1 Samuel 6 - Bible in Tzeltal de Oxchuc y Tenejapa

La sutic cajón te filisteoetic

¹ Juqueb u jalaj ta sq'uinal filisteoetic te cajón yu'un te Cajwaltique.

² Te filisteoetic la stsobic te sacerdoteetic yu'unic soc te mach'atic ay bi ya xju' yu'unic sna'ele, jich la yalbeyic: —¿Bi ya jpastic soc te cajón yu'un te Yajwal israeletique? Albotic bi ya cutic ya jsujt'estic bael ta yawil —xiic.

³ La sjaq'uic, jich la yalic: —Teme ya asutic bael te scajonil trato te Dios yu'un Israel, ma me stuqueluc nax ya aticunic sujt'el. Ya me sc'an te ay bi ya aticunbeyic te Yajwalic, swenta stojol te amulic ataojic ta stojole. Jich me ya xlecubex ta chamel soc tey me ya ana'ic a, te bi swentail te ma ba acuxoj awo'tanic ta castigo yu'une —xiic.

⁴ —¿Bi ya jticunbeytic swenta yu'un ya xlecub yo'tan? —xiic ta sjojc'oyel te filisteoetique. Jich la yal te sacerdoteetic yu'unique: —Pasaic jo'eb sloc'ombail sijt'ubel pasbil ta oro, jujun yu'un ya xc'ot te juju-jtul ajwalil cu'untic; soc jo'eb sloc'ombail ch'o te pasbil nix ta oro, melel jun nax te chamel yacotic ta yaiyel soc te ajwaliletic cu'untique.

⁵ Pasaic jiche te sloc'ombail te sijt'ubel cu'untique, soc nix te ch'oetic yacal ta yuts'inel ta spamal te jq'uinaltique. Jich ac'a quich'tic ta muc' te Dios yu'un te israeletic, swenta jich ma ba ya yac'botiquix castigo te jo'otic, soc te diosetic cu'untic, soc ta spamal te jq'uinaltique.

⁶ ¿Bi yu'un te mero tulan ya awac' abaic, te pajalex soc egipcioetic soc te faraón yu'unique, te ja' to la yaq'uic loq'uel a te israeletic te c'alal ac'botic tulan castigo?

⁷ Ja' yu'un ticunaic ta pasel jun yach'il carreta. Ya me atsaquic cheb me' wacaxetic te tojq'uel to yalique, ja' te ma'yuc moem yugo ta snuq'uique. Ac'beyaic snit beel te carreta, pero ma me xawac'beyic sjoin bael te yalique, ya me awaq'uic jilel ta sna wacax stuquelic.

⁸ Tsacaic jajch'el ta ora te cajón yu'un te Yajwal israeletic, mojt'esaic ta carreta. Ac'aic ochel ta ch'in caja te bitic pasbil awu'unic ta oro, te ya xtuun awu'unic swenta slecubtesel yo'tane. Ac'aic bael ta xujc' te cajón yu'un te Yajwal israeletique. Patil coltayaic bael stuquel te wacaxetic soc te carreta.

⁹ Pero ac'a asitic ta yilel. Teme toj ya xbajt' ta ch'in lum Bet-semes te wacaxetic soc te carreta, te banti slumal te cajone, yu'un ni me ja' a te Dios yu'un Israel te yac yac'bel bayal jwocoltique. Yan teme ma teyuc ya xbajt'ic a, yu'un ma ja'uc te yac yac'bel tulan castigo ta jtojoltic, yu'unix jich nax talem a te wocol julem ta jtojoltique —xiic.

¹⁰ Jich la spasic te winiquetique. La stsaquic cheb me' wacaxetic te tojquel to yalique, la yac'beyic ochel ta sna wacaxetic te yale. Patil la xchucbeyic te carreta.

¹¹ Ora la smojt'esic te cajón yu'un Cajwaltic, soc te ch'in caja te banti ay te ch'oetic pasbil ta oro, soc nix te loc'ombaetic yu'un te sijt'ubel pasbilic ta oro.

¹² C'alal chajbaj, jajch' ta beel te me' wacaxetique. Tojic bael ta sbelal ch'in lum Bet-semes. Yacalic ta oq'uel bael, mero toj bajt'ic, ma'yuc banti la yaq'uic buelta. Te filisteoetic st'unojic bael c'alal ta raya yu'un te Bet-semes.

¹³ Te yajwal te ch'in lum Bet-semes yacalic ta set'el strigoic ta spamlej a. La sjach sitic, la yilic ja' c'otix te cajón yu'un Cajwaltique. Mero bin nax yo'tanic yu'un te c'alal la yilique.

¹⁴ Te c'alal c'ot ta sq'uinal Josué ta Bet-semes te carreta, c'ot ta comel ta banti ay jun muc'ul ton. Te yajwal te ch'in lum Bet-semes, la yaq'uic ta si' te ste'el carreta, la smilic te wacaxetic, la xchic'beyic smajt'anin te Diose.

¹⁵ Te levitaetic la scojt'esiquix a te cajón yu'un Cajwaltic, soc nix te yan ch'in caja te banti ayic te bitic pasbil ta oro, la scajanic ta ba muc'ul ton. Jich te yajwal ch'in lum Bet-semes la yac'beyic chic'bil majt'aniletic soc yan milbil majt'aniletic te Cajwaltique.

¹⁶ C'alal laj yo'tanic ta yilel spisil te bila c'ot ta pasel, ja' nix ta sc'aalelal a te jo'eb ajwalil-filisteoetic bajt'ic c'alal ta lum Ecrón.

¹⁷ Te jo'eb sijt'ubel pasbil ta oro te la yac' te filisteoetic swenta slectesjibal yo'tan te Cajwaltic, jujun c'oem ta swenta te lum Asdod, Gaza, Ascalón, Gad soc Ecrón.

¹⁸ Te jayeb ch'oetic pasbil ta oro, jujun c'oem ta swenta spisil te lumetic yu'un filisteoetic te ay ta swenta te juju-jtul ajwaliletic yu'unique, manchuc teme joybil ta ts'ajc', o ma ba joybil ta ts'ajc'. Te muc'ul ton te banti la scajanic te cajón yu'un Cajwaltic, c'alal ora chican ta ilel ta sq'uinal Josué te ay ta lum Bet-semes.

¹⁹ Pero te Cajwaltic ay la yac'bey lajuc te yajwal Bet-semes, scaj te la sjam yilic te cajón yu'une. Jich la yac' lajuc lajuneb xchanwinic (70) ta jtul. Te yajwal lum bayal oq'uic yu'un te bayal mach'a la yac' lajuc te Cajwaltique.

²⁰ Te yajwal lum Bet-semes, jich la yalic: —¿Mach'a ya xju' ya stoy sba ta stojol te Cajwaltic, te ja' mero ch'ul Dios stuquele? ¿Mach'a ya xc'ot ta swenta teme loc' bael ta jtojoltique? —xiic.

²¹ La sticunic c'op ta stojolic te yajwal lum Quiriat-jearim, jich la yalic: “Te filisteoetic la sticuniquix sujt'el tel te cajón yu'un Cajwaltic, la' ich'aic bael”, xi' te sc'opique.