1 Samuel 24 - Bible in Tzeltal de Oxchuc y Tenejapa

David ma ba la smil Saúl

¹ Te c'alal sujt' tel ta snutsel filisteoetic te Saúl, albot yaiy te ay ta taquin tontiquil q'uinal En-gadi te David.

² Ja' yu'un te Saúl la stsa oxmil (3,000) winiquetic ta spisil Israel, bajt' ta sleel te David soc te swinictaque, toj bael ta saquil ch'entiquil-witsetic ta mero teq'uel witstiquil.

³ Te c'alal yac ta beel bael, c'ot ta corraletic yu'un chijetic. Ta snopolil bael ay nailch'en te banti snac'oj sba ta mero yutil te David soc te swinictaque. Te Saúl och bael ta tsa'anel tey a.

⁴ Te swinictac David jich albot yu'un: —Yo'tiquix ya xc'ot ta pasel te bi yalojbat te Cajwaltic: “Ya cac'bat ta ac'ab te acontro”, te xie. Yo'tic pasbeya te bi ya amulan spasbeyele —xiic. Te David jajch' bael ta c'unc'un, c'o set'bey loq'uel jxejt' sti'il smuc'ul c'u' te Saule.

⁵ Pero te c'alal jich la spas, patil ma jichuc la sc'an la yaiy ta yo'tan.

⁶ Jich la yalbey te swinictac: —Ja' me ac'a scomon te Cajwaltic ta sjachel jc'ab ta stojol te cajwale, ja' te muc' ajwalile. Melel ja' ac'bot yich' yat'el yu'un te Cajwaltic, ja' yu'un ja' muc' ajwalil stuquel —xi'.

⁷ Jich ju' yu'un scombel swinictac te David, jich ma'yuc bi la spasbeyic te Saúl. Jun yo'tan loc' bael ta nailch'en, jajch' xan ta beel.

⁸ Pero te David ta spat nax loc' bael ta nailch'en, jajch' yawtay: —¡Cajwal, cajwal! —xi'. Te Saúl la sut sit ta spat. Jich te David ora la stinan sba coel c'alal ta lum swenta seña yich'el ta muc'.

⁹ Jich la yalbey: —Cajwal, ¿bi yu'un ya ach'uun te mach'atic ya yalbat te yac jlebelat awocole?

¹⁰ Yo'tic ya me ana' ta lec te ma jichuque, melel te Cajwaltic nax la yac'atix ta jc'ab ta nailch'en. Te winiquetic la yalbonic te ya jmilate, pero la jpasbat perdón. Jich la cal: “Ma me ba ya xyal jc'ab ta stojol te cajwal, melel tsabil yu'un Cajwaltic”, xoon.

¹¹ “Soc ila awil, cajwal, te sti'il ac'u' quich'oj ta jc'abe, te yu'unuc ya jc'an ya jmilat, la jmilatix te jichuque. Tey me x'ana' a te ma'yuc bi amen jnopoj ta co'tan ta atojol, soc ma ba jnopoj te ya jmuquen-milate. Ma'yuc jtaoj jmul ta atojol. Yan te ja'ate yac alebelon yu'un ya amilon.

¹² Ja' ac'a xchajbanotic ta jchebaltic te Cajwaltic, soc ja' ac'a sujt'es spacol ta atojol stuquel. Yan te jo'one ma'yuc bi ora ya xyal jc'ab ta atojol.

¹³ Ay jun antiguo c'op te jich ya yal: “Ta yo'tan mach'atic amenic ya xloc' tel te bi amene”, te xie. Ja' yu'un te jo'on ma'yuc bi ora ya xyal jc'ab ta atojol.

¹⁴ ¿Mach'a yac alebel te ja'at te muc' ajwalilat yu'un Israel? ¿Mach'a a te yacat ta snutsele? Jo'on te jichon ta atojol te bit'il lajem ts'i', soc jichon te bit'il ch'ac.

¹⁵ Ja' yu'un ay ta swenta soc ja' ac'a xchajbanotic ta jchebaltic stuquel te Cajwaltique. Ja' ac'a yil stuquel te bi ay ta jwenta, soc ac'a scoltayon ta ac'ab —xi' te David.

¹⁶ Te c'alal laj yo'tan ta c'op te David, jich la yal te Saúl: —¿Ja'at bal jiche, jnich'an David, te yac ac'oponbelone? —xi'. Jajch' ta oq'uel te Saule,

¹⁷ jich la yal: —Buen lec te bi la apas te ja'ate, melel buen lec sujt'ib la awac'bon te bitic amen yacon ta spasel ta atojole.

¹⁸ Nax la awac'bonix jna' te lec awo'tan cu'une, melel la yac'onix ta ac'ab te Cajwaltique, pero ma ba la amilon.

¹⁹ Melel ma'yuc mach'a ya xju' yu'un jich ya spas te ayix ta sc'ab te scontro, te buen lec ay a ya scoltay baele. Ja' yu'un, ja' ac'a stojbat ta buen lec te Cajwaltic te bi la apasbon ta jtojol te naxe.

²⁰ Yo'tic mero la jna'ix ta lec te ja'at te ya x'ochat ta muc' ajwalil, soc te ya xmuc'ub xan te Israel ta awenta c'alal ya x'ochat ta muc' ajwalile.

²¹ Albon caiy ta jamal ta stojol Cajwaltic teme ma ba ya alajinbon spisil te patil alnich'anetic cu'une, soc teme ma jc'axeluc ya ach'aybon jts'umbal soc te mach'atic ay cu'une —xi'.

²² Te David la yalbey ta jamal te Saule. Patil sujt' bael ta sna te Saule. Ja' nix yorail bajt'ic ta anjibal ch'en a te David soc te swinictaque.