1 Samuel 3 - Bible in Tzeltal de Oxchuc y Tenejapa

Cajwaltic la sc'opon Samuel

¹ Te querem Samuel yac ta at'el ta stojol te Cajwaltic, ja' yac ta pasel ta mandal yu'un te Elí. Ja' yorail a te ma'yuc mach'a ajc'al ts'in ya xc'oponot yu'un Dios te ay bi ya x'ac'ot ta yalele, soc ma'yuc bayal te bitic ya yac' ta ilel te Diose.

² Jun buelta te Elí ay ta wayel te banti nainem. Staojix yorail a te ya xjajch' ta bolobel sit, ma ba ya yilix q'uinal ta lec.

³ Te Samuel wayal ta templo yu'un Cajwaltic te banti ay te cajón yu'un Dios, yac ta tilel c'ajc' ta ch'ul awilal.

⁴ Jich ora c'oponot yu'un te Cajwaltique, jich albot: —Samuel —xi' sc'oplal. —Tey ayon —xi' ta sjaq'uel.

⁵ Ora bajt' ta animal ta stojol Elí, jich c'o yal: —Li' ayon to. ¿Bi yu'un ya awic'on? —xi' c'oel. —Ma'yuc bay ya quic'at. Baan, mejts'ana aba —la yut. Jich bajt' te Samuel, la smejts'an xan sba.

⁶ Pero te Cajwaltic, la sc'opon xan: —Samuel —xi' xan. Te Samuel ora jajch', bajt' xan ta stojol Elí. —Tey ayon. ¿Bi yu'un ya awic'on? —xi' yan buelta. —Ma ba ya quic'at jo'on, jnich'an. Baan, mejts'ana xan aba —xi' te Elí.

⁷ Te Samuel ma to sna'bey sba te Cajwaltic, ma to ayuc banti c'oponbil yu'un a.

⁸ Pero ta swenta yoxebal buelta c'oponot xan yu'un Cajwaltic te Samuel. Ba yalbey xan te Elí, jich c'o yalbey: —Tey ayonix ta atojol, ¿bi yu'un ya awic'on? —xi' c'oel. Te Elí tey la sna'ix a te ja' Cajwaltic yac ta c'oponel yu'un te querem Samuel.

⁹ Jich la yal: —Baan, mejts'ana aba. Teme ya to sc'oponat xan te Cajwaltic, jac'beya: “C'opojan, ya caiy stojol jo'on te awabatone”, uta me —xi' te Elí. Jich te Samuel bajt' xan ta yawil nix, c'o smejts'an sba.

¹⁰ Patil c'ot xan te Cajwaltic, la stejc'an sba tey a, jich nix la yalbey te bit'il ta neelal to: —Samuel, Samuel —xi'. —C'opojan, ya caiy stojol te awabatone —xi' te Samuele.

¹¹ Albot yu'un te Cajwaltique: —Ay bi ya cac' c'otuc ta pasel ta stojol te israeletique. Spisil te mach'a ya yaiyic, c'ux me ya xc'ot ta xchiquinic.

¹² Ya me xc'ot sc'aalelal, te puersa ya cac' c'otuc ta pasel te bi caloj ta stojol Elí ta swenta te mach'atic ay yu'une.

¹³ La calbeyix yaiy te ya cac'bey castigo sbajt'el q'uinal te mach'atic ay yu'une ta scaj te bitic amen spasojic, te sna'ojixe. Melel te snich'nabe la sboltesbonic jc'oplal. Te Elí ma ba la scom te snich'nabe.

¹⁴ Ja' yu'un jc'axel caloj te bi ya xc'ot ta swenta te mach'atic ay yu'une. Ma'yuc bi ya xju' ya xlajinbot sc'oplal yu'un, manchuc me ya yac'bon milbil jmajt'an, manchuc me ay yan majt'aniletic ya yac'bon, pero ma xlaj sc'oplal te smulique —xi' te Diose.

¹⁵ C'alal quejch'aj ta c'op te Diose, way xan te Samuel, ja' to c'alal sacub q'uinal. La sjam te sti'nailul templo yu'un Cajwaltic. Te Samuel la xi' yalbeyel Elí te bitic albot yu'un te Cajwaltique,

¹⁶ pero te Elí la yic' tel, jich la yalbey: —Samuel, jnich'an —xi'. —Tey ayon —xi' te Samuele.

¹⁷ Te Elí la sjojc'obey: —¿Bitic a te la yalbat te Cajwaltique? Wocoluc, ma me x'amucbon ta awo'tan jxujt'uc. Ac'a yac'bat tulan castigo te Cajwaltic teme ma ba ya awalbon spisil te bi la yalbate —xi' te Elí.

¹⁸ Te Samuel la xcholbey yaiy spisil te bitic albot yu'un te Cajwaltic, ma'yuc la smuc ta yo'tan. Te Elí jich la yal ta spisil yo'tan: —Ja' Cajwaltic stuquel. Ac'a spas te bi lec ta pasel ya yaiye —xi'.

¹⁹ Te Samuel muc'ub, ja' la sjoin jujun c'aal te Cajwaltique. Spisil c'ot ta pasel yu'un, ma'yuc ch'ay baluc te sc'ope.

²⁰ Spisil israeletic ta spamal sq'uinalic, c'alal ta Dan soc c'alal ta Beerseba, la sna'ic te ja' mero j'alwanej yu'un Dios te Samuele.

²¹ Te Cajwaltic la yac' sba ta na'el yan buelta ta Silo, tey la yac'bey sna' a te Samuel te sc'ope.