2 Samuel 14 - Bible in Tzeltal de Oxchuc y Tenejapa

Joab ju' yu'un la yic' sujt'el Absalón

¹ Te Joab, yal Sarvia, la yil te tey ayix yo'tan a te muc' ajwalil ta stojol te Absalón.

² Ja' yu'un la sticun ta iq'uel tel jtul ants nainem ta Tecoa te mero ay sp'ijil yo'tan, jich la yalbey: —Pasa aba te ayat ta mel-o'tan, lapa c'u'il swenta mel-o'tan, ma me xawac'bey aba perfume. Melel ya me sc'an te jich ya awac' aba te bit'il ants te ayix bayal c'aal te ay ta mel-o'tan ta swenta te ay mach'a lajem yu'une.

³ Ya me xba atejc'an aba ta stojol te muc' ajwalile, soc mero jich ya xc'o awalbey te bit'il ya calbat awaiye —la yut. Te c'alal Joab laj yo'tan ta yalel te bi ya xc'o yal ta stojol muc' ajwalil,

⁴ te ants talem ta Tecoa bajt' ta stojol te muc' ajwalile. La stinan sba coel c'alal ta lum, la yac'bey sta lum te sti'ba swenta seña yich'el ta muc', jich la yalbey: —Wocoluc, muc' ajwalil, coltayawon —xi' c'oel.

⁵ La sjojc'o te muc' ajwalile: —¿Bi la apas? —xi'. La sjac' te antse: —Jilemon ta me'ba antsil, lajem jmamlal.

⁶ Ay cheb calatac te jo'on te awabatone, la smaj sbaic ta aquiltic. Pero ma'yuc mach'a jatotic yu'un, te jtule la yejch'entes te yane, jc'axel la smil.

⁷ Yo'tic spisil te jpat-jxujq'ue ma lecuc yo'tanic ta jtojol, ya sc'anic te ya cac'bey ta sc'abic te mach'a la smil te yermano. Yu'un laj ya sujt'esbey spacol te xch'ich'el te mach'a laj ta milele. Jich ya smilic te jtul xan mach'a ay ta swenta yich'el jilel te bi ay yu'un te state. Jich ya stup'bonic te jun xan ac'al c'oem te jil cu'une. Jich ya stup'beyic sts'umbal soc sbiil ta balumilal te jmamlale —xi' te antse.

⁸ Jich te muc' ajwalil la sjac'bey sc'op te antse: —Baan ta ana, ya me cal mandal te lec ya awich' chajbanele —xi' sc'oplal.

⁹ La sjac' te ants: —Muc' ajwalil cu'un, cajwal, teme ay mach'a ya x'ac'bot smuline, ac'a c'otuc ta jwenta jo'on soc te mach'atic ay cu'un ta swenta te jtate, pero ma me ja'ucat, soc ma me ja'uc xtaot ta alel te awat'ele —xi'.

¹⁰ La sjac' te muc' ajwalil: —Teme ay mach'a ay bi ya yal ya spasbate, ic'bon tel. Jich ma'yuc bi ora ya yuts'inatix a —xi'.

¹¹ Pero cha'c'opoj xan te antse: —Wocoluc, muc' ajwalil cu'un, c'oponbon te Cajwaltic te Dios awu'une, te manchuc ya yac'bon xan jwocol te jpat-jxujc' yac ta sc'anel spacol te bit'il laj te cale, te bit'il ya sc'an ya smilbonic xan te jtul xan cale —xi'. Te muc' ajwalil jich la yal xan: —Ya cal ta jamal ta stojol Cajwaltic te ma'yuc bi ora ya xch'ay jlijc'uc stsotsil sjol ta lum te awale —xi'.

¹² Pero te ants cha'c'opoj xan: —Ac'awon xan ta c'op te jo'on te abaton awu'une, jp'aluc xanix, teme ya awac'bon permisoe —xi'. —C'opojan —xi' te muc' ajwalile.

¹³ Jich la yal te antse: —¿Bi yu'un jiche te ya ac'an jich ya apasbey ta swenta scontroinel te lum yu'un te Diose? Jich te bit'il ja'at nix jich awaloje, ja'at nix amul te bit'il ma xawac' sujt'uc tel te anich'an jc'axel ch'aybil.

¹⁴ Jna'ojtic te jpisiltic ya xlajotic, jichotic te bit'il ja' te ya xmal ta lum, ma spasix ta tsobel. Pero te Diose ma'yuc mach'a ya slajinbey xcuxlejal, ya slebey bi ya yut ya yac' sujt'uc tel ta stojol, swenta yu'un te mach'a ch'ayem baele ma ba spisil ora c'ubul ay ta stojol a.

¹⁵ Lec ay, te bit'il talon ta yalel ta atojol, ja'at cajwal, ja' yu'un te ja' la xiwteson te ants-winiquetique. Ja' yu'un talon ta c'op ta atojol te abaton awu'une, teme ay bit'il ya apasbon a te bi yacon ta sc'anele.

¹⁶ Teme ya awich'bon ta wenta te jc'ope, ya me xju' ya xcolon loq'uel ta sc'ab te mach'a ya sc'an sbulon loq'uel soc te cal, tey ta lumq'uinal te ja' yu'un te Diose.

¹⁷ Jo'on te abaton awu'une ya jmaliy te sujt'ib ta atojol, swenta yu'un ja' me ya smuc'ubtesbon q'uinal caiy, melel te ja'ate ya ana' stsajtayel banti lec soc banti ma lecuc, jich te bit'il ch'ul abat yu'un te Diose. Ac'a sjoinat te Diose, ja' te Cajwaltique —xi' te antse.

¹⁸ Te muc' ajwalil la sjac'bey sc'op te ants: —Wocoluc, ma me x'amuc ta awo'tan te bila ya jojc'obate —xi'. —C'opojan, muc' ajwalil —xi' te antse.

¹⁹ Te David la sjojc'obey: —¿Ja' bal la yac'bat apas spisil te Joab, te bitic yacat ta spasel in to? —xi'. La sjac' te antse: —Ya calbat ta jamal ta atojol, cajwal, melel te bit'il yacalat ta yalele. Melel nix a, ja' te Joab te general yu'un soldadoetic awu'une, ja' la spason ta mandal, ja' nix la yalbon te bitic la cale.

²⁰ Pero ja' jich la spas yu'un yo'tan ya xyanaj a te bitic jajch'eme. Pero te ja'ate mero bayal sp'ijil awo'tan, jich te bit'il ch'ul abat yu'un Dios te spisil ya sna' te bi ya xc'ot ta pasel ta nación cu'untique —xi' te antse.

²¹ Te bit'il jich c'ote, te muc' ajwalil jich la yalbey te Joab: —Ila awil, te c'ope chapalix cu'un. Baan, ic'a sujt'el tel te querem Absalón —xi'.

²² Te Joab la stinan sba coel c'alal ta lum, la yac'bey sta lum sti'ba, seña yich'el ta muc'. La yalbey yutsil sc'oplal te muc' ajwalil, jich la yalbey: —Yo'tic la quilix te ayon ta wenta awu'une, melel la awich'bon ta wenta te jc'ope, soc la apasbon te bi la jnop te jo'on te awabatone —xi'.

²³ Te Joab ora bajt' ta Gesur ta yiq'uel tel te Absalón, la yic' tel ta Jerusalén.

²⁴ Pero te muc' ajwalil la yal mandal te toj ya xbajt' ta sna, te ma ba ya xba stejc'an sba ta stojole.

²⁵ Ta spisil Israel ma'yuc yan winic pajal st'ujbilal soc te Absalón, soc buen mulanbil yu'unic. Ta yoc c'alal ta sjol, ma'yuc falta yu'un.

²⁶ Ta jujun to slajel ja'wil ya set' te stsotsil sjol, yu'un laj ya x'uts'inot yu'un ya yaiy. C'alal ya set' te stsotsil sjole, c'axem ta cheb kilo yalal ta sp'isol te bit'il yaloj te ajwalile.

²⁷ Te Absalón ay oxeb squerem-nich'nab soc jtul yantsil-nich'an, Tamar sbiil, mero t'ujbil ach'ix.

²⁸ C'ax cheb ja'wil te Absalón ay ta Jerusalén, te ma ba ac'bot permiso te la stejc'an sba ta sit te muc' ajwalile.

²⁹ Te Absalón la yalbey te Joab te yacuc xbajt' ta c'op yu'un ta stojol te muc' ajwalile. Pero te Joab ma ba la sc'an te ya xbajt'e. Ta xchebal buelta la xcha'albey te Absalón te yacuc xbajt'e, pero ma ba bajt'.

³⁰ Ja' yu'un te Absalón la spas ta mandal te abatetic yu'une: —Ila awilic, te sq'uinal Joab slac'oj sba soc te cu'une, sts'unojbey cebada. Baanic, tsumbeyaic sc'aal —la yut. Te abatetic yu'un Absalón, bajt'ic, la stsumbeyic sc'aal te sq'uinal Joab.

³¹ Te Joab ora bajt' ta sna te Absalón, la sjojc'obey: —¿Bi yu'un la yac'beyic sc'aal te jq'uinal te abatetic awu'une? —xi'.

³² La sjac' te Absalón: —La jticunat ta iq'uel tel li'to yu'un ya jticunat bael ta yilel te muc' ajwalile, soc te ya awalbey te tojol c'oem te talon ta Gesur, ja' lec yaiyel te teyuc jilon a. Co'tanuc ya xba quil te muc' ajwalile. Teme ay bi jmulinej ya yaiye, ac'a smilon —xi'.

³³ Jich bajt' te Joab, ba yil te muc' ajwalile, la yalbey te bi la yal te Absalón. Te muc' ajwalil la sticun ta iq'uel. C'alal c'ot te Absalón ta stojol te muc' ajwalile, la stinan sba coel c'alal ta lum, la sta lum te sti'bae. Te muc' ajwalil la yic' ta stojol ta swenta bujts'iyel.