2 Samuel 12 - Bible in Tzeltal de Oxchuc y Tenejapa

Natán la stij ta c'op David

¹ Te Cajwaltic la sticun Natán te j'alwanej yu'une, ba yil te David. C'alal c'ot te Natán ta stojol, jich la yalbey: —Ta jpam lum ay cheb winiquetic. Te jtule buen jc'ulej. Te yane me'ba stuquel.

² Te jc'uleje ay mero bayal chijetic soc wacaxetic yu'un.

³ Pero te me'ba jip nax jcojt' me' chij te smanoje. Ja' nix la xch'ijtes te me' chije, muc'ub, ja' nix jun ay soc. Jun ay soc te snich'nabe, ja' nix la swe'elinbey te swe'ele, soc tey la yuch' ja' te bay nix svaso, soc ya xway ta stan. Te winic lom bayal c'ux ta yo'tan, jich ta yo'tan te bit'il yantsil-nich'ane.

⁴ Pero ay jbeom c'ot ta ula'tayel yu'un te jc'ulej winique. Te jc'ulej winic ma la sc'an la stsac jcojt'uc te xchije, soc ni ja'uc la stsac jcojt' swacax yu'un ya spasbey swe' te yula'e. Ja' la spojbey te sme' xchij te winic te buen me'bae. La spasbey yu'un ya yac'bey sti' te mach'a julem tel ta ula'tayel yu'une —xi' te Natane.

⁵ Te David bayal jajch' slab yo'tan ta stojol te jc'ulej winic yac ta alel sc'oplale. Jich la yalbey te Natán: —Ya calbat ta jamal ta stojol Dios, te mach'a jich spasoj, ja' ya sc'an te ya xlaje.

⁶ Soc ya me stoj chaneb buelta te bit'il stojol te sme' xchije, melel mero amen bi la spas te bit'il ma ba la sna'bey yo'bolil sba —xi'.

⁷ Te Natán jich la yalbey: —Ja'at te jc'ulejate. Jich yalojix ta jamal te Cajwaltic te Dios yu'un Israel: “Jo'on la jtsaat yu'un ya x'ochat ta muc' ajwalil yu'un Israel, la jcoltayat ta sc'ab Saúl.

⁸ La cac'bat te sna soc te antsetic yu'un te awajwale, soc la cac'bat awentain te Israel soc Judá. Teme ma ba bayal ya awaiy, ay to yan bitic ya cac'bat a te jichuque.

⁹ ¿Bi yu'un te ma'yuc sc'oplal ta awo'tan te jc'ope? ¿Bi yu'un ja' la apas te bi ma jmulane? Melel la achap ta awo'tan te la amil te Urías te hitita-winique, ja' la awac' milotuc yu'un te amonetique. Soc la awic'beyix te yiname.

¹⁰ Te bit'il ma ba la awich'on ta muq'ue, te la awic'bey te yinam Urías te hitita-winique, te la awinaminbeyixe, ma'yuc bi ora ya xquejch'aj te lajel ta milel ta stojol te mach'atic ay awu'une.

¹¹ Jo'on te Awajwalon ya cal ta jamal: Ja' ni me te mach'atic ay awu'un te ya cac' yac'bat te awocole, soc ta asit ni me ya quic'bat te antsetic awu'une, ya me cac'bey ta sc'ab te mach'a ma yanuc parte awu'une. Ja' me ya xway soc, ya me xchicnaj ta ilel ta c'aaleltic ta sacal q'uinal.

¹² Teme muquen la apas te ja'ate, te jo'on ta scomonsitic spisil Israel soc ta sacal q'uinal ta c'aaleltic ya jpas”, xi' te Cajwaltic —xi'.

¹³ Te David jich la yal ta stojol te Natán: —La jta jmul ta stojol te Cajwaltique —xi'. Jac'bot yu'un Natán, jich la yal: —Te Cajwaltic la spasbatix perdón yu'un te amule, ma ba ya xlajat yu'un.

¹⁴ Melel mero tulan sc'oplal te bi la awac' ilinuc yo'tan yu'un te Cajwaltique, ja' yu'un te anich'an ayinel to, ya me xlaj —xi' sc'oplal yu'un.

¹⁵ Te c'alal sujt' bael ta sna te Natán, te Cajwaltic la yac' tel tulan chamel ta stojol te alal ayin yu'unic te David soc te yinam Urías.

¹⁶ Te David jajch' yalbey wocol Dios yu'un te alale, la scom swe'el, metsel ta lum a ya xc'ax yu'un te jujun ajc'ubale.

¹⁷ Te mamaletic te ayic ta sna te muc' ajwalil, ba yalbey wocol te yacuc xjajch' tey ta lum te banti metsele, pero ma ba la sc'an jajch', soc ma ba la sjoinic ta we'el.

¹⁸ Ta sjuquebal c'aal a laj te alalquerem, pero te sjoy te David la xi'ic yalbeyel, yu'un la scuyic te ay bi amen ya spasbey sba te David. Jich la yalic: “Te c'alal cuxul to a te alalquereme, la jc'opontic, ma ba la yich'otic ta wenta. ¿Bit'il ya calbeytiquix a te lajix te alalquereme?” xiic.

¹⁹ Pero te David la yil te sjo'tac ta at'el te ay bi bayal sc'oplal yilel ya yalbey sbaic. La sna' te lajix te alalquereme. La sjojc'obey: —¿Laj balix te alalquereme? —xi'. —Lajix —xiic.

²⁰ Jich ora te David, jajch' ta lum, atin, la yac'bey sba perfume, la sjeltay sc'u'-spac', och bael ta templo ta xch'uunel te Cajwaltique. Patil bajt' ta sna, la sc'an swe'el.

²¹ Te sjo'tac ta at'el jojc'obot yu'un: —¿Pero bi ya apas, ajwalil cu'untic? Te c'alal cuxul to a te alalquerem, la acom awe'el, la awoq'uetay. Yo'tic lajix te alalquereme, jajch'atix, we'atix —xiic ta stojol.

²² La sjac' te David: —Te c'alal cuxul to a te alalquerem, la jcom jwe'el soc oc'on, yu'un la cal: “Te ayuc ya sna'bon yo'bolil jba te Cajwaltique, soc yacuc yac' cuxinuc te alalquereme”, xoon ta co'tan.

²³ Pero yo'tic te bit'il lajixe ¿bi stuc xan ya jcom jwe'el? Melel ma xju' cu'un te ya cac' cha'cuxuque. Ja' ya xboon join tey a, pero ma ja'uc ya xtal sjoinon xan stuquel —xi'.

Ayin Salomón

²⁴ Patil te David ba smuc'ubtesbey q'uinal yaiy te Betsabé ja' te yiname. La xcha'ta xan sba soc te c'alal ba yile. Jich la yac' xan jtul yal, Salomón la yac'bey sbiilin te David. Te Cajwaltic c'ux la yaiy te alalquereme,

²⁵ jich yu'un Dios la spas ta mandal te Natán, te j'alwanej yu'une, te Jedidías ya xc'ot sbiil te alalquerem yu'une.

David la yu'unin lum Rabá

²⁶ Te Joab yacal ta yaq'uel guerra te lum Rabá, te slumal te amonetique. Te c'alal ju'elix ta tsalel a te muc'ul lume,

²⁷ la sticunbey ta alel te David: “Yacon ta yaq'uel guerra ta lum Rabá. La cu'uninix te ch'in lum te banti ay ja'e.

²⁸ Ja' yu'un tsoba te soldadoetic jilemique, la', ac'beya guerra te lume. U'unina, swenta yu'un ma me jo'ucon te ya jpase, soc ma me jo'ucon jbiil ya yich'bon”, xi'.

²⁹ Te David la stsob spisil te soldadoetic yu'une, bajt' ta stojol Rabá. La yac'bey guerra, jich la yu'unin.

³⁰ Patil la sloq'uesbey ta sjol te muc' ajwalil yu'unic te scorona oro te yich'oj t'ujbil tonetique, te oxlajuneb xcha'winic (33) kilo yalale, la yac'beyic ta sjol. Soc la stsob te bitic bayal stojol, la yich'ic loq'uel tel ta lum.

³¹ Te jayeb xan te mach'atic jilemic to, la yich'ic loq'uel. La yac' ta at'el ta sierra, la yac'bey snit at'ejibal yu'un swuyel trigo, la yac' ta at'el ta echej, soc la yac' ta at'el ta hornoetic yu'un ladrillo. Ja' nix jich la spasbey spisil ta jpam lumetic yu'un te amonetique. Patil sujt' xan bael ta Jerusalén soc spisil te soldadoetic yu'une.