1 Samuel 29 - Bible in Tzeltal de Oxchuc y Tenejapa

Filisteoetic ma sc'anic David

¹ Te soldado-filisteoetic la stsob sbaic ta spisilic ta lum Afec. Jich te israeletic la spas scampamentoic ta sloq'uibja' te ay ta Jezreel.

² Te capitanetic yu'un te soldado-filisteoetic yacalic ta marcha loq'uel ta chajbalchajp swenta compañía soc ta swenta batallón. Te David soc te swinictac yacalic ta marcha ta patil soc Aquis stuquelic.

³ Te ajwalil-filisteoetic la sjojc'obeyic te Aquis: —¿Ja' xan te hebreoetic, bi ya spasic li'to? —xiic. Jac'botic yu'un te Aquis: —Ja' te David te ay ta abatinel yu'un Saúl ta neelal to, te muc' ajwalil yu'un Israel, pero ayix ja'wil te li' joineje. Ja' to nix te c'alal jul tel ta jtojol, c'alal ora ma'yuc bi falta jtaojbey —xi'.

⁴ Pero te ajwalil-filisteoetic ilinic ta stojol Aquis: —Ticuna sujt'el, ac'a bajt'uc ta banti yawil awac'ojbey. Ma me xtal sjoinotic ta guerra, teme ayuc ya sut sba ta jcontrotic te c'alal yacotiquix ta guerra. Jich me ya xcha'lecubtesbey yo'tan ta stojol te yajwale, teme ya yich'bey bael yilbey sjol te soldadoetic cu'untique.

⁵ Ja' nix te David te la yalic ta c'ayoj ta ajc'ot: “Jmil (1,000) ta jtul winiquetic la smil Saúl, lajunmil (10,000) ta jtul la smil David”, te xie —xiic.

⁶ Ja' yu'un te Aquis la sticun ta iq'uel te David, jich la yalbey: —Mero melel yiloj te Awajwal te tojat ta winiquil, bayal ya jmulanbat te awat'el ta scampamento te soldadoetique. Ma'yuc bi amen jtaojbat ta awenta c'alal a julat tel, pero ma sc'anic te ajwalil-filisteoetic te tey ayate.

⁷ Ja' yu'un jun awo'tan sujt'an bael, swenta yu'un jich ma'yuc bi ya xbolob yo'tanic yu'un te jlumale —la yut.

⁸ La yalbey te David: —¿Bi jpasoj jiche? ¿Yu'un bal ay awilojbon bi amen jpasoj, te ma xawac'on ta yaq'uel guerra te acontro? —xi'.

⁹ La sjac' te Aquis: —Te jo'one mero lequil winicat ta jsit, jichat ta co'tan te bit'il ch'ul abat yu'un Dios. Pero ja' te ajwalil-filisteoetic te yac'ojic puersa ta jyalel te ma xju' ya x'ochat ta guerra soc te jo'otique.

¹⁰ Ja' yu'un pajel ta buen sab ya me xbaat soc spisil te abatetic yu'un Awajwal ajoinej tele. Ya me sujt'ex bael —xi'.

¹¹ Te David soc te swinictac, ta buen sab ta xchebal c'aal jajch'ic, tojic sujt'el ta sq'uinal filisteoetic. Yan te filisteoetic la yaq'uic puersa ta ochel bael ta Jezreel.