1 Samuel 31 - Bible in Tzeltal de Oxchuc y Tenejapa

Saúl lajic ta guerra soc snich'nab

¹ Te filisteoetic la yac'beyic guerra te Israele. Te israeletic loq'uic ta anel ta stojol, mero bayal mach'atic lajic ta wits Gilboa.

² Te filisteoetic la snutsic bael te Saúl soc te snich'nab, la smilic te Jonatán, Abinadab soc Malquisúa.

³ Patil ja' la stojlinic te Saúl, ja' yu'un te filisteoetic te ay st'imalte'ic la staic ta yat'ejibalul st'imalte'ic, bayal ejch'enaj te Saúl.

⁴ Ja' yu'un te Saúl la yalbey te jcuch-at'ejibal ta guerra yu'une: —Loq'uesa te apuñal, milawon a, swenta yu'un ma ja'uc to ya xtal smilonic te mach'atic ma ba xch'uunejic te cuxul Diose, ya me yixlanbonic te jbaq'uetale —xi'. Pero te jcuch-at'ejibal ta guerra yu'une, ma ba la sc'an ya smil, yu'un mero bayal la xi'. Ja' yu'un te Saúl la stsac te spuñal, la xch'oj sba ta sni' spuñal.

⁵ Te c'alal la yil te jcuch-at'ejibal yu'un guerra te lajix te Saúl, ja' nix jich la spas, la xch'oj sba ta sni' te spuñale, pajal laj soc te Saule.

⁶ Jich c'ot te jun nax c'aal laj te Saúl, te oxeb snich'nab, te jcuch-at'ejibal ta guerra yu'un, soc ta spisil te swinictaque.

⁷ C'alal la yilic te israeletic ainemic ta jejch' spamlej soc ta stojol sloq'uib c'aal yu'un Jordán te aniquix te soldado-israeletic soc te lajix Saúl soc te snich'nabe, la yijq'uitayic jilel te slumalic, loq'uic ta anel. Te filisteoetic c'otic tey a, tey jilic ta nainel a.

⁸ Ta xchebal c'aal c'alal bajt'ic te filisteoetic ta spojbeyel spisil biluc yu'unic te lajem winiquetic, c'o staic te Saúl soc te snich'nab chawajtic ta wits Gilboa.

⁹ La xot'beyic sjol, la yich'beyic te yat'ejib yu'un guerra, soc la sticunic ta puquel ta alel ta spamal sq'uinal filisteo swenta yu'un ya me yaiyic spisilic te yajwal te jujun templo yu'unique.

¹⁰ Ta templo yu'un Astarté la yaq'uic te yat'ejib ta guerra te Saule. Te sbaq'uetal la sjijp'anbeyic ta sts'ajc'ul te lum Bet-sán.

¹¹ Te mach'atic ayic ta Jabes-yu'un-Galaad la yaiyic te bi la spasbeyic te sbaq'uetal Saúl te filisteoetique.

¹² La xchap sbaic ta spisilic te winiquetic te ma xiwique, sjunal ajc'ubal beenic bael. La scojt'esbeyic te sbaq'uetal Saúl soc te sbaq'uetal te snich'nab tey ta sts'ajc'ul te lum Bet-sán. Sujt'ic tel ta Jabes, tey jul xchic'beyic a.

¹³ Patil la smucbeyic te sbaquelic ta Jabes ta ye'tal te'. C'alal laj yo'tanic ta smuquel, la scom swe'elic juqueb c'aal.