1 Samuel 22 - Bible in Tzeltal de Oxchuc y Tenejapa

¹ Te David jajch' bael tey a, bajt' ta anel ta nailch'en ta nopol Adulam. C'alal aiyot yu'un te sbanquiltac soc te yantic xchapomale, ba stsob sbaic soc.

² Soc bajt'ic te mach'atic c'ux obol sbaic, te mach'atic ay sbetic, soc te mach'atic ma lecuc yo'tanic ta stojol Saúl, ja' jtsobwanej c'ot yu'unic te David. Ta spisil te jayeb la stsob te David, ay wan jbajc' ta jtul (400) ta spisilic te winiquetique.

³ Jajch' bael tey a te David, bajt' ta Mizpa ta sq'uinal Moab. Jich c'o yalbey te muc' ajwalil yu'un Moab: —Ya calbat wocol, ayuc bit'il ya awic'bon jilel ta atojolic te jtat soc te jme'e, ja' to ya quil te bila ya spas mandal ta jtojol te Diose —xi'.

⁴ Jich la stejc'an ta stojol muc' ajwalil yu'un Moab te sme'-stat. Tey ainic soc a te jayeb c'aal te jalaj ta anjibal te David.

⁵ Te Gad, te j'alwanej yu'un Dios, la yac'bey consejo te David: —Ma me x'ainat li' ta anjibal ch'en ta banti ayotique. Jajch'an ta beel, baan ta sq'uinal Judá —xi'. Jich bajt' te David, c'ot ta toyem te'tiquil Haret.

Milot sacerdoteetic ta Nob

⁶ Ja' nix yorail a te ay ta Gabaa te Saúl, nacal ta ye'tal tamarisco ta wits ta banti ch'uunjibal. Stsacoj ta sc'ab slanza seña muc' ajwalil, soc joytabil yu'un te jtsobwanej-soldadoetic yu'une. La yaiy te Saúl te chicnajix ta alel te David soc te mach'atic sjoineje.

⁷ Ja' yu'un la yalbey te mach'atic joytabil yu'une: —Sts'umbalex Benjamín, aiybon awaiyic jc'op: ¿Yu'un bal ya acuyic te apisilic ya yac'beyex aq'uinalic soc ats'usubilic te snich'an Isaí, soc ya bal acuy te ya yac'beyex awat'elic ta jtsobwanej yu'un te soldadoetic yu'une? Ta apisilic acomon-pajoj awo'tanic acontroinbelonic soc,

⁸ melel ma'yuc mach'a la yalbon teme xchapoj sc'op te jnich'an soc te snich'an Isaí. Ma'yuc jtuluquex te ay jc'oplal ta awo'tanique. Ma'yuc mach'a la yalbon caiy teme ja' nix te jnich'an te yac ta aq'uel yip yo'tan yu'un te ya scontroinon te jcuch-at'ejibal ta guerra cu'une, swenta yu'un ya xchajban sba smaclibelon, jich te bit'il yac ta spasel ta ora in to —xi'.

⁹ Te Doeg te edom-winic te ay ta yolilic te abatetic yu'un Saúl, jich la yal ta sjaq'uel: —Jo'on la quil te snich'an Isaí te c'alal c'ot ta Nob, te ja' c'o sc'opon te Ahimelec te snich'an Ahitob.

¹⁰ Te Ahimelec ay bi la sjojc'obey Cajwaltic ta stojol te David, soc la yac'bey swe'el soc la yac'bey te spuñal Goliat, ja' te filisteo-winique —xi'.

¹¹ C'alal la yaiy te muc' ajwalil, la sticun ta iq'uel te sacerdote Ahimelec soc spisil te yantic sacerdoteetic ta Nob, te ja' nix spat-xujc' sba soque. Te c'alal c'ot spisilic ta stojol te muc' ajwalil,

¹² te Saúl jich la yalbey te Ahimelec: —Aiybon awaiy ta lec te bi ya calbat, ja'at snich'an Ahitob —xi'. —Ayon ta atojol, muc' ajwalil —xi' ta sjaq'uel te Ahimelec.

¹³ Jojc'obot yu'un: —¿Bi yu'un te la apaj awo'tan soc te snich'an Isaí acontroinbelon soc? Ja'at la awac'bey we'elil soc puñal, soc ay bi la ajojc'obey Dios ta stojol, swenta yu'un ya scontroinon, ya xchajban sba yu'un ya smacliyon jich te bit'il yac ta spasel ta ora in to —xi'.

¹⁴ Te Ahimelec la sjac'bey te sc'op muc' ajwalil: —Ta spisil te jayeb jtsobwanej-soldadoetic awu'une, ¿mach'a yan pajal jun yo'tan ta atojol jich te bit'il te Davide? Soc xan ja' aniale, soc ja' swentainej te jcanantaywanej-soldadoetic awu'un, soc buen ich'bil ta muc' ta ana.

¹⁵ ¿Yu'un bal sbabial buelta jiche te ay bi ya jojc'obey Dios ta stojol David? Ma jichuc. Ja' yu'un ma me xawac'bon jmulin te jo'on te abaton awu'une, soc ma me xawac'bey smulin te mach'atic ay cu'une. Melel te jo'one ma'yuc xcaiy, ni jxujt'uc jna'oj te bi c'opetic aye —xi' te Ahimelec.

¹⁶ Pero te muc' ajwalil tulan la yalbey: —Ahimelec, na'a me ta lec te ya xlajat soc spisil te ats'umbale —xi'.

¹⁷ Te muc' ajwalil ora la spas ta mandal te soldado-canantaywanejetic yu'une: —Milaic te sacerdoteetic yu'un Cajwaltique. Ja' nix jun yo'tanic soc David, sna'ojic te yac ta anel ta jtojol, pero ma ba la yalbonic caiy —xi'. Pero te jcanantaywanej-soldadoetic yu'un ma ba la yal sc'abic ta stojol te sacerdoteetic yu'un Cajwaltic.

¹⁸ Ja' yu'un te muc' ajwalil la spas ta mandal te Doeg te edom-winic: —Mila ja'at —la yut. Te Doeg spisil yip och ta smilel te sacerdoteetique. Laj ta milel yu'un jo'eb yo'winic (85) winiquetic te slapojic efod pasbil ta lino-pac'.

¹⁹ Patil och bael ta Nob, te ja' lum yu'un te sacerdoteetique. C'o smil ta puñal spisil winiquetic, antsetic, alaletic soc mero ayinel to alaletic; soc la smil wacaxetic, burroetic soc chijetic.

²⁰ Pero ay col jtul te snich'an Ahimelec, Abiatar sbiil. Wocol xanix col loq'uel ta anel te banti ay te mach'atic lajic ta milele, bajt' ta anel c'alal ta banti ay David.

²¹ C'o yalbey te la yaq'uix ta milel te sacerdoteetic yu'un Cajwaltic te Saule.

²² Jich la yal te David: —La nix jna' a te c'alal c'axon tel, te puersa ya yalbey Saúl te Doeg te bit'il tey ay a c'alal c'axon tele. Jo'on ta jmul te la yich' milel spisil te apat-axujq'ue.

²³ Pero li' ya x'ainotiquix, ma me xiwat. Teme ay mach'a ya sc'an ya smilate, yu'unix ya sc'an ya smilon abi. Ma'yuc bi ya xc'ot ta awenta, melel julatix tel ta banti ayon —xi' te David.