1 Samuel 4 - Bible in Tzeltal de Oxchuc y Tenejapa

¹ Patil te Samuel la yalbey yaiyic ta spisilic te israeletique. Ja' yorail a te jajch' guerra yu'un te filisteoetic, ja' la yac'bey sbaic soc te israeletique. Jich loc' bael te israeletic, ba sta sbaic soc te filisteoetique. C'o spas scampamentoic ta nopol Eben-ezer. Te filisteoetic c'o spas scampamentoic ta lum Afec.

Filisteoetic la spojic scajonil trato

² La xchajban sbaic jajch'el, ba staic te israeletique. Jich jajch' te guerra yu'unique. Ja' ju' yu'unic te filisteoetique, ja' tsalotic te israeletic, chanmil (4,000) ta jtul laj te swinic ta campo te banti la stsac sbaic ta guerra.

³ Te c'alal c'otic ta scampamentoic te israeletic, jich la yal te mamaletic yich'oj yat'el yu'unique: —¿Bi yu'un te la yac'otic ta tsalel yu'un filisteoetic te Cajwaltique? Ya xba quich'tic tel te scajonil trato yu'un Cajwaltic te ay ta Silo, swenta yu'un ya me sjoinotic ta beel ta coliltic, soc jich me ya scoltayotic ta sc'ab a te jcontrotique —xiic.

⁴ Jich nix la spasic a te israeletique. La sticunic jchajp soldadoetic, bajt'ic ta Silo. La yich'ic tel te scajonil trato yu'un Cajwaltic te Spisil ya xju' yu'une, te nacal ta sba te sloc'ombail querubinetic. Te Ofni soc Finees, xchebal snich'nab Elí, sjoinejic te scajonil trato yu'un te Diose.

⁵ Te c'alal c'ot yu'unic ta campamento te scajonil trato yu'un Cajwaltic, xch'inlajanic jajch'el ta aw swenta yutsil yo'tanic, asta la stij sba te lumq'uinal yu'un yawique.

⁶ Te c'alal la yaiyic te filisteoetic te mero awunic yu'un yutsil yo'tanic te israeletique, jich la yalbey sbaic: —¿Bi wan swentail te mero xch'inlajanic ta scampamentoic te hebreoetique? —xiic. Pero c'alal la yaiyic te ja' te scajonil trato yu'un Cajwaltic te julix yu'unic ta campamento,

⁷ xiwic yu'un. Jich la yalic: —Dios julix ta scampamentoic. Ay me jwocoltic yo'tic, ma'yuc jich c'oem ta pasel.

⁸ Puersa me ay jwocoltic ya xc'ootic. ¿Mach'a ya xju' ya scoltayotic loq'uel ta sc'ab te Dios mero bayal yu'ele? Ja' te la yac'bey castigo egipcioetic ta jochol taquin q'uinal, te jayebuc ta jchajp castigoetic la yac'bey c'otuc ta swentaique.

⁹ Chajbana abaic soc te awat'ejibic, ayuc me yip awo'tanic, soldado-filisteoetic. Ac'aic puersa, ma me xawac' stsalex, soc ma me x'ochotic ta mozoinel yu'un te hebreoetic, jich te bit'il ayic ta mozoil cu'untic te jo'otique —xiic ta aw.

¹⁰ Jich bajt'ic te filisteoetic, ba yac'beyic xan guerra te israeletique. La stsalic, loc' ta anel te israeletic, bajt' ta scampamentoic. Te milaw la yaq'uic te filisteoetic, mero c'axix a, melel lajic lajuneb xcha'winic ta jmil (30,000) te soldado-israeletic te ya xbeen ta yacanique.

¹¹ Soc la spojic bael te scajonil trato yu'un Dios, soc laj ta milel yu'unic xchebal te snich'nab Elí, ja' te Ofni soc Finees.

¹² Pero ay jtul soldado sts'umbal Benjamín te ju' yu'un te loc' ta anel ta yolil te guerrae. Bajt' ta animal, jun nax c'aal c'ot c'alal ta Silo, jatsemtic sc'u' soc yac'oj lum ta sjol swenta seña mel-o'tan.

¹³ Te c'alal c'ot, nacal ta muc'ul silla ta nopol ti'nail te Elí, t'ojol sit ta be, melel ja' bayal sc'oplal ta yo'tan la yaiy te scajonil trato yu'un te Diose. Te winic och bael ta lum, c'o yal te bi c'otix ta pasele. Ora jajch'ic ta aw ta spisil te yajwal lume.

¹⁴ C'alal la yaiy te Elí te ipal aw, la sjojc'o yaiy, jich la yal: —¿Bi swentail te mero xch'inch'un nax ta aw ya caiye? —xi'. Te winique ora bajt' ta stojol te Elí, la yalbey yaiy te bi c'otix ta pasele.

¹⁵ Te Elí ayix waxaclajuneb yo'winic (98) ya'wilal a, mero ma xyilix q'uinal.

¹⁶ Jich c'o yalbey: —Julelon to, tojon tel ta campo ta banti yacal guerra. Colon loq'uel tel ta yolil te guerra —xi'. La sjojc'obey te Elí, jich la yal: —¿Bi c'oem ta pasel jiche, jnich'an? —xi'.

¹⁷ La sjac' te winique: —Te joytic ta israele, loq'uiquix ta anel ta stojol te filisteoetique. Soc mero bayal te milele. Tey lajix xchebal a te anich'nabe, ja' te Ofni soc Finees. Soc nix te scajonil trato yu'un Dios, ochix ta sc'abic te filisteoetique —xi'.

¹⁸ Te c'alal la sta ta alel te scajonil trato yu'un Dios te mach'a yacal yalel te c'ope, te Elí ora jawts'uj coel ta smuc'ul silla, jawal c'oel ta xujc' ti'nail. Mamalix, soc bayal yalal, jich toj waq'uel snuc' yu'un, jich laj te mamale. Cha'winic (40) ja'wil at'ejemix ta juecil ta stojol lum Israel.

¹⁹ Te yalibe, ja' te yinam Finees, yic'oj yal, nopol ya x'ayinix a te yale. Te c'alal la yaiy te ochix ta sc'ab filisteoetic te scajonil trato yu'un Dios, soc te lajix te yalib-mamale, soc te smamlale, jajch' xc'uxul la yaiy yu'un. Tal buen bayal xc'uxul la yaiy, jich ayin te yale.

²⁰ C'alal la sna'ic te ya xlaj te antse, te antsetic c'o yilic. Te c'alal ya xlajix a, jich la yalbeyic: —Ma me xamel awo'tan, ch'in querem te awale —la yutic. Pero ma ba la sjac', soc ma ba la yich' ta wenta.

^21-22 Icabod sbiil la yac'bey te alale, melel la yal: “Israel lajix yutsil sc'oplal, melel bajt' ta pojel te scajonil trato yu'un Dios”, xi'. Jich la sta ta alel te scajonil trato yu'un Dios, soc nix te laj te yalib-mamal, soc laj te smamlale.