1 Samuel 7 - Bible in Tzeltal de Oxchuc y Tenejapa

¹ Jich bajt'ic te yajwal lum Quiriat-jearim, la yich'ic bael te cajón yu'un Cajwaltic, c'o yaq'uic ta sna Abinadab, te ay ta ch'in witse. Jich ora la yac'beyic yich' tulan yat'el ta stojol Dios te snich'ane, te Eleazar, swenta yu'un ja' ya scanantay te cajón yu'un te Cajwaltique.

Samuel, juez yu'un Israel

² Jtab ja'wil jalaj ta Quiriat-jearim te cajón yu'un Cajwaltic. Spisil te israeletic oc' yo'tanic yu'un te Cajwaltic, jajch' sleic ta spisil yo'tanic.

³ Ja' yu'un te Samuel jich la yalbey te israeletic: —Teme mero spisil awo'tanic ya sujt'ex ta stojol te Cajwaltic, ya me sc'an jiche te ya ach'ojic loq'uel te diosetic yu'un jyanlumetic soc te loc'ombaetic yu'un Astarté te awich'ojique. Ja' xan meix ya sc'an ya awac' yabatinbeyex acuxlejalic te Cajwaltic, ja' nax ya sc'an ya ach'uunic. Jich to me ya scoltayex loq'uel ta sc'ab te filisteoetic te Cajwaltique —xi'.

⁴ Te israeletic la xch'ojic loq'uel te jayeb ta jchajp sloc'ombail Baal soc te sloc'ombail Astarté, ja' xanix la xch'uunic te Cajwaltique.

⁵ Patil te Samuel la yal mandal: —Ya me jtsob jbajtic te jayeb israelotic ta Mizpa, yu'un ya me jc'oponbeyex Dios tey a —xi'.

⁶ Te israeletic la stsob sbaic ta Mizpa, la slupic loq'uel ja' tey a, la smalic ta lum swenta smajt'an Dios. Ja' nix sc'aalelal a la scom swe'elic soc la yalic ta jamal te staoj smulic ta stojol te Cajwaltique. Tey ora ta Mizpa och ta juez yu'un israeletic te Samuele.

⁷ Te c'alal la yaiyic te filisteoetic te stsoboj sbaic ta Mizpa te israeletic, te ajwalil-filisteoetic ora ba staic ta guerra. Te c'alal la yaiyic te israeletic, xiw yo'tanic yu'un.

⁸ Jich la yalbeyic te Samuel: —Ma me x'acom aba ta sc'oponel te Cajwaltic te Dios cu'untique, c'opona me Dios ta jtojoltic, swenta yu'un ma ba ya x'ochotic ta sc'ab te filisteoetique —la yutic.

⁹ Te Samuel la stsac jcojt' alal chij, scojt'ol la yac'bey ta chic'bil smajt'an Cajwaltic, soc jajch' sc'oponbey Dios ta stojol te israeletique. Aiybot yu'un Cajwaltic te sc'ope.

¹⁰ Te c'alal yac ta yaq'uel a te chic'bil smajt'an Dios te Samuel, te filisteoetic yacalic ta noptsajel bael ta stojol te israeletique. Pero te Cajwaltic la yac'bey coel tel buen tulan chawuc ta stojol swenta xiwteselic, jich la yaiyic tsalaw te israeletique.

¹¹ Ora loq'uic bael ta Mizpa te israeletic, ba snutsic te filisteoetique. Xch'ixil be coel la smilic c'alal ta ye'tal Bet-car.

¹² Patil te Samuel la stsac jun ton la yac' ta yolil Mizpa soc Sen, Eben-ezer sbiil la yac'bey. Jich la yal te Samuel: —Ta ora in to la scoltayotiquix te Cajwaltique —xi'.

¹³ Te filisteoetic mero tsalbilic jilel, jich ma ba la yochintaybeyic xan te sq'uinal israeletique. Te jayeb c'aal cuxul te Samuel, spisil ora controinbil yu'un Cajwaltic te filisteoetique.

¹⁴ Te lumetic yu'un Israel te pojbilic yu'un filisteoetic, ya xjajch' ta Ecrón c'alal ta Gat, cha'sujt' xan ta swenta israeletic. Jich col loq'uel ta sc'ab filisteoetic te sq'uinal israeletique. Te israeletic ma ba la yuts'in sbaic soc te amorreoetique, lamal q'uinal yu'unic.

¹⁵ Te Samuel stalel ay ta juecil yu'un a te sjoy ta israelil te jayeb c'aal cuxule.

¹⁶ Ta jujun ja'wil ya xbajt' ta lum Betel, Gilgal soc Mizpa, swenta yu'un ya xba xchajban te c'opetic yu'unic te israeletic ta spisil te juju-jtsojbe.

¹⁷ Patil ya sujt' xan bael ta Ramá te banti ay sna, te banti la xchajban te israeletique, soc la spasbey scajtijib smajt'an Dios tey a.