1 Samuel 30 - Bible in Tzeltal de Oxchuc y Tenejapa

David la stsal amalequetic

¹ Ta yoxebal c'aal te David soc te swinictac c'otic ta Siclag. C'alal c'otic, la yilic te yich'ojix ochintayel yu'un amalequetic te Neguev. Soc la yuts'inic te yajwal lum Siclag, la sjinic jilel, la yac'bey jilel sc'aal.

² Soc la yic' bael ta chuquel antsetic, alaletic, soc spisil te mach'atic muq'uix te tey ayic a, pero ma'yuc mach'a la smilic.

³ C'alal c'ot ta lum Siclag te David soc te swinictac, la yilic te c'ajq'uemix, soc te ic'botic bael ta chuquel te yinamic, squerem-nich'nabic, soc yantsil-nich'nabic.

⁴ Jajch'ic ta buen oq'uel asta ja' to laj yipic.

⁵ Jich nix baem ta chuquel xchebal te antsetic yu'un David, ja' te Ahinoam te talem ta Jezreel, soc te Abigail te me'ba ants yu'un Nabal ta lum Carmel.

⁶ Te David ma sna' bi ya yut sba scaj te yac ta alel te ya yich' xch'ojel ta ton yu'un te swinictaque, melel spisilic ilinem yo'tanic yu'un te bi c'oem ta pasel ta stojol te snich'nabique. Pero ja' la yipin yo'tan te Cajwaltic te Dios yu'une.

⁷ La yalbey te sacerdote Abiatar, snich'an Ahimelec: —Wocoluc, ich'bon tel te efod —la yut. Jich te Abiatar la yich'bey bael ta ora te efod.

⁸ Te David la sjojc'obey te Cajwaltique, jich la yalbey: —¿Ya bal xju' ya jnuts bael te jpoj-biluquetic? ¿Ya bal xju' ya jta? —xi' ta stojol. La sjac' te Cajwaltic: —Nutsa bael. Ya me ata, soc ya me apojbey sujt'el tel te mach'atic baemic ta chuquele —xi' te Cajwaltique.

⁹ Te David ora jajch' ta beel soc te lajunwinic xcha'bajc' (600) swinictac sjoinej, c'otic ta uc'um Besor.

¹⁰ Tey jil lajunwinic (200) a te swinictac, scaj te mero lubenic, ma ba ju' xc'axelic ta uc'ume. Te yan jbajc' (400) xane bajt'ic soc David ta snutsel stuquelic.

¹¹ C'alal mal c'aal xan bael la staic jtul egipcio-winic ta spamlej aquiltic, la yiq'uic bael ta stojol David. Neel la yac'beyic swe'el yuch'el:

¹² la yac'beyic jxejt' pejch'el taquintesbil higo soc cha'pejch' taquintesbil ts'usub. Te c'alal laj yo'tan ta we'el te egipcio-winic, jajch' ta lecubel q'uinal la yaiy, melel yoxebalix c'aal soc yoxebalix ajc'ubal a te ma'yuc bi swe'oj yuch'oje.

¹³ Patil te David jajch' sjojc'obey: —¿Mach'a awajwal? ¿Banti talemat? —la yut. La sjac' te egipcio-winique: —Egipcio-winicon, yabaton amalec-winic. Pero yoxebalix c'aal xch'aybelon jilel te cajwale, scaj te la stsacon chamele.

¹⁴ C'ootic ta pojaw ta stojol sur yu'un sq'uinal cereteoetic, ta sq'uinal Judá soc ta sq'uinal Caleb, soc la cac'beytic jilel sc'aal Siclag —xi'.

¹⁵ Te David la sjojc'obey: —¿Ya bal ac'an ya awic'on bael tey c'alal ta banti ayic te jpoj-biluquetic ya awale? —xi'. La sjac' te egipcio-winic: —Teme ya awal ta jamal ta stojol Dios te ma ba ya amilone, soc teme ma ba ya awac'on ta sc'ab te cajwale, ya quic'at bael tey c'alal ta banti ayique —xi'.

¹⁶ Jich la yic' bael c'alal ta banti ayic te jpoj-biluquetic. Spucoj sbaic ta aquiltic, yacalic ta we'el-uch'el, yacalic ta pas-q'uin yu'un te jayeb bi la yich' pojel tel yu'unic ta sq'uinal filisteoetic soc ta sq'uinal Judá.

¹⁷ Te David jajch' yac'bey guerra ta sab ja' to c'alal mal c'aal. Mero spisil la slajin, ja' xanix ma ba lajic jbajc' (400) queremetic scaj te mo ta scamelloique, jich la scoltay sbaic bael.

¹⁸ Spisil te bitic yich'oj pojel yu'un te amalequetic, la spojbey te David, soc nix te cheb antsetic yu'une.

¹⁹ Ma'yuc bi jxujt'uc te ma ba sujt' ta stojolic te bitic pojbotique. Soc ma'yuc la spas falta jtuluc alal soc ni jtuluc winic, ni jtuluc ants, spisil la spoj xan sujt'el te David.

²⁰ Soc spisil la yu'uninbey te amalequetic te xchijic soc te wacaxetic yu'unique. La yalic te mach'atic yacalic ta smaquel bael te chijetic soc wacaxetique: —Ja' la yu'uninix te David —xiic.

²¹ C'ot te David ta banti la yijq'uitay jilel te lajunwinic (200) swinictac te jilemic ta uc'um Besor ta scaj yu'un mero lubenic te ma ba ju' yu'unic te joinot bael yu'une. Te winiquetic ba staic tel te David soc te mach'atic joinbil yu'une. Te David noptsaj bael ta sts'eelic ta spatbeyel yo'tanic.

²² Pero te jayeb swinictac David te mero amenique, te ya smulanic yixlanel te c'ope, jich la yalic: —Te mach'atic ma ba sjoinejotic c'oele, ma ba ya yich'ic aq'uel stuquelic te bitic la jtatic tele. Ja' nax ac'a yiq'uic bael te yinamic soc te snich'nabic, ac'a bajt'uquic —xiic.

²³ Pero te David jich la yal: —Ma jichuc xapasic, quermanotac. Te bitic la jtatique, ja' nix yac'ojbotic te Cajwaltic, soc ja' nix te la scanantaybotic te jcuxlejaltique. Ja' nix te la yac' ta jc'abtic te jpoj-biluquetic, te la spoj jbiluctique.

²⁴ Ja' yu'un ma'yuc mach'a lec ya yaiy stuquel te bi yacalex ta yalele. Melel te bi ya yich' puquele, pajal nix ya yich'ic aq'uel te mach'atic ya xbajt'ic ta guerra soc te mach'atic ya xjilic ta scanantayel biluquetique —xi'.

²⁵ (Te bit'il jich jajch' ta pasel, jich ay ta pasel ta Israel c'alal ora.)

²⁶ C'alal c'ot ta Siclag te David, te bitic la spojbey tel te scontroic la sticunbey juju-jteb te mamaletic yich'oj yat'elic ta Judá te c'ux sba ta yo'tan soque. Jich la yalbey bael: “Ila, tey ay jtebuc amajt'an, ja' te bi la jpojbey tel te scontro Cajwaltique”, xi'.

²⁷ Soc la sticunlabey smajt'anic te mach'atic ayic ta Betel, Ramot-ta-Neguev, Jatir,

²⁸ Aroer, Sifmot, Estemoa,

²⁹ soc Racal, soc nix te mach'atic ayic ta lumetic ta Jerameel,

³⁰ soc te mach'atic ayic ta lumetic yu'un quenitaetic, ta Horma, ta Corasán, ta Atac,

³¹ ta Hebrón soc ta spisil te banti beenem soc te swinictaque.