1 Samuel 23 - Bible in Tzeltal de Oxchuc y Tenejapa

David la scoltay lum Keila

¹ Te filisteoetic la yac'beyic guerra te lum Keila, la yelc'anic te trigo loq'uel to spat yu'unique. Te c'alal la yalbeyic yaiy te David,

² la sjojc'obey te Cajwaltic: —¿Ya bal awac'on bael te ya xba cac'bey guerra te filisteoetique? —xi' ta stojol. Jac'bot yu'un te Cajwaltic: —Yacuc, baan ac'beya guerra, coltaya ta sc'ab filisteoetic te lum Keila —xi' sc'oplal yu'un te Cajwaltique.

³ Pero te swinictac David jich la yalic: —Te li' to ayotic ta sq'uinal Judá yacotic ta xiwel, ¿ja'uc to balix a te ya xbootic ta lum Keila ta yaq'uel guerra te filisteoetique? Ya xtoy xan te xiwel ya caiytique —xiic.

⁴ Te David bajt' xan ta sjojc'obeyel te Cajwaltique. Te Cajwaltic jich la yal: —Jajch'an ta beel, baan ta Keila, jo'on ya cac'bat ta ac'ab te filisteoetique —xi'.

⁵ Te David soc te swinictac jajch'ic ta beel, tojic bael ta Keila. Tey c'o yac'beyic guerra a te filisteoetic, jc'axel tsalbil jil yu'unic, la yic'beyic te xchamsbalamique. Jich te David la scoltay ta sc'ab filisteoetic te yajwal lum Keila.

⁶ Te Abiatar te snich'an Ahimelec te tal ta anel ta st'unel bael David, bajt' soc ta Keila, yich'oj bael te efod.

⁷ Te Saúl ay mach'atic albot yaiy yu'un te ay ta Keila te David. La scuy te ac'botix ta sc'ab yu'un Dios te bit'il ochemix ta yutil lum, te macal ta spuertail sts'ajc'ul te ay pasador staq'uinal yu'une.

⁸ Te Saúl ora la sticun ta tsobel tel spisil te soldadoetic yu'une, swenta yu'un ya me xbajt'ic ta Keila ta sjoytayel te David soc te swinictaque.

⁹ Pero la yaiy te David te bi chapalix yu'un Saúl. La yalbey mandal te sacerdote Abiatar te yacuc x'ich'bot tel te efod, swenta yu'un ya me sjojc'obey te Cajwaltique.

¹⁰ Jich la yal te David: —Cajwal te Diosat cu'untic te israelotique, jo'on te awabaton, caiyoj te Saúl ya xtal slajin te lum Keila ta jo'on jwenta.

¹¹ ¿Ya bal xtal sleon te Saúl jich te bit'il caiyoje? ¿Ya bal yac'onic ta sc'ab Saúl te yajwal te lum Keila? Cajwal Dios cu'untic, jo'on te abaton awu'une, ya calbat wocol te yacuc awalbon caiye —xi'. Te Cajwaltic la sjac': —Te Saúl ya xtal —xi'.

¹² Te David la sjojc'obey te Cajwaltic: —¿Ya bal yac'otic ta sc'ab Saúl te yajwal lum Keila jo'on soc te jwinictac? —xi'. Te Cajwaltic la sjac': —Ya yaq'uex ta sc'ab —xi'.

¹³ Jich ora te David soc te swinictac te ay wan lajunwinic xcha'bajc' (600) ta spisilic, loq'uic bael ta Keila, ma ba la sna' banti ya xbajt'ic. C'alal la yaiy te Saúl te loq'uix bael ta Keila te David, ma'yuc bi la spasix, ma ba la stenix bael.

David ay ta jochol taquin q'uinal

¹⁴ Te David jalaj ta nainel ta anjibal ch'entiquil te ayic ta witstiquil ta jochol taquin q'uinal Zif. Te Saúl jujun c'aal la sle te David, pero ma ba ac'bot ta sc'ab yu'un Dios.

¹⁵ Pero te David puersa bayal la xi' te Saúl ta scaj te loq'uem ta leel yu'un ya xmilote. Ja' yu'un jil ainuc ta Hores ta taquin q'uinal Zif.

¹⁶ La sta yorail te bajt' ta ilel yu'un te Jonatán snich'an Saúl te David, te c'alal ay ta Hores. C'o yac'bey yip yo'tan ta swenta Dios,

¹⁷ jich albot yu'un: —Ma xiwat, te jtat Saúl ma xju' ya staat. Ja'at me ya x'ochat ta muc' ajwalil yu'un Israel; yan te jo'on ja' nax ya joinat ta at'el. Jich nix sna'ojix te jtat Saule —xi'.

¹⁸ Jich ora la xchap sc'opic ta xchebalic, ja' la yaq'uic ta testigo te Cajwaltique. Te Jonatán sujt' bael ta sna, yan te David jil ta Hores.

¹⁹ Pero te mach'atic ainemic ta Zif, bajt'ic ta Gabaa ta sc'oponel Saúl, jich c'o yalbeyic: —Te David snac'oj sba ta jq'uinaltic ta anjibal ch'entiquil te ay ta wits Haquila ta Hores, ta sur yu'un te jochol taquin q'uinale.

²⁰ Ja' yu'un, muc' ajwalil cu'untic, te bi ora ya ac'an ya xba awile, baan me, ya me cac'tic ta ac'ab te Davide —xiic c'oel.

²¹ Jich albotic yu'un te Saúl: —Ac'a yac'beyex bendición te Dios te bit'il la ana'bonic yo'bolil jba.

²² Yo'tic ya calbeyex wocol, baanic tsajtaya awilic ta lec te banti mero ay, soc na'a me bi sbiil te mach'a yiloje. Melel ay ya yalbonic te mero bayal sp'ijil yo'tane.

²³ Ila me awilic ta lec te nac'ojibaletic ta banti ya x'oche. Patil ya me sujt'ex tel ta jtojol te c'alal mero ana'ojiquix ta lec a, jich me ora ya joinexix bael. Teme mero melel te bay ya awalique, xtiq'uet me ya jle ta juju-jchajp sts'umbal Judá —xi'.

²⁴ Te mach'atic talemic ta Zif, la sc'oponic jilel te muc' ajwalile, neelajic bael ta slumalic. Te David soc te swinictac ayic ta taquin q'uinal ta nopol ch'in lum Maón, ta spamlej te ay ta sur yu'un te t'axal taquin q'uinale.

²⁵ Te Saúl soc te swinictac jajch'ic ta beel, bajt'ic ta sleel te David. C'alal albot yaiy te David te bajt' ta leel, toj bael ta saquil ch'entiquil-wits te ay ta taquin q'uinal yu'un Maón. C'alal la yaiy te Saúl, bajt' ta taquin q'uinal yu'un Maón ta ora ta snutsel te David.

²⁶ Ta jejch' wits yac ta beel te Saúl soc te swinictaque. Ta yan jejch' wits yac ta beel te David soc te swinictac, yac'ojic puersa yu'un ya sc'an ya xc'ubic bael ta stojol te Saule. Pero te Saúl soc te swinictac la sjoytayic te David soc te swinictaque. Te c'alal nopol ya stsajq'uix yu'unic a,

²⁷ ora nax jich c'ot ta alel te Saúl: —Sujt'an bael ta ora, yu'un la yochintaybotiquix jq'uinaltic te filisteoetique —xi' julel ta stojol.

²⁸ Te Saúl la yijq'uitay snutsel te David, ba stsac sba soc te filisteoetique. Ja' swentail te “Wits yu'un Ijq'uitayel” xi' sbiil c'ot te lugare.

²⁹ Jajch' bael tey a te David, bajt' ta nainel ta anjibal ch'entiquil ta En-gadi.