1 Samuel 21 - Bible in Tzeltal de Oxchuc y Tenejapa

David loc' ta anel ta stojol Saúl

¹ Te David toj bael ta Nob ta yilel te sacerdote Ahimelec. Pero te Ahimelec yac ta buen xiwel a loc' ta yilel, jich la yalbey te David: —¿Bi yu'un te atuquel yacat ta beel, te ma'yuc mach'a ajoinej ta beele? —xi'.

² Jac'bot yu'un te David: —Te muc' ajwalil la yalbon tulan mandal ta xchajbanel c'op, soc la yalbon te ma'yuc mach'a ya xju' ya sna' bi yu'un la sticunon tel, soc ma'yuc mach'a ya xju' ya sna' bi mandalil te quich'oje. Te winiquetic ay ta jwenta jchapoj soc banti ya jta jba soc.

³ Yo'tic ¿bi ay awu'un, yu'un ya jwe'tic? Ac'bon jo'ebuc pan, o chican te jayeb ay awu'une —xi' te David.

⁴ Jac'bot yu'un te sacerdote: —Te pan ay cu'une ma biluc nax panil. Ja' nax ay cu'un te ch'ul pan te ja' yu'un te Cajwaltic, pero ya cac'bat teme ma ba wayemic soc ants te awinictaque —xi'.

⁵ Te David tulan la yalbey: —Melel te c'alal ya xloc'otic bael ta guerra, spisil ora te ma ba xwayotic soc ants. Yo'tic jich nax ayotic ta beel, pero te c'alal loc'otic tele, ma'yuc bay wayotic soc ants. Ta ora in to mero lecuben te winiquetique —xi'.

⁶ Jich te sacerdote la yac'bey te ch'ul waj te David, melel ja' nax ay tey a te ch'ul waj yu'un te Cajwaltique. Ja' yorail te ya yich' loq'uesel ta ch'ul mesa ta stojol Dios, swenta yu'un ya yich' aq'uel q'uixin pan tey a.

⁷ Jich ora te ay jtul abat yu'un a te Saúl, jilem ta ch'ul awilal ta scaj te ay bi jalajtesbil yu'une. Edom-winic stuquel, Doeg sbiil, ja' swentainej te jcanan-chijetic yu'un Saúl.

⁸ Te David jich la yalbey te sacerdote Ahimelec: —¿Ay bal li' ay awu'un lanza, o puñal? Melel ta scaj te tulan sc'oplal te smandal te muc' ajwalile, ora nax loc'on tel. Jich ma ba ju'ix te la jtam tel te puñal cu'une, soc ni ja'uc te yantic at'ejibaletic cu'un yu'un guerra —xi'.

⁹ Jac'bot yu'un te sacerdote: —Ay, ja' li' ay cu'un te spuñal Goliat, te filisteo la amil ta spamlej q'uinal Ela. Ay ta spat efod, potsol ta pac'. Ya xju' ya awich' bael teme ya ac'ane. Ma'yuquix yan at'ejibal yu'un guerra quich'oj —xi' te sacerdote. La sjac' te David: —Ja' mero lec stuquel abi. Ac'bon tel —xi'.

¹⁰ Ora cha'bajt' xan ta anel ta scaj Saúl te David, c'o yac' sba ta stojol Aquis te muc' ajwalil yu'un lum Gat.

¹¹ Te jtsobwanej-soldadoetic yu'un Aquis la yalbeyic yaiy: —Pero ja' wan te David me to, te muc' ajwalil c'otix yu'un te q'uinal. Ja' te c'ajinic ta ajc'ot ta yalel te: “Jmil (1,000) ta jtul winiquetic la smil Saúl, lajunmil (10,000) ta jtul la smil David”, te xie —xiic.

¹² Te David mero la yich'bey swentail ta lec te bi alote. Jich jajch' ta xiwel ta stojol te Aquis te muc' ajwalil yu'un lum Gat.

¹³ Ja' yu'un te David jajch' syantes sba ta scomon sitic, ma jichuquix te bit'il mero stalele. La sc'atp'un sba ta sjoquem sjol, jajch' slujc'anlay ta ts'ibuyel ta sti' naetic soc la yac' maluc coel ya'lel ye ta yisim.

¹⁴ Ja' yu'un te Aquis la yalbey te abatetic yu'une: —Teme sjoquem sjol la awilic te winique, ¿bistuc la awic'bonic tel?

¹⁵ ¿Yu'un bal ma'yuc li'to te mach'a sjoquem sjole? ¿Yu'un bal ya sc'an ya quic' ochel ta jtojol swenta yu'un ya spas bol at'el ta jna? —xi'.