1 Samuel 9 - Bible in Tzeltal de Oxchuc y Tenejapa

Samuel la sta sba soc Saúl

¹ Ta sts'umbal Benjamín ay jtul winic Cis sbiil, Abiel te state, Zeror te xcha'lamal smame; te stat te yoxlamal smame Becorat sbiil, snich'an Afía. Te Cis mero ich'bil ta muc'.

² Ay jtul snich'an, buen t'ujbil winic, Saúl sbiil. Ma'yuc yan israel-winic pajal yilel soc, ma'yuc mach'a ya xc'ax ta snejq'uel.

³ Te Cis ay ch'ay burraetic yu'un. Ja' yu'un jich la yalbey te snich'an, ja' te Saule: —Chajbana aba, baan, lea te burraetique. Ic'a bael jtuluc abat —la yut.

⁴ Jich bajt' te Saúl, c'ax bael ta switsul sq'uinal Efraín, soc c'ax bael ta sq'uinal Salisa. Ma ba la sta te burraetique. C'axic xan bael ta sq'uinal Saalim, soc ta sq'uinal sts'umbal Benjamín. Ja' nix jich, ma ba chican te burraetique.

⁵ C'alal c'otic ta sq'uinal Zuf, jich la yalbey te abat sjoineje: —Sujt'ucotiquix bael. Ora jo'otic yaquix sna'belotic te jtate. Ja' wan ma ba ayix bayal sc'oplal yu'un yo'tic te burraetique —la yut.

⁶ La sjac' te abate: —Tey ta lum in to ay jtul j'alwanej te buen ich'bil ta muc' yu'unique, melel spisil te bila ya yal, mero jich nix ya xc'ot ta pasel a. Conic tey a, ya wan yalbotic banti beil ya sc'an ya xbootic —xi'.

⁷ La yal te Saúl: —Conic jiche. Pero ¿bi ya quich'beytic bael te winic ya awale? Ma'yuquix ni junuc pan cu'untic ta yawil. Ma'yuquix bi ay cu'untic jtebuc te ya cac'beytic te j'alwanej ya awale —xi'.

⁸ Pero la sjac' xan te abate: —Ay quich'oj jp'ij saquil taq'uin. Ya cac'beytic te j'alwanej, swenta yu'un ya me yalbotic te be —xi'.

⁹ (Ta namey, teme ay jtul israel-winic te ya sc'an ay bi ya sjojc'obey Dios, jich ya yal: “Ya xba quiltic te mach'a ay bi ya sna' yalele”, xiic. Ja' me te j'alwanej sbiil ta ora in to, te mach'a ay bi ya sna' yalel ta nameye.)

¹⁰ —Melel nix a, conic jiche —xi' te Saule. Jich bajt' xchebalic. Tojic bael ta lum te banti nainem te j'alwaneje.

¹¹ Te c'alal yacalic ta moel ta stojol bael te lum, la staic ach'ixetic te yacalic ta beel ta sliquel tel ya'alic. La sjojc'obeyic: —¿Tey bal ay te mach'a ay bi ya sna' yalele? —la yutic.

¹² Albotic yu'un: —Tey xanix ay bael to. Ya sc'an ya asuj abaic, melel julel to ta lum, yu'un yorail te ya yich' aq'uel milbil smajt'an Dios ta toyol ch'uunjibal.

¹³ Te c'alal ya xc'oex tey a, leaic me ta ora, melel ya me xbajt' ta toyol ch'uunjibal te banti ya x'ain we'ele. Ma'yuc mach'a ya xwe' ja' to teme c'ot stuquele, melel ja' to ya xc'ot sc'anbey bendición stuquel te milbil smajt'an Dios. Patil ya me xwe'iquix te jayeb mach'a ic'bilic tele. Ja' yu'un baanic me jiche, tey to ya xc'o ataic a ta ora in to —xi' sc'oplalic.

¹⁴ Jich jajch'ic xan ta beel. Moic bael, tojic bael tey ta lum. Tic' yacalic ta c'oel a, jajch' tel te Samuel, toj yac ta beel ta toyol ch'uunjibal.

¹⁵ Te c'alal pajel xanix ya xc'ot a te Saúl, te Cajwaltic ay bi la yac'bey sna' te Samuel:

¹⁶ —Pajel ta jich ora in to, ya me jticunbat tel jtul winic talem ta sq'uinal sts'umbal Benjamín. Ja' te mach'a tsabil ya xc'ot awu'un. Ya me awac'bey yich' yat'el ta swentainel te lum Israel cu'un, ya me amalbey aceite ta sjol. Ja' me ya scoltaybon loq'uel ta sc'ab filisteoetic te israeletique. La jna'beyix yo'bolil sba te lum cu'une, melel c'otix c'alal ta jtojol te sc'opique —xi' sc'oplal yu'un te Diose.

¹⁷ Te c'alal la yil Samuel te Saule, jich albot yu'un te Cajwaltic: —Li' me ayix te winic la calbat, ja' me te ya swentainbon te lum cu'une —xi' sc'oplal.

¹⁸ Te c'alal la sta sbaic ta yochibal te lume, te Saúl noptsaj bael ta sts'eel te Samuel, jich la yalbey: —Wocoluc, albon caiy banti ay sna te mach'a ay bi ya sna' yalele —la yut.

¹⁹ La sjac' te Samuele: —Jo'on te ay bi ya jna' yalele. Conic, neelajan, pajal ya xmootic bael ta toyol ch'uunjibal. Tey me ya xc'ootic ta we'el yo'tic a. Pajel ta sab ya me jsutbat sujt'ib spisil bitic ya sc'an awo'tan ya ajojc'obon, patil ya me xbaat.

²⁰ Jich te burraetic awu'unic ch'ay cha'jeye, ma me xamel awo'tan yu'un stuquel, la staiquix. Soc xan, spisil te bitic mulantic sba ta Israel, ja'at awu'un soc yu'un spisil mach'atic ay awu'un —xi' te Samuele.

²¹ C'opoj te Saúl: —Pero jo'on te sts'umbalon Benjamín, te ja' mero ch'in c'oem yu'un spisil ta jchajp sts'umbal Israel. Soc ta xchajbal te mach'atic ay cu'une mero ch'in c'oem ta stojol spisil ta jchajp sts'umbal Benjamín. ¿Bi yu'unix a jiche te jich ya awalbone? —xi'.

²² Te Samuel la yic' bael te Saúl soc te yabate. La yic' ochel ta yut na, c'o snajc'an ta sbabial nactijibal ta banti stsoboj sba te lajuneb xcha'winic (30) te mach'atic ic'bilique.

²³ C'opoj te Samuel, jich la yalbey te mach'a ay ta at'el ta cocina: —Ich'a tel te jun ración ti'bal la cac'bate, te la calbat te parte ya awaq'ue —xi'.

²⁴ Ora la sloq'ues tel jun sjejquel ya' ti'bal te mach'a ay ta at'el ta cocina, la yac'bey te Saule. C'opoj xan te Samuel: —Tey ay te bi yich'oj chajbanel, te ja'at awu'une. Ich'a, we'an, melel te c'alal la jticun ta iq'uel te yajwal lume, chapalix cu'un te bit'il ja' ya xtuun awu'un ta ora in to —xi'. Jich te Saúl la sjoin ta we'el te Samuele.

²⁵ C'alal sujt'ic coel tel ta toyol ch'uunjibal, te Saúl c'o xchajbanbeyic swayib ta yamac'ul ba na ta jamalal.

²⁶ Jich way te Saule. Ta xchebal c'aal ta buen sab, te Samuel la yic' te Saúl te wayal ta yamac'ul ba na, jich la yalbey: —Jajch'anix, jajch'an xan ta beel —xi'. Jajch' te Saúl. Patil loc' bael ta calle xchebal soc te Samuele.

²⁷ C'alal yacalic ta coel bael ta stojol sloq'uibal ta sti'il te lume, te Samuel jich la yalbey te Saule: —Ticuna bael te awabate, ac'a neelajuc bael. Yan te ja'ate ya me amaliyon jtebuc, yu'un ya me calbat awaiy te bi yalojbon te Diose —xi'.