1 Samuel 5 - Bible in Tzeltal de Oxchuc y Tenejapa

Scajonil trato yu'un Dios ta sq'uinal filisteoetic

¹ Te c'alal och ta sc'ab filisteoetic te scajonil trato yu'un Dios, la yich'ic jajch'el ta Eben-ezer, bajt' yu'unic c'alal ta lum Asdod.

² La yich'ic ochel ta templo yu'un Dagón te loc'omba sdiosinejic, la yac'beyic ta sts'eel.

³ C'alal sacub q'uinal, c'otic ta stemplo te yajwal Asdod, ch'ayem coel ta lum a c'o staic te Dagón, ta elawal yu'un te scajonil trato yu'un Dios. La stamic jajch'el te Dagón, tey la yaq'uic ta banti yawil nix.

⁴ Pero ta xchebal c'aal c'otic yan buelta te yajwal Asdod. Ja' nix jich ch'ayem coel ta lum yan buelta a c'o staic, ta elawal yu'un te scajonil trato yu'un te Cajwaltique. Te sjole soc ta xchebal te sc'abe c'asemix, ayic ta sba te sts'ajc'ul scajtijib sti' te templo yu'une. Ja' xanix wolol jilel te smuc'ule.

⁵ Ja' swentail te c'alal ora ma ba ya stec'beyic te sts'ajc'ul scajtijib sti'il te templo yu'un Dagón ta lum Asdod te sacerdoteetic yu'unique.

⁶ Patil te Cajwaltic la yac'bey buen tulan castigo soc bayal xiwel yu'un te yajwal Asdod soc ta spamal te sq'uinalique, ac'botic sijt'ubel wolajtic ta sbaq'uetalic.

⁷ C'alal la yil te yajwal lum Asdod te bi yac ta c'oel ta pasele, jich la yalic: —Te scajonil trato te Dios yu'un israeletic, ma xju' ya xjil ta coliltic, melel te Dios yu'unique, yac yac'belotic buen tulan castigo soc te Dagón te dios cu'untique —xiic.

⁸ Jich la sticunic ta iq'uel tel te ajwalil-filisteoetic swenta yu'un ya me stsob sbaic soc. La sjojc'obeyic, jich la yalic: —¿Bi ya jpastic soc te scajonil trato te Dios yu'un Israel? —xiic. —Ich'aic bael ta lum Gat —xiic. Te filisteoetic la yich'ic bael tey a.

⁹ Pero te c'alal la yich'ic c'axel, te Cajwaltic la yac' xan jajch'icuc ta buen xiwel. Spisil yajwal lum la yac' jajch'uc sijt'ubelic ta spisil, muc'-biq'uitetic.

¹⁰ Ja' yu'un te filisteoetic la sticunic ta Ecrón te scajonil trato yu'un Dios. Pero c'alal c'ot tey a, spisil te yajwal Ecrón jajch'ic ta aw: —La yich'botiquix tel te scajonil trato te Dios yu'un Israel, swenta yu'un ya smilotic ta jpisiltic —xiic ta aw.

¹¹ Melel ta spamal lum pujc' buen tulan xiwel yu'un lajel, scaj te tulan castigo ticunbotic yu'un te Diose. Ja' yu'un la sticunic ta iq'uel te ajwalil-filisteoetique. Jich la yalbeyic: —Ich'aic bael te scajonil trato te Dios yu'un Israel. Sutaic bael ta yawil, swenta yu'un ma me ba ya smilotic jpisiltic a —xiic.

¹² Te yaw te yajwal lume c'ot c'alal ta toyol, melel te mach'atic ma ba lajique, ay swocolic ta sijt'ubel.