1 Samuel 25 - Bible in Tzeltal de Oxchuc y Tenejapa

Laj Samuel

¹ Laj te Samuele. Spisil israeletic la stsob sbaic ta yoq'uetayel, la smuquic ta sq'uinal ta Ramá. Patil te David bajt' ta muc'ul taquin q'uinal Parán.

David soc Abigail

² Ay jtul mero jc'ulej winic ainem ta Maón. Ay oxmil (3,000) xchijetic soc jmil (1,000) tentsunetic yu'un, ay sq'uinal soc biluc yu'un ta lum Carmel. Tey baem ta sloq'uesel stsotsil chij a.

³ Nabal sbiil te winique, patil alnich'an yu'un Caleb, buen amen yo'tan ta winiquil soc buen amen yat'el spisil ora. Yan te yiname ma jichuc yo'tan stuquel. Abigail sbiil, buen t'ujbil ants soc buen p'ij yo'tan stuquel.

^4-5 Te c'alal ay ta jochol taquin q'uinal a te David, la yaiy te yac ta sloq'uesel stsotsil xchij ta Carmel te Nabal. La sticun lajuntul swinictac, jich la yalbey: —Baanic ta Carmel ta banti ay te Nabal. Patbeyaic yo'tan ta jwenta,

⁶ jich ya xc'o awalbeyic: “Hermano, mero bin nax co'tan ya jticunbat spatil awo'tan soc awinam soc spisil mach'atic ay awu'un. Buen bayal yutsil co'tan awu'unic teme lec ayex ta apisilique.

⁷ La caiy te yacat ta sloq'uesel stsotsil achije. Awaiyoj niwanix te la jointic ta Carmel te jcanan-chijetic awu'une. Te jayeb c'aal joinejtic tey a, ma'yuc la yich'ic uts'inel soc ma'yuc bi la yich'ic pojel.

⁸ Ya xju' ya ajojc'obey te abatetic awu'une, ya me yalic ta jamal te melel te bila ya calbate. Ja' yu'un wocoluc, c'uxtaya te winiquetic te buen ora yacalic ta c'oel ta atojol te yacuc awac'bon soc jtebuc te bitic ay awu'un ta ora in to, melel jichon ta atojol te bit'il anich'ane”, xaex me ya xc'oex —xi' te David.

⁹ Te abatetic yu'un David bajt'ic, c'o sc'asesbeyic yaiy te Nabal. La smaliyic te sujt'ib te c'ope.

¹⁰ Pero la sjac' te Nabal: —¿Mach'a a te David? ¿Mach'a a te snich'an Isaí? Ta ora in to bayal te mozoetic yacalic ta anel ta stojol te yajwalique.

¹¹ ¿Ya bal c'an jtsac te we'el-uch'elil, ti'bal te chapal cu'un, yu'un ya cac'bey te jloq'uesej-tsotsil-chijetic cu'une? ¿Ja' bal ya cac'bey te mach'a ma jna' banti talemique? —xi' te Nabal.

¹² Te abatetic yu'un David tojic sujt'el. C'alal c'otic ta stojol te David, la yalbeyic spisil te bitic albotic yu'un te Nabal.

¹³ Te David ora la yalbey tulan mandal te swinictac: —Tsaca awat'ejibic yu'un guerra ta apisilic —xi'. Te swinictac ora la xchuc ta xch'ujt'ic spuñalic ta spisilic soc te David. Jbajc' (400) winiquetic sjoinej bael, lajunwinic (200) jilic ta scanantayel te biluquetic yu'unique.

¹⁴ Pero te jtul yabat te Nabal, ba yalbey te Abigail te yinam Nabal: —C'alal to ta taquin q'uinal, te David la sticun abatetic yu'un swenta spatbeyel yo'tan te cajwaltique, pero mero amen bi la sutbey bael.

¹⁵ Yan stuquelic buen lec yo'tanic ta jtojoltic. Melel te jayeb c'aal la jointic, ta bayuc beenotic soc te chambalametique, ma'yuc la yuts'inotic soc ma'yuc bi la spojbotic.

¹⁶ Laj to xan scanantayotic ta c'aal ta ajc'ubal soc te chijetique.

¹⁷ Pero te amamlale jc'axel amen yo'tan, ja' yu'un ma sc'an yaiy stojol te bila ya calbeytique. Yo'tic nopa awaiy, ila awil teme ay bi ya xju' awu'un spasele, melel ora in to puersa ay bi amen ya xc'ot ta pasel ta swenta te cajwal soc spisil mach'atic ay yu'un —xi' c'oel.

¹⁸ Te Abigail ora la yich' lajunwinic (200) pan, cheb ta nujc'ulil vino, jo'cojt' wobil chij, cha'winic (40) litro ch'ilbil trigo, jo'winic (100) ta jpejch' taquintesbil ts'usub, soc lajunwinic (200) ta jpejch' taquintesbil higo, la yac'bey bael scuch burroetic yu'un.

¹⁹ La yalbey te abatetic yu'une: —Neelajaniquix bael a. Patil ya me xtalon ta apatic —la yut. Spisil te bi la spas, ma ba la yalbey stuquel te smamlale.

²⁰ Te Abigail mo ta sburro, muquen yac ta coel bael ta wits. Ora nax la yil yac ta talel ta stojol te David soc te swinictac, ba sta ta ora.

²¹ Te David yac ta yalel tel ta yo'tan te tojol la scanantaybey te biluc yu'un Nabal ta jochol taquin q'uinal, te bit'il ma'yuc la yich' pojel te bitic ay yu'une, melel ma lecuc sujt'ib ac'bot te bila lec la spasbey ta stojole.

²² Ja' yu'un jich la yal ta jamal: “Ac'a yac'bon tulan castigo te Dios teme ma ba ya jlajin soc spisil winiquetic te mach'atic ay yu'un te ma to sacub q'uinale”, xi'.

²³ Te c'alal la yil David te Abigail, ora co ta sburro, la stinan sba coel c'alal ta lum ta stojol te David, seña yich'el ta muc' yu'un.

²⁴ La spajc'an sba xan yan buelta ta mero ye'tal yoc, jich la yalbey: —Te mulile, cajwal, jo'on ac'a c'otuc ta jwenta. Wocoluc, ac'awon ta c'op, soc te yacuc awaiybon te bila ya jcholbat awaiye:

²⁵ Ma x'awich' ta wenta te Nabal, mero amen yo'tan. Melel jich yo'tan te bit'il c'oem te sbiile, yu'un nix ma'yuc bi ya sna' a. Yu'un nix mero amen yat'el a, spisil ora jich ya spasulan. Te jo'on abaton awu'une ma ba la quil te abatetic awu'un la aticun tele.

²⁶ Pero ja' nix te Cajwaltic te la scomat ta smalel ch'ich'e, soc te ma ba la yac'bat te ja'at nix ya asutbey spacole. Te bi ya xc'ot ta swenta te Nabal, te jichuc ya xc'ot ta swenta spisil acontro soc spisil mach'atic ya slebat awocol.

²⁷ Yo'tic wocoluc, ac'a yich' puquel spisilic te abatetic awu'un ajoinej te majt'aniletic la quich'bat tele.

²⁸ Abaton awu'un, pasbon perdón. Te Cajwaltic ya me sc'asesat ta muc' ajwalil soc ats'umbal ta cajalcaj, melel yacat ta guerra ta swenta te Cajwaltique. Te jayeb c'aal cuxulat ma me ayuc bi amen ya xc'ax awocol yu'un.

²⁹ Teme ay mach'a ya snutsat, yu'un ya sc'an ya smilate, ja' me swentainejbat acuxlejal te Cajwaltic Dios awu'une. Jich nix te acontro, ja' ni me te Cajwaltic te ya xch'oj bael ta jc'axele, jich te bit'il ya yich' ch'ojel bael ton ta jimoch'ile.

³⁰ Ja' yu'un, te c'alal ya xc'ot ta pasel yu'un Cajwaltic te bi bayal yutsil albil ta atojol yu'une, soc te c'alal ya yac'at ochel ta ajwalil yu'un Israel,

³¹ ma ba ya xtal bayal mel-o'tan ta awo'tan yu'un te ay la amalbey xch'ich'el te mach'atic ma'yuc bi spasojbate, soc te bit'il ja'at nix la asutbey spacol ta ac'abe. Te c'alal la yac'batix bayal bendición a te Cajwaltic, ya me ana'on te abaton awu'une —xi' te Abigail.

³² Jac'bot yu'un te David: —Bin nax yutsil te Cajwaltic te Dios yu'un te jlumaltic Israel te la sticunat atabelon ta be.

³³ Soc ac'a yac'bat bayal bendición te Cajwaltic, yu'un buen lec te bi la anop ta awo'tane. Melel ja'at la acomon te ma ba ya jmal ch'ich' yo'tique, soc te ma ba ya sujt'esbeyix spacol.

³⁴ Ya calbat ta jamal ta stojol Cajwaltic te Dios yu'un te jlumaltic Israel te la scoltayat ta jc'abe, te manchuc la asuj tel aba atabelone, pajel ma'yuc cuxulix jtuluc swinic Nabal te jichuque —xi'.

³⁵ Te David la stsac te smajt'an ac'bot ta sc'ab yu'un te Abigail, jich la yalbey: —Baan, jun awo'tan sujt'an bael ta ana. La awilix te la quich'bat ta wenta te ac'ope, la jpasbat perdón jich te bit'il la ac'anbon ta jtojole —xi'.

³⁶ Te c'alal c'ot te Abigail ta banti ay te Nabal, jun yo'tan yac ta pas-q'uin ta sna, sq'uin muc' ajwalil yilel te yac ta spasele. Mero bin nax yo'tan soc buen yuch'oj. Ja' yu'un ma'yuc bi la yalbey ja' to ta xchebal c'aal.

³⁷ C'alal sacub ta xchebal c'aal, te cuxix yo'tan ta yacubel a te Nabal, te Abigail la xcholbey yaiy spisil te bi c'ot ta pasele. Te Nabal, tup' yic', laj yip yoc sc'ab.

³⁸ Ta slajunebal c'aal a ticunbot xan tulan chamel ta stojol yu'un te Cajwaltic, laj ta jc'axel te Nabal.

³⁹ C'alal la yaiy te David te lajix te Nabal, jich la yal: —Bin nax yutsil te Cajwaltic te la sutbeyix spacol te la yuts'inbon co'tan te Nabal. La scomon ta spasel te bila amene. Te sbolil yo'tan te Nabal, ja' nix sutbot ta swenta yu'un te Cajwaltique —xi'. Patil te David la sticun ta alel te Abigail teme ya sc'an ya xnujbin soc.

⁴⁰ Te c'alal c'otic ta Carmel te abatetic yu'un te David, jich c'o yalbeyic te Abigail: —Te David la sticunotic tel ta atojol yu'un tal calbat awaiy te ya laj sc'an ya yic' yinaminat —la yutic.

⁴¹ Te Abigail la stinan sba coel c'alal ta lum swenta yich'el ta muc' te David, patil jich la yal: —Jo'on mero peq'uel abaton yu'un te David. Jun co'tan ya jpocbey yacan te abatetic yu'un teme jich ya yac'bon jpase —xi'.

⁴² C'alal laj yo'tan ta c'op, ora la xchajban sba. La yic' bael sjoin jo'eb criadaetic yu'un, mo ta sburro, bajt'. La sts'aclin bael te abatetic yu'un David, c'ot ta nujbinel soc.

⁴³ Te David ja' nix jich nujbin soc te Ahinoam te talem ta Jezreel, la yinamin xchebalic te antsetique.

⁴⁴ Yan te yantsil-nich'an Saúl, te Mical sbiil, te yinam David ta neelal toe, te Saúl la yac'bey yinamin Palti, snich'an Lais, talem ta Galim.