un ma jc'an te ya xtal ajoinotic, melel ni jo'ucon ya jna' banti yacalon ta bael. Ja' lec te ya sujt'ate, soc ic'a sujt'el te jayeb alumale. Ac'a yac'bat bendición, soc ac'a sjoinat spisil ora te Cajwaltique —la yut.

²¹ Te Itai la sjac'bey sc'op te muc' ajwalil: —Ya cal ta jamal ta stojol te Cajwaltic soc ta atojol te bayuc ya xbaat, manchuc me ya xlajat o ya xcuxinat, tey me ayon a te jo'on te awabatone —xi'.

²² —Bueno, conic jiche —xi' ta sjaq'uel te David. Jich bajt' soc David te Itai soc spisil te swinictaque, soc te yantic mach'atic sjoinejique.

²³ Spisilic yacalic ta buen oq'uel. C'axic bael spisil swinictac te David ta uc'um Cedrón. Ta spatic c'ax bael te muc' ajwalile. Spisil te swinictaque ja' neelajic bael ta sbelal jochol taquin q'uinal.

²⁴ Soc tey ay bael a te Sadoc soc spisil te levitaetic te yich'ojic te cajón yu'un te trato yu'un Dios. La yaq'uic jilel soc Abiatar, ja' to te c'alal laj ta loq'uel spisil te swinictac David.

²⁵ Pero te muc' ajwalil jich la yalbey te Sadoc: —Ich'a sujt'el ta lum te cajón yu'un te Diose. Teme la to sna'bon yo'bolil jba te Cajwaltique, ya me yac'on xan sujt'el tel, soc ya quil xan te cajón soc te banti aye.

²⁶ Yan teme ya yalbon te ma lecucon ta stojole, ayon ta sc'ab, ac'a spasbon te bi ya sc'an ya spasbone —xi'.

²⁷ Te muc' ajwalil jich la yalbey xan te sacerdote Sadoc: —Aiya awaiy, ja'at soc Abiatar junuc awo'tanic ya me sujt'ex bael ta yut lum soc te anich'nabique, ja'ex soc te anich'an Ahimaas soc te snich'an Abiatar te Jonatán sbiile.

²⁸ Yan te jo'one ya to xjilon ta tec'oja' te ay ta jochol taquin q'uinal. Ya me jmaliy bi c'opil ya aticunbonic ta alel —xi'.

²⁹ Sadoc soc Abiatar la yich'ic sujt'el ta Jerusalén te cajón yu'un Dios, tey jilic a.

³⁰ Te David mo bael ta Wits Olivailtic. T'axal yacan, ma'yuc step, yac ta oq'uel, soc smacoj sjol seña xc'uxul wocol. Spisil te mach'atic joinbil yu'une, smacoj sjolic uuc, soc yacalic ta oq'uel ta moel.

³¹ Te c'alal albot te David te ja' nix te Ahitofel te sjoy ta jach-c'op te Absalón, la yalbey wocol Cajwaltic yu'un te yacuc yac' ch'ayuc ta jich nax te bi ya yal te Ahitofel.

³² C'alal c'ot ta ba wits te David te banti ya yich' ch'uunel Dios, loc' tel ta stojol te Husai te sts'umbal arquitaetic, jatsem sc'u' soc scojt'ol lum sjol.

³³ Te David jich la yalbey: —Teme ya xtal at'unone, tojol ya xtal awac'bon quijc'ats c'oem.

³⁴ Yan teme ya sujt'at bael ta Jerusalén, teme jich ya xc'o awalbey te Absalón: “Muc' ajwalil cu'un, jo'on te abaton awu'une, ya cac' jba ta abatinel ta atojol, jich nix te bit'il ta neelal to la cac' jba ta abatinel ta stojol te atate”, teme xi' ya xc'oate, ya acoltayon ta xch'ayel sc'oplal spisil te bi ya yal te Ahitofel te jichuque.

³⁵ Tey me ayic a te sacerdote Sadoc soc te sacerdote Abiatar. Jich me ya xju' ya awalbey spisil ora te bi ya awaiy ta sna te muc' ajwalile.

³⁶ Te snich'anic, Ahimaas soc Jonatán, tey nix ayic a. Ja' yu'un ja' me ya awalbeyic te ya yac'bonic jna' spisil te bitic ya awaiyique —la yut.

³⁷ Te Husai te jun yo'tan sba soc te Davide, ja' yorail c'ot ta Jerusalén a te bi ora och ta Jerusalén uuc te Absalón.