1 Samuel 8 - Bible in Tzeltal de Oxchuc y Tenejapa

Israel ya sc'an ya xlebot muc' ajwalil yu'un

¹ Te c'alal mamalub te Samuel, la yac' ochel ta juecetic ta stojol israeletic te snich'nabe.

² Te sba snich'an, ja' te Joel, soc te xchebal snich'an, Abías, ochic ta juecil ta lum Beerseba.

³ Pero te snich'nab ma jichuc lec yat'elic te bit'il statique. Bayal bic'taj yo'tanic yu'un c'ulejalil soc yantic majt'aniletic, ma ja'uc la spasic te bi stojil ta pasele.

⁴ Ja' yu'un, te mamaletic yich'oj yat'elic yu'un Israel la stsob sbaic ta spisilic, bajt'ic ta stojol Samuel ta lum Ramá.

⁵ Jich c'o yalbeyic: —Te ja'ate mamalatix. Te anich'nabe ma jichuc toj ya x'at'ejic te bit'il ja'ate. Ja' yu'un ya me alebotic muc' ajwalil yu'un ya swentainotic, jich nix te bit'il ya spasic ta yantic nación —xiic c'oel ta stojol.

⁶ Te Samuel ma lecuc la yaiy te yac ta alel te ya sle muc' ajwalil te ya xwentainotic yu'une; ja' yu'un bajt' ta sc'oponel te Cajwaltic.

⁷ Pero jich albot yu'un te Cajwaltic: —Spisil te bi ya sc'anbat te lume, pasbeya; melel ma ja'ucat te ma sc'anat, jo'on te ma sc'anonique. Ja' ma sc'anic te ya x'at'ejon ta ajwalil ta stojolic.

⁸ Ja' to nix te bi c'aalil la jloq'uesic tel ta Egipto c'alal ora, jich yac spasbelic ta jtojol te bit'il yac spasbelic ta atojol ta ora in to. Ya xch'ayon ta yo'tanic ta scaj te ya xba xch'uunic te yan diosetique.

⁹ Ja' yu'un jiche, ich'beya ta wenta te sc'opique. Pero neel me xacholbey yaiyic soc ac'beya sna'ic ta lec te bit'il ya x'at'ej ta stojolic soc bit'il ya xwentainotic yu'un te muc' ajwalil ya sc'anique —xi'.

¹⁰ Te Samuel la yalbey yaiy te lum te bi albot yu'un te Cajwaltic, te bit'il yac ta c'anbeyel muc' ajwalile.

¹¹ Jich la yalbey: —Aiya me awaiyic, ya cac'beyex ana'ic te bila ya spas ta atojolic te muc' ajwalil yacalex ta sc'anele. Ya me yic'beyex ta soldadoil te awal-anich'nabique. Ay me ya yac'bey swentain at'el ta carretaetic yu'un guerra, soc ay me ya yac'bey swentainic at'el ta caballoetic yu'un guerra, soc ay ya yic' yu'un ya xcanantayot yu'un.

¹² Ya me yac'bey yich' yat'elic ta jtsobwanej yu'un jmil (1,000) ta jtul soldadoetic, yan yu'un ya x'ac'bot stsob lajuneb yoxwinic (50) ta jtul. Soc ay me ya x'ochex ta joc'-lum yu'un, soc ya me x'ochex ta c'ajoj, soc ta at'el ta spasel at'ejibaletic yu'un guerra, soc ta spasel carretaetic yu'un.

¹³ Soc ya me yic' yabatinbeyex te awantsil-nich'nabic, swenta yu'un ya me x'ochic ta pas-perfume, soc ya me x'ochic ta at'el ta cocina, soc ta pas-pan.

¹⁴ Ya me yu'uninbeyex te bay mero lec te aq'uinalique, te banti mero ya xcol ts'usubiletic, soc te olivoetic awu'unique, ya me yac'bey ta swenta te muc'ul abatetic yu'une.

¹⁵ Ya me sc'anbeyex jun ta slajunebal yu'un spisil we'eliletic awu'unic, soc nix te bi ya xloc' awu'unic ta ats'usubilic, swenta yu'un ya me yac'bey te muc'ul abatetic yu'une soc te yantic abatetic yu'une.

¹⁶ Soc ya me spojbeyex te awabatic, acriadaic, awacaxic, aburroic te buen lec ya x'at'ejique. Ya me yac' ta at'el ta sq'uinal stuquel.

¹⁷ Ya me sc'anbeyex jcojt' ta slajunebal spisil chambalametic awu'unic, soc te ja'exe ya me smozoinex.

¹⁸ Teme ay bi ora ya xjajch'ex ta c'op yu'un te bi yilel yat'el ya awilic te muc' ajwalil ya atsaique, te Cajwaltic ma me swentauc a —xi' te Samuele.

¹⁹ Pero te lum ma ba la yich'ic ta wenta te bi ac'bot sna'ic yu'un Samuel, jich la yalbeyic: —A, jichuc. Pero puersa ya jc'antic muc' ajwalil

²⁰ swenta yu'un pajal me ya xc'ootic soc te yantic nacionetique. Ya me swentainotic, soc ya me swolotic ta guerra —xiic.

²¹ Te c'alal laj yaiybel sc'op te lum te Samuel, cha'bajt' xan ta sc'oponel te Cajwaltic, la yalbey yaiy te bi la yalique.

²² Albot yu'un te Cajwaltique: —Ac'beya te bila ya sc'anique, ac'beya ochel jtul muc' ajwalil yu'unic —xi' te Cajwaltique. Ja' yu'un te Samuel la sticunlan sujt'el ta slumalic ta banti talemic ta juju-jtul.