1 Samuel 20 - Bible in Tzeltal de Oxchuc y Tenejapa

Jonatán la scoltay ta anel David

¹ Te David loc' jajch'el ta anel ta Naiot ta Ramá, bajt' ta banti ay Jonatán, yu'un ay bi ba yalbey: —¿Bila jpasoj te jo'one? ¿Bila jmulinej? ¿Bila jmul jtaoj ta stojol te atat, te yac slebelon te ya smilon yu'une? —xi' te David.

² La sjac' te Jonatán: —Ma jichuc ya sc'an te Diose, ma ba ya smilat. Ja' me x'ana' te ma'yuc bi ya spas ta stuquel nax, puersa me ya yalbon, manchuc me tulan sc'oplal o ma ba tulan sc'oplal. ¿Yu'un bal ma sc'an ya yalbon caiy te jtate? Ma wan —xi' te Jonatán.

³ Pero te David c'opoj xan: —Te atat sna'oj te lec awo'tan cu'une. Ma sc'an ya yalbat awaiy, yu'un ya xi' ya x'ilinat yu'un. Pero ya calbat ta jamal ta stojol te Cajwaltic soc ta atojol, te mero tec' xanix ta acanil quiloj jba soc te lajele —xi'.

⁴ Te Jonatán la sjojc'obey: —¿Bi ya ac'an ya jpasbat ta atojol? —xi'.

⁵ La sjac' te David: —Te pajel ja'ix te q'uin swenta yach'il u, ya sc'an te ya jnajc'an jba ta we'el soc te muc' ajwalile. Pero ac'awon bael, ya xba jnac' jba ta aquiltic. Cha'wej ta smalel bael c'aal ya xloc'on tel.

⁶ Teme la sna'on te atate, albeya te la jc'anbat permiso yu'un ya xboon tel ta jlumal ta ora nax ta Belén, scaj te ya yac'beyic milbil smajt'an Dios swenta jujun ja'wil te mach'atic ay cu'une.

⁷ “Lec ay jiche”, teme xie, tic' me ya jna' a te lec yo'tan cu'une, tey me ya senaj co'tan a. Pero teme toj ilinel yu'une, tic' me ya ana' a te yu'un xchapoj te ay bi amen ya spasbone.

⁸ Lec ay jiche, pasbon te bila ya calbate, wocoluc. Melel jo'on te awabaton te jamal calojtic ta stojol Cajwaltic te c'ux ya caiy jbajtique. Yan teme jo'on ay jmule, milawon ja'at, ma puersauc ya awic'on bael ta stojol te atate —xi' te David.

⁹ Pero la sjac' te Jonatán: —Ma me jichuc xawal. Teme ay la caiy te yac ta xchapel te ay bi amen ya spasbat te jtate, jo'on ni me ya calbat ta ora —xi'.

¹⁰ La sjojc'o te David: —¿Mach'a ya yalbon caiy teme ma lecuc ya sjac'bat te ac'ope? —xi'.

¹¹ La sjac' te Jonatán: —La', ya xbootic ta aquiltic —xi'. Loc' bael xchebalic ta aquiltic.

¹² C'alal c'otic, jich la yalbey te David te Jonatán: —Ya cal ta jamal ta stojol Cajwaltic te Dios cu'untic te israelotique, te pajel o cha'wej, jich ora in to, ya me jtsatay quil te bila snopoj ya spas te jtate. Teme lec te bila snopoj ta yo'tan ta atojole, ya jticunbat ta alel.

¹³ Yan teme amen bi snopoj ya spasbat te jtate, ac'a me yac'bon buen tulan castigo te Cajwaltic teme ma ba ya calbate, soc teme ma ba ya jcoltayat swenta jun awo'tan ya xcolat baele. Ja' ac'a scoltayat te Cajwaltic, jich te bit'il coltayot yu'un te jtate.

¹⁴ Lec ay, teme cuxulon to a, jich ni me xac'uxtayon te bit'il ya spasbat te Cajwaltique. Teme lajonix a,

^15-16 na'bon me yo'bolil sba te mach'atic ay cu'une. Te Cajwaltic ac'a yac'bey stoj te jayeb acontro, soc ac'a slajin ta jc'axel —xi'. Jich la xchapic te Jonatán soc David te bit'il ya x'ainique.

¹⁷ Pero te bit'il bayal c'ux ta yo'tan, jich te Jonatán la yalbey yaiy xan yan buelta te bi xchapojique, melel bayal c'ux ta yo'tan la yaiy David te Jonatán.

¹⁸ Jich la yalbey: —Pajel ta q'uin swenta yach'il u ya me xchicnaj te ma ba tey ayat a, melel jochol te anactijibe.

¹⁹ Ta yoxebal c'aal, ya me xchicnajix te ma ba tey ayat a. Ja' yu'un tey nix xbaat ta banti la anac' aba ta yan c'aale. Tey xc'o awac' aba te banti busul tone.

²⁰ Ya me xba cac' oxeb tiro jt'imalte' ta jejch', jich nax yilel te bit'il yacon ta tojlinbelate.

²¹ Ya me calbey te abat cu'une: “Baan, lea tel te yat'ejibalul jt'imalte'”, xoon me. Teme ya calbey xan: “Te yat'ejibal jt'imalte' teme ma'yuc ta banti c'alal c'oate, la' tama tel”, teme xoone, jun awo'tan xloc'at tel, melel ma me ayuc bi amen ya xc'ot ta awenta. Jich jc'axel ya calbat ta stojol te Cajwaltique.

²² Yan teme jich ya calbey te abate: “Te yat'ejibalul jt'imalte' tey to ay bael ta ajejch'elul baele”, teme xoone, baan me, yu'un me jich ya sc'an Cajwaltic te ya xbaate.

²³ Te bi jchapojtic ja' testigo cu'untic sbajt'el q'uinal te Cajwaltique —xi'.

²⁴ Te David la snac' sba ta aquiltic. Te c'alal c'ot yorail te q'uin swenta yach'il u, te muc' ajwalil la snajc'an sba ta we'el ta mesa.

²⁵ Tey nix c'ot ta najc'ajel ta banti yawil nix ta ch'ujtpajq'ue. Te Jonatán la snujp'usitay sba soc Saúl, te Abner najc'aj ta xujc' Saúl. Te snactijib David jochol jilel stuquel.

²⁶ Ja' in c'aal to, ma'yuc bi la yal te Saule. La wan scuy te yu'un ma ba lecuben te David, teme ay bi amen c'oem yu'une, teme ma ba ju' yu'un ya slecubtes sba.

²⁷ Pero ta xchebal c'aal te q'uine jochol xan jilel te snactijib. Te Saúl la sjojc'obey te snich'ane: —¿Bi yu'un ma ba tal ta we'el wojey te snich'an Isaí, soc yo'tic ma ba chican? —xi'.

²⁸ La sjac' te Jonatán: —Te David la sc'anbon permiso te bayal sc'oplal ta yo'tan te ya xbajt' ta Belén,

²⁹ melel te mach'atic ay yu'une ya yac'beyic milbil smajt'an Dios ta slumal, soc albot laj tulan mandal yu'un sbanquil te yacuc xbajt'e. Soc la yalbon teme ya cac'bey permiso, ya laj xba yil tel spat-xujc', ora laj ya sujt' tel. Ja' yu'un ma ba talem snajc'anbel sba ta we'el soc ja'at te muc' ajwalilate —xi'.

³⁰ Jajch' slab yo'tan te Saúl, jich la yalbey te Jonatán: —Yalat me bol me'el. ¿Ya bal acuy te ma ba jna'oj te mero jun awo'tan aba soc te snich'an Isaí? Q'uexlaltic sba ta atojol soc ta stojol ame'.

³¹ Te jayeb xan c'aal cuxul ta balumilal te Davide, ni ja'uc lec ayat, soc ni ja'uc lec ya awich' awat'el ta ajwalile. Ja' yu'un ticuna ta leel, ic'bon tel, puersa me ya xlaj —xi'.

³² La yal te Jonatáne: —¿Pero bi yu'un ya x'och ta lajel? ¿Bi spasoj jiche? —xi'.

³³ La sjach te slanza te Saúl, ya c'an yejch'entes te Jonatán. Tic' la sna' a te mero chapal yu'un te stat te ya smil te David.

³⁴ Jich mero ilinem yo'tan loc' jajch'el ta mesa te Jonatán. Ma ba och ta we'el ta swenta xchebal c'aal yu'un te q'uine, scaj te mero bayal la smel yo'tan yu'un te bi la yal te stat ta stojol David, soc nix te bit'il amen bila albot yu'un te state.

³⁵ Ta xchebal c'aal, ta yorail te bi yaloj soc David te Jonatán, loc' bael ta aquiltic soc jtul yabat querem.

³⁶ Jich la yalbey te yabate: —Ya me xbaat ta animal ta ora ta stamel tel te yat'ejibalul jt'imalte' ya cac' baele —xi'. Te abate bajt' ta animal, te Jonatán yac st'imbel bael te yat'ejibalul st'imalte' swenta yu'un ya me xyal bael ta sjejch'elul te abate.

³⁷ Te c'alal c'ot te abat tey ta banti yal coel te yat'ejibalul t'imalte', te Jonatán la yawtay ta mero spisil yip te yabate: —¡Tey to c'ot ta ajejch'elul baele! —xi' ta aw.

³⁸ La yawtay xan te yabat te Jonatán: —¡Suja aba, animajan! ¡Ma xatejc'an aba! —xi'. Te abat yu'un te Jonatán, la stam tel te yat'ejibalul t'imalte', tal yac'bey te yajwale.

³⁹ Pero ma'yuc bi la sna' stuquel, melel ja' nax stuquel te Jonatán soc David sna'ojic te bi señail te la yich' pasele.

⁴⁰ Patil te Jonatán la yac'bey te yat'ejib ta guerra te yabate soc la sticun sujt'el ta lum.

⁴¹ Te c'alal bajt' te abate, ora loc' tel ta spat busul ton te David. C'alal c'ot ta stojol te Jonatán, oxeb buelta la stinan sba coel c'alal ta lum ta stojol. Patil la sbujts'i sbaic, pajal la yoq'uetay sbaic, pero ja' bayal oc' te David.

⁴² Swenta slajibal, te Jonatán la yalbey te David: —Lec ay, baan, jun awo'tan xbaat. Te bila jc'axel jchapojtic jchebaltic, ja' jchapojtic ta swenta te Cajwaltique. Jc'anojbeytic te yacuc swentainotic ta jchebaltic soc cal-jnich'an soc awal-anich'an ta cajalcaj ta sbajt'el q'uinal —xi'. Jich jajch' ta beel, bajt' te David. Te Jonatán sujt' bael ta lum stuquel.