1 Samuel 27 - Bible in Tzeltal de Oxchuc y Tenejapa

David ay ta sq'uinal filisteoetic

¹ Pero te David la yal ta yo'tan: “Puersa ya sta yorail te ya smilon te Saule. Ja' yu'un te bila lec ya jpase, ya xboon ta anel ta sq'uinal filisteoetic, swenta yu'un jich me jun co'tan ya x'ainonix a, soc jich ma ba ya x'och sleonix ta sq'uinal Israel te Saule. Jich me ya xcolon loq'uel ta sc'ab a”, xi' te David.

² Ja' yu'un te David soc te lajunwinic xcha'bajc' (600) swinictac joinbil yu'une, jajch'ic ta beel. Ba yac' sbaic ta abatinel yu'un Aquis snich'an Maoc, muc' ajwalil ta lum Gat.

³ Te David soc te swinictac nainic ta lum Gat soc Aquis, ta chajbalchajp nainic soc yinamic tey a. Te David la yic' bael xchebal te antsetic yu'une: Ahinoam te talem ta Jezreel, soc te Abigail te me'ba ants yu'un Nabal ta Carmel.

⁴ C'alal la yaiy te Saúl te bajt' ta anel ta Gat te David, la yijq'uitay sleel.

⁵ Te David jich la yalbey te Aquis: —Teme ya xju' ya ana'bon yo'bolil jbae, wocoluc, ac'awon bael ta nainel ta bayuc lumil awu'un ta aq'uinal. Melel ma lecuc te ya joinat ta nainel ta muc'ul lum awu'un te muc' ajwalilat, te bit'il abaton awu'une —la yut.

⁶ Te Aquis ora la yac'bey ta swenta te lum Siclag. Ja' yu'un c'alal ora te lum Siclag, yu'un muc' ajwalil ta Judá.

⁷ Te David jalaj ta nainel jun ja'wil soc chaneb u ta sq'uinal filisteoetic.

⁸ Ya xloc' soc te swinictac ta spojbeyel biluc yu'unic te gesuretic, gezritaetic soc te amalequetic te nainemic ta bay Telaim ta stojol Shur, c'alal ta Egipto.

⁹ La smil te mach'atic nainemic tey ta q'uinale, ma'yuc cuxul la yijq'uitayic, ni jtuluc winic, ni jtuluc ants. Soc la yic'beyic bael xchijic, swacaxic, sburroic, scamelloic soc nix te sc'u'ique. Te jujun buelta ya xloq'uic, ya sujt'ic xan bael ta banti ay te Aquis.

¹⁰ Ya xjojc'obotic yu'un: —¿Banti c'oex ta spojel biluquetic te naxe? —xi'. Jac'bot yu'un te David: —Ta sur yu'un Judá —xi' jun buelta. —Ta sur yu'un Jerameel —xi' yan buelta. —Ta sur yu'un sq'uinal quenitaetic —xi' xan.

¹¹ Te David ma'yuc cuxul ya yijq'uitay ni jtuluc winic ni jtuluc ants, swenta yu'un ma ba ya xba yalic tel ta lum Gat te bi yacal ta spasele. Te jayeb c'aal jalaj ta sq'uinal filisteo te David, jich la spasulay.

¹² Te Aquis jun yo'tan ta stojol, jich la yal ta yo'tan: “Te David jc'axel ilaybil yac ta c'oel yu'un te slumal Israel. Ya me cabatin spisil ora”, xi' yu'un.