2 Samuel 13 - Bible in Tzeltal de Oxchuc y Tenejapa

Ya yalbey sc'oplal Tamar

¹ Te Absalón snich'an David ay jtul yijts'in-ach'ix, buen t'ujbil, Tamar sbiil. Pero ay yan yijts'in, Amnón, snich'an nix David, mero bayal la smulan te ach'ixe.

² Ay swocol la yaiy yu'un. Bayal bi la snopilay ta yo'tan, asta tsacot ta chamel yu'un te bayal bila snope. Melel te yijts'in Tamar ma'yuc tabil ta winic, ja' yu'un mero wocol ya xwejt' yu'un te bi ya xju' ya yute.

³ Pero te Amnón ay jtul te mach'a jun yo'tan sba soque te mero ay sp'ijil, Jonadab snich'an Simea, ja' nix sbanquil te David.

⁴ Ay jun c'aal la sjojc'o te Jonadab: —¿Bi ya apas, Amnón, snich'an ajwalil? ¿Bi yu'un te jujun c'aal yantic awilel ta bolobel ya quil? ¿Ma bal xju' ya awalbon caiy? —xi'. Te Amnón la sjac': —Yu'un ja' mero bayal ya jmulan te Tamar te yijts'in te quermano Absalón —xi'.

⁵ Te Jonadab jich la yal: —Mejts'ana aba ta awayib, pasa aba te yacat ta chamel. Te c'alal ya xba yilat te atate, albeya wocol ac'a sticunbat tel te awijts'in Tamar, swenta yu'un ya yac'bat awe'el, soc tey nix ya xchajbanbat a te we'elile, swenta yu'un ya me awil soc ya awe' te bi ya yac'bat stuquele —xi'.

⁶ Te Amnón och bael ta swayib, la spas sba te ay ta chamel. Te c'alal bajt' ta ilel yu'un te muc' ajwalile, te Amnón jich la yalbey: —Wocoluc, ac'a taluc te quijts'in Tamar. Ac'a tel spasbon cha'pejch'uc lequil pan, soc ja' nix ac'a yac'bon jwe' —xi'.

⁷ Jich te David la sticun bael ta sna Amnón te Tamar, jich la yalbey: —Wocoluc, baan ta sna abanquil Amnón, pasbeya jtebuc bi ya swe' —xi'.

⁸ Te Tamar bajt' ta sna te sbanquil Amnón te wayal ta swayibe. La stsac harina, la swots'. Tey nix la spasbey ta sna. La stac'ajtes,

⁹ patil la stsac te sartén, la yac'bey swe' te pane. Pero te Amnón ma ba la sc'an ya swe'. La yal mandal te ya xloc' spisil te mach'atic tey ayic a.

¹⁰ Te c'alal spisil loq'uiquix, te Amnón jich la yalbey te Tamar: —Ich'a tel li' ta banti ayon te we'elile. Ja'at nix ya awac'bon —xi'. Te Tamar la stsac te pan la spase, la yich'bey bael te sbanquil Amnón tey ta swayib banti aye.

¹¹ Pero te c'alal noptsaj ta stojol yu'un ya swe' te pane, la stsac te Tamar, jich la yalbey: —La', quijts'in, la', wayucotic —la yut.

¹² Jac'bot yu'un: —Ma'uc, xi'lel, ma xaboltesbon jc'oplal. Melel ma'yuc jich ta pasel ta Israel te bi ya apase, ma xapas te bi ilaybile.

¹³ ¿Banti ya xboon soc te jq'uexlale? Soc jichat uuc, jich ya xc'oat ta stojol Israel te bit'il bole. Wocoluc c'opona te muc' ajwalil, te yacuc yac' permiso te ya xnujbinotic —xi'.

¹⁴ Te Amnón ma ba la yich' ta wenta. Te bit'il ay yip te Amnón, ja' peq'uel yip te Tamar, la stsac ta tulan, jich way soc ta puersa.

¹⁵ Pero ora nax jc'axel bolob ta sit te Amnón, mero ilaybil c'ot yu'un la yaiy ta yo'tan. C'ax jich la yaiy a te bit'il yac to smulanbel a. Ja' yu'un la spas ta mandal, jich la yalbey: —Jajch'an, baan —la yut.

¹⁶ La sjac' te Tamar: —Ma'uc, xi'lel, melel teme ya atenon loq'uel li' yo'tique, c'axem to xan me jich ma lecuc ya xc'ot a te bi la apasbonixe —xi'. Pero te Amnón ma ba la sc'an la yich'bey ta wenta.

¹⁷ La yic' tel te abat yu'une, jich la spas ta mandal: —Tena loq'uel te antse, ora xamac ta lec te ti'naile —xi'.

¹⁸ Te abat la sten loq'uel ta na, ora la smac. Te Tamar slapoj buen t'ujbil snajt'il c'u' te stalel jich ya slapic te yantsil-nich'an ajwalil te ma to nujbinemuque.

¹⁹ Pero la yac' stanul c'ajc' ta sjol, la sjats te snajt'il c'u' slapoje. Xchebal sc'ab smojt'esej ta sjol, yac ta oq'uel bael ta xch'ixil be.

²⁰ Te sbanquil Absalón jojc'obot yu'un: —¿Ja' bal te abanquil Amnón te jich la spasbate? Ch'abanix, quijts'in, melel ja' abanquil. Ja' lec te ma'yuc bayal sc'oplal ta awo'tan te bi c'ot ta pasele —xi'. Te Tamar, c'alal la yil te pijt'esbile, jil ta sna sbanquil Absalón.

²¹ Te c'alal la yaiy ta lec spisil te bi c'oem ta pasel te muc' ajwalil David, bayal ilin yo'tan yu'un, pero ma'yuc bi la yalbey te snich'an Amnón, melel ja' banquilal, ja' yu'un lom c'ux ta yo'tan.

²² Jich nix te Absalón ma'yuc bi la yalbey te Amnón, manchuc me xcupet slab yo'tan yu'un te la sjinbey sc'oplal te yijts'in Tamar.

Absalón ya sujt'esbey spacol ta stojol Amnón

²³ C'alal c'axix cheb ja'wil a, te swinictac Absalón yacalic ta sloq'uesel stsotsil chijetic ta Baal-hazor te nopol ay ta lum Efraín. Te Absalón c'an yic' ta we'el spisil te snich'nab muc' ajwalile.

²⁴ Jich c'o yil te muc' ajwalil, jich la yalbey: —Yo'tic te bit'il yacalic ta sloq'uesel stsotsil chijetic cu'un te jwinictaque, co'tanuc te ja'at soc te abatetic awu'un, te yacuc xba ajoinon te abaton awu'une —xi' c'oel.

²⁵ Pero te muc' ajwalil jich la yal: —Ma'uc, jnich'an, ma xju' ya xbootic ta jpisiltic, melel bayal bi ya xlaj awu'un —xi'. Manchuc me la yac' puersa wulwonel te Absalón, ma ba la sc'an bajt' te muc' ajwalile, pero la sc'anbey bael bendición.

²⁶ Te Absalón jich la yal xan: —Teme ma xju'e, ac'a bael sjoinotic te jbanquil Amnón —xi'. La sjojc'obey te Davide: —¿Bi yu'un te ya ac'an ya sjoinat te Amnón? —xi'.

²⁷ Pero te Absalón mero la yac' puersa ta sc'anel te muc' ajwalil te yacuc x'ac'bot bael sjoin te Amnón soc te yantic snich'nabe. Te Absalón xchajbanej mero lequil we'elil swenta muc' ajwalil yilel.

²⁸ Jich la yalbey te abatetic yu'une: —Ya me awilic ta lec te Amnón te c'alal yacubenix yu'un te vino. Te c'alal ya calbeyex te ya amilique, milaic me. Ma me xiwex ta smilel, melel jo'on jmandal. Ja' yu'un ma me xiwex, ayuc me yip awo'tanic ta spasel —xi' ta stojol te swinictaque.

²⁹ Ja' yu'un jich c'ot ta pasel te smandal te Absalón. Te abatetic yu'un la smilic te Amnón. Ja' yu'un spisil te snich'nab te muc' ajwalil, mo ta smulaic soc bajt'ic ta anel.

³⁰ Te c'alal ayic bael ta be, te David la yaiy te milbot spisil snich'nab yu'un te Absalón, ma laj ayuquix cuxul jilel jtuluc.

³¹ Ja' yu'un te muc' ajwalil jajch', la sjats sc'u' swenta seña xc'uxul mel-o'tan soc la xchawan sba ta lum. Spisil te abatetic yu'un te tey ayic a, la xch'i' sc'u'ic uuc.

³² Pero te Jonadab te snich'an Simea te sbanquil David, c'opoj, jich la yal: —Muc' ajwalil, ma me xacuy te spisil laj ta milel te anich'nabe. Ja' nax laj te Amnón. Melel jich la xchap ta yo'tan te Absalón te c'alal stsacbot te yijts'in Tamar yu'un te Amnón.

³³ Ja' yu'un ma me xacuy te spisil lajic te anich'nabe, ja' nax lajem te Amnón —xi'.

³⁴ Te Absalón bajt' ta anel. Te querem ay ta il-q'uinal, la stoy sit, la yil tsobol winiquetic yacalic ta coel tel ta be yu'un Horonaim ta xujc' wits. Ja' yu'un te querem ay ta il-q'uinal, ba yalbey te muc' ajwalil te la yilix winiquetic yacalic ta coel ta be yu'un Horonaim.

³⁵ Te Jonadab jich la yalbey te muc' ajwalile: —Taliquix te anich'nab, jich nix te bit'il la calbat te jo'on te awabatone —xi'.

³⁶ Yac to nax ta lajel yo'tan ta c'op a, c'otic te snich'nab te muc' ajwalil, jajch'ic ta buen oq'uel. Ja' nix jichic te muc' ajwalil soc spisil te abatetic yu'une, mero bayal oq'uic.

^37-38 Yan te Absalón bajt' ta anel stuquel, ba ainuc ta stojol Talmai snich'an Amiud, muc' ajwalil yu'un Gesur. Tey jalaj oxeb ja'wil a. Te David, jujun c'aal ya x'oc' yu'un te laj te snich'an Amnón.

³⁹ Pero te c'alal muc'ub q'uinal la yaiy te la smel yo'tan yu'un te laj te Amnón, tal yutsil yo'tan ta stojol te Absalón, mero yo'tanuc xyilbey sit.