2 Samuel 10 - Bible in Tzeltal de Oxchuc y Tenejapa

David la stsal ta guerra siriaetic soc amonetic

¹ C'alal c'ax bael jtebuc c'aal, laj te Nahas, muc' ajwalil yu'un te amonetique; ja' jil ta swenta sjelol te snich'ane, ja' te Hanún.

² Te David jich la yal ta yo'tan: “Ja' lec teme jich nix lec co'tan ta stojol te Hanún snich'an Nahas te bit'il lec yo'tan ta jtojol te anima state”, xi'. Jich la sticun abatetic, swenta yu'un ya me yalbey te Hanún te pajal smeloj yo'tan soc yu'un te laj state. Pero te c'alal c'otic te abatetic yu'un David ta sq'uinal amonetique,

³ te jtsobwanej-amonetic jich la yalbeyic te Hanún te ajwalil yu'unique: —¿Ya bal ach'uun te ja' nax la sticun tel ta atojol yu'un te ay sc'oplal ta yo'tan te atate? Te ya caltique, la sticun tel swenta yu'un tal yilic bael bit'il ay, soc tal stsajtayic bitic ay ta jlumaltic. Patil ya me xtal slajin —xiic.

⁴ Ja' yu'un la yal mandal te Hanún te ya yich'ic tsaquel te abatetic yu'un David, soc te ya sloq'uesbeyic olil te yisimique, soc ya sjatsbeyic ta olil te sc'u'ique, ya xc'ot ta jatsel c'alal ta xcho yitic. Patil ya yac' bael.

⁵ C'alal la yaiy te David, la sticun ta tael, melel mero q'uexlal ayic. La sticun ta alel te ja' lec ya to xjilic ta Jericó, ja' to ya sujt'ic bael teme muc'ub xan te yisimique.

⁶ Te amonetic la sna'ic te bolob yo'tan ta stojolic te David. Ba yic' sjoinic jtab ta jmil (20,000) soldado-siriaetic ta Bet-rehob soc ta Soba, soc te muc' ajwalil ta Maaca la yac' jmil (1,000) swinictac, soc ac'botic lajchaymil (12,000) winiquetic yu'un Is-tob.

⁷ Pero te David la yaiy. Jich la sticun te Joab soc ta spisil ta xchajbal te soldadoetique.

⁸ Te amonetic talic, la xchajban sbaic yu'un guerra tey nix ta yochibal te lume. Jich nix te soldado-siriaetic talemic ta Soba soc ta Rehob, soc te soldadoetic yu'un Is-tob soc Maaca c'o yac' sbaic ta aquiltic.

⁹ Te Joab c'alal la yil te ya x'och ta aq'uel ta sit soc ta spate, la stsa te mero lequil soldado-israeletic, la xchajban sbaic yu'un ya yac'bey sbaic soc te siriaetique.

¹⁰ Te jayeb xan jil te soldadoetic la yac'bey ta swenta te yermano Abisai, swenta yu'un ya me yac'bey sbaic soc te amonetique.

¹¹ Te Joab jich la yalbey te Abisai: —Teme ja' ya stsalbelon ya awil te siriaetic, ya me xtal acoltayon. Ja' nix jich teme ja' ya stsalat ya quil te amonetique, jo'on me ya xtal jcoltayat.

¹² Ma me xiwat. Ta spisil me co'tantic ya cac'tic puersa ta guerra ta swenta scoltayel te nación cu'untique, ja' te lumetic yu'un te Dios cu'untique. Ja' me ac'a spas te bi lec ta pasel ya yil te Cajwaltique —xi'.

¹³ Te Joab jajch' bael soc te soldadoetic yu'une, ba yac'beyic guerra te siriaetique. Pero te siriaetic loq'uic ta anel yu'un.

¹⁴ Te c'alal la yilic te amonetic te yacaliquix ta anel te siriaetic, loq'uic ta anel uuc ta stojol te Abisai, ochic bael ta yutil lum. Te Joab la yijq'uitay jilel te amonetic, ma ba la yac'beyix guerra. Sujt' bael ta Jerusalén.

¹⁵ Te c'alal la sna' te siriaetic te tsalotiquix yu'un te israeletique, la stsob xan sbaic yan buelta.

¹⁶ Te Hadad-ezer la sticun ta iq'uel tel te siriaetic ayic ta jejch' ja' Eufrates, jich julic tel ta Helam. Ja' jwentainwanej yu'unic te Sobac, te ja' nix te capitán yu'un spisil te soldadoetic yu'un Hadad-ezer.

¹⁷ Pero la yaiy te David. Ja' yu'un la yic' spisil israeletic ta ora, la yac' jajch'uc ta beel. Jich c'axic bael ta muc'ja' Jordán, c'otic ta Helam. Tey c'o snujp'usitay sba soc David a te siriaetique. Jich ora jajch' ta aq'uel guerra.

¹⁸ Pero ta slajibal, ja' loq'uic ta anel ta stojol israeletic te siriaetique. Te jayeb te lajinotic yu'un David, cha'winic ta jmil (40,000) soldadoetic te cajajtic ta caballo soc jo'lajunwinic xcha'bajc' (700) te ayic ta carreta yu'un guerra. Soc la yejch'entes swenta lajel te Sobac te ja' capitán yu'un te soldado-siriaetique, laj ta ora tey a.

¹⁹ C'alal la yilic ta spisilic te muc' ajwaliletic te syomoj sbaic soc te Hadad-ezer te tsalotic yu'un te israeletic, la slamantes yo'tanic ta stojol te israeletic, ja' la yac' sbaic ta swenta. Jich och xiwelic te siriaetic, ma ba la scoltayiquix te amonetique.