2 Samuel 11 - Bible in Tzeltal de Oxchuc y Tenejapa

David soc Betsabé

¹ Te David ay jun buelta te la sticun bael te Joab soc te capitanetic soc ta spisil te soldado-israeletique. Ja' yorail te xjajch'ibal snajt'il c'aal te jich la spase, yu'un ja' yorail te c'aem ya xloq'uic ta guerra te ajwaliletique. Te soldado-israeletic la slajinic te amonetique, soc la sjoytaybeyic te slumale, ja' te Rabá. Pero David jilem ta Jerusalén.

^2-4 Ta jun mal c'aalil jajch' ta swayib te David, och ta comcom beel ta yamaq'uil sba na. Tey la sta ta ilel jtul buen t'ujbil ants a, yac ta atimal. Lajel to xchajbanbel sba ta stojol Dios yu'un te xchamel swenta jujun u. Te David la sticun ta jojc'oyel te mach'a a te antse. Albot yaiy te Betsabé sbiil te antse, yantsil-nich'an Eliam, yinam Urías, ja' te hitita-winique. Te David la sticun abatetic yu'un ya x'ic'bot tel, way soc, patil sujt' bael ta sna.

⁵ Te antse la yic' yal, jich la yalbey yaiy te David.

⁶ Jich te David la sticunbey ta alel mandal te Joab, te ya sticun tel te Urías, ja' te hitita-winique. Jich la spas te Joab.

⁷ Te c'alal jul ta stojol David te Urías, te David la sjojc'obey te bi yilel ay te Joab soc te soldadoetic, soc te yacuc x'albot yaiy te bit'il ay te guerra.

⁸ Patil la sticun bael ta sna, soc la yalbey te yacuc xba scux yo'tan ta sna. Te c'alal loc' bael ta sna muc' ajwalil te Urías, te muc' ajwalil la sticunbey we'elil yu'un smajt'an te Urías.

⁹ Pero te Urías ma ba bajt' ta sna. Tey nax c'ax ajc'ubal yu'un ta sti'il sna te muc' ajwalil soc te soldadoetic swentainejic scanantayel te ajwalile.

¹⁰ Te c'alal albot yaiy te David te ma ba baem ta sna te Urías, te David la sjojc'obey: —¿Bi yu'un ma ba baat ta ana te bit'il julelat toe? —la yut.

¹¹ La sjac' te Urías: —Te ch'ul cajón yu'un Dios, soc te soldadoetic yu'un Israel soc te soldadoetic yu'un Judá snainejic ja'mal na, soc ya xwayic ta aquiltic ta yol q'uinal te Joab te ja' general cu'une, soc te abatetic awu'une. Yan te jo'one ¿ya bal xju' teme ya x'ochon bael ta jna te ya xboon ta we'el ta uch'el soc ta wayel soc quinam? Jamal ya calbat ta atojol te ma ba ya jpas te bi ya awale —xi' te Urías.

¹² Pero te David, pasot ta mandal yu'un: —Jilan to yo'tic, pajel ya me cac'at bael —la yut. Jich te Urías jil to ta Jerusalén, ta xchebal to c'aal bajt'.

¹³ Te David la yic' sjoin ta we'el soc ta uch'el, la syacubtes. C'alal ijc'ub, loc' bael, bajt' ta wayel soc te soldadoetic te jcanan-muc'-ajwalile, pero ma ba bajt' ta sna.

¹⁴ C'alal sacub q'uinal ta xchebal c'aal, te David la sts'ibubey sjun te Joab. Ja' nix la yac'bey yich' bael te Urías.

¹⁵ Jich la yalbey bael ta carta: “Ja' me neel xawac' te Urías, te banti mero tulan te guerra. Pijt'esaic jilel stuquel, swenta yu'un ya me x'ejch'entesot, jich me ya xlaj jilel tey a”, xi'.

¹⁶ Ja' yu'un te Joab te c'alal la sjoytayic te lum, yu'un ya yochintay, ja' tey la sticun ochel a te Urías te banti sna'oj ayic te mero tulan soldadoetic yu'un te scontroe.

¹⁷ Jich ora loq'uic tel te mach'atic swentainejic scanantayel te lume, och yac'beyic guerra te Joab. Ay lajic ta guerra te capitán-soldadoetic yu'un David. Ja' tey laj a te Urías.

¹⁸ Te Joab la sticun ta alel te David bit'il mero ay te guerra.

¹⁹ Jich la yalbey bael te abat bajt' ta yalele: —Te c'alal ya xlaj awo'tan ta yalbeyel te muc' ajwalil te bitic swentail te guerra,

²⁰ teme ayuc ya x'ilin te muc' ajwalile, teme ya sjojc'obat: “¿Bi yu'un te mero noptsajex bael ta sts'ajc'ul te lume? ¿Yu'un bal ma ba ana'ojic jiche te ay bi ya xch'ojic coel tel ta ba ts'ajq'ue?

²¹ Jich bit'il te lum Tebes, jtul ants milot yu'un te Abimelec te snich'an Jerobaal, ta sba ts'ajc' to la xch'ojbey coel stonil molino. ¿Bi yu'un c'ax noptsajex bael ta ts'ajc' jiche?” teme xie, jich me ya awalbey: “Soc laj te awinic Urías te hitita-winique”, xaat me —la yut bael te abate.

²² Bajt' te abate. C'alal c'ot, la yalbey yaiy te David te bitic albot bael yu'un Joab. Pero ilinix yu'un ta stojol a te Joab, jich la yalbey te abat: —¿Bi yu'un c'ax noptsajex te c'alal la awac'bey guerra te lume? ¿Yu'un bal ma ba ya ana'ic jiche te ay bi ya xch'ojic coel tel c'alal ta sba te ts'ajq'ue? Jich bit'il ta Tebes, te jtul ants milot yu'un te Abimelec te snich'an Jerobaal, la xch'ojbey coel tel ta sba ts'ajc' jun cha'. ¿Bi yu'un c'ax noptsajex bael ta ts'ajc' jiche? —xi'.

²³ Pero la sjac' te abate: —Te soldadoetic loq'uic tel ta guerra ta jtojoltic, c'otic ta jamalal, ja' ju'em yu'unic a. Pero la jnutstic bael, la yich'ic nutsel bael c'alal ta yochibal te lume.

²⁴ Ja' yorail a te la yaq'uic te yat'ejibal st'imalte'ic te mach'atic yich'ojique, jich c'ot ta stojol te soldadoetic awu'une. Jich ay lajic te capitán-soldadoetic, tey laj a te Urías, ja' te hitita-winique —xi' te abate.

²⁵ Te David la yalbey te abate: —Albeya te Joab te ma'yuc bayal sc'oplal te bi c'ot ta pasele. Bi c'an cutic, melel scaj te guerra. Pero ac'a yac' xan puersa ta yaq'uel guerra te lume, asta ja' to teme jc'axel la slajine. Te ja'ate ac'beya xan me yip yo'tan —la yut.

²⁶ C'alal la yaiy te yinam Urías te lajix te smamlal, la yoq'uetay.

²⁷ Pero c'alal c'ax yorail te ya yoq'uetaye, te David la sticun ta iq'uel tel. La yic' ta stojol ta sna, la yic' yinamin. La yac' jtul yal, te Cajwaltic ma ba la smulan te bi la spas te David.